1 QaJaaw Dios, xa awuuk' wo' hat i nuyeew nuk'ux, ruum i nayeew weh i nupahqaaj aweh. Re' hat nee kinako'leej ruum korik wach ak'ux. 2 Je' re' noq, kinab'iraj tii, kinako'leej chi jumehq'iil hat paat ab'aj ko'lemb'al iib' chi weh, ruum xa re' wo' hat manlik ko'len weh. 3 Eh hat paat ab'aj ko'lemb'al iib' chi weh i hin, ruum xa re' wo' hat ti ko'linik weh. Ruum aj re' chak'am tii nub'eeh ruuk' aak'axb'al. 4 Re' taqe ki-ixowanik nuwach kikojom nuxirob'aal, kinawesaj ti chupaam, ruum xa re' wo' hat nee ti ko'linik weh. 5 QaJaaw Dios, re' hin panaq'ab' i nuq'asaj i wánjel nut'iosil. Eh inwaaj chi nee kinawesaj pan k'axik, ruum xa re' wo' hat, i hat i korik laj Dios. 6 Re' hin awuuk' i hat i nuyeew i nuk'ux. Ruum aj re', ma' inwaaj ta kiwach i kiloq'inik taqe i reh xa tiyoox, xama' xta kajaawriik. 7 QaJaaw Dios, ruuk' aak'axb'al i nayeew rusuqkiil nuk'ux chi manlik. Eh re' hat inawil i ruti'kiil nuk'ux. Eh inawil chi xanyot'ik chik i wánima. 8 Weht'al i hin noq ma' xayeew ta q'ab' chi xinkikansaj taqe i ki-ixowanik nuwach, xayeew la' cho rukowiil nuk'ux. 9 QaJaaw Dios, chaketelaaj tiinuwach ruum re' hin panyohb'aal wilkiin, re' naq'nuwach xak'ahchi' chi oq'ik ruum i ti' k'axik. Re' wánima, eh re' nuti'jolal xama' xta chik kaansil inwik'raaj. 10 Re' taqe ti' k'axik k'ahchi' nuk'ulum k'ahchi' rutoqom rooq i nuk'achariik. Ruum taqe rutz'irkiil nuwach k'ahchi' ruk'uhliik i waansil. Xa je' chik q'ojooj taqe nub'aqil noq inwik'raaj. 11 Eh re' taqe i ki-ixowanik nuwach, xa hin kib'ajb'al, re' taqe nuka'jaah nuk'ula't xa hin kise'lb'aal. Eh xa hin chik yohb'isaneel chi keh i kieht'alinik nuwach, eh xa kajiim chik kielik chi nuwach pamb'eeh. 12 Re' taqe re' ma' kink'ulik ta chik pankik'ux chi jumpech, xa je' chik hin kamnaq chikiwach. Eh xa je' chik hin ruxeer ak'al xaro chikiwach. 13 Re' hin imb'iraj taqe tinamit chi k'ahchi' kijask'uum chikiwach chib'ih i naa kianam weh, noq kinooj xa aha', panyohb'aal wilkiin. Eh inkiyejaa' wach i nukanteesjiik. 14 Xa re' la', re' hin Jaaw, awuuk' i hat i nuyeew i nuk'ux, ruum weht'al chi re' hat, hat nuDios. 15 Re' nuk'achariik panaq'ab' wilik, kinako'leej pan kiq'ab' i ki-ixowanik nuwach, re' i kib'anik ti' k'axik weh. 16 QaJaaw Dios, re' hin, hin awaj kamanoom chayeew tii weh ak'axb'al. Chaketelaaj nuwach, kinako'leej. 17 QaJaaw Dios, i nupahqaaj nutoob'jiik aweh maa k'uhtaaj nuk'ixb'ilaal. Re' la' taqe i yiib' wach kina'ojb'al cha k'uhtaaj kik'ixb'ilaal, chakansaj taqe reh chi ma' nee ta chik kiq'orik. 18 Chatz'ap i kichii' i aj chukul q'orik, ruum re' keh inkib'aj, inkixowaaj wach, ma' imponik ta panaq'kiwach i korik wach ruk'ux. 19 QaJaaw Dios, re' hat yohb'aal wach aawotob'il i nayeew chikinaah i kiyohlinik aweh. Eh inak'uhtaaj chikiwach i tinamit chi korik chi nak'ax taqe inkiyeew kik'ux awuuk'. 20 Eh ruum chi wilkaat kuuk' chi kitoob'jiik xako'leej taqe chuwach i kiyejaam wach i yiib' wach kina'ojb'al. Re' wo' hat naa ako'liniik keh chikiwach imb'ajwik keh. 21 Neeta naq inye'arik ruloq'il i QaJaaw Dios. Ruum ruuk' i ruk'axb'al xuyeew rukowiil nuk'ux noq xub'an taqe i sahchb'al k'uxliis wuuk' noq wilkiin panti' k'axik. 22 QaJaaw Dios noq wilkiin panti' k'axik, xnukapaaj chi numemil chi ma' naa ta chik kiin atoob'eem. Eh noq xnupahqaaj aweh chi naa kiin atob'eem xinab'iraj wo' chaloq. 23 Re' taq i hat santo laj aj nimaneel cha k'ax taq i QaJaaw ruum re' reh incha'jinik keh i korik wach kik'ux. Eh re' taqe i nimaq kiwach i ruyeew taqe chutojariik i kimahk nik' wach i ruk'ul chi keh. 24 Eh koowjoq taq ak'ux i hat, maa rub'an taq kiib' ak'ux, ruum ruuk' i QaJaaw Dios taq aye'em awánima.
