SALMOS 25

1WaJaaw nuDios, awuuk' i hat i nub'an nutiij. 2Hat nuDios, awuuk' i hat i nuyeew i nuk'ux. Ma' ta naq neenuk'uhtaaj nuk'ixb'ilaal. Reh chi ma' nee ta kinkikaqse'laaj i ki-ixowanik nuwach. 3Re' inkiyeew kik'ux awuuk', ma' jaruuj inaakik'uhtaam kik'ixb'ilaal. Re' taqe i ma' kinimanik ta aweh, ra'j naakik'uhtaam kik'ixb'ilaal re'. 4WaJaaw nuDios, cha k'uhtaaj weh chi korik aab'eeh. Eh cha k'uhtaaj weh inawaaj chi neenub'an. 5Chak'uhtaaj weh, eh chak'am nub'eeh chupaam i korik, ruum xa re' wo' hat i nuDios waj Ko'loom. Awuuk' i hat i nuyeew nuk'ux chi q'iij chi aq'ab'. 6WaJaaw nuDios, chayeew tii weh aak'axb'al. Chaketelaaj nuwach, je' wo' rukab' i na a'n wuuk'. 7Eh maank'ulik chik cho panak'ux taqe i numahk nub'anam, je' wo' taqe i yiib' wach na'ojb'al nub'anam panuk'ijolal. WaJaaw nuDios, maakinsahchik tii panak'ux, chaketelaaj nuwach ruuk' aak'axb'al. 8Re' QaJaaw Dios q'e' atoob', korik wach ruk'ux. Re' reh ink'uhtanik keh i aj mahk i korik laj b'eeh. 9I ruk'am kib'eeh i xama' nimaq ta kiwach. Irukoj kina'ojb'al reh chi neenkian i rub'ehel. 10Re' i rub'eeh i QaJaaw Dios jinaj ketelenik wachiis, jinaj k'axooj, korik chi keh i kinimanik reh i ruq'orom chi naa rub'anam, eh kinimanik reh i ruk'uhb'aal. 11WaJaaw nuDios, re' hin i nupahqaaj aweh chi nee ta tii nakuy i ruk'ihaal numahk, ruuk' aak'axb'al. 12Awach i ruyeew ruloq'il i QaJaaw Dios, re' wo' Dios naa ruk'uhtaniik reh i b'eeh naa ruk'amam. 13Eh naa ruye'em reh suq laj k'acharik, eh re' taqe riih rumaam naakehchaam i ye'aab' q'orooj cho rib'iral. 14Re' QaJaaw Dios wilik pan jinaj wach k'uxliis kuuk' i kiye'wik ruloq'il, eh i ruyeew keh chi naab'jik i ruyejaam cho wach chi naa rub'anam. 15Re' hin juneliik ruuk' i QaJaaw Dios nuye'em nuk'ux, ruum xa re' wo' reh neenko'linik weh chuwach ti' k'axik. 16QaJaaw Dios, kinawil tii. Chaketelaaj nuwach, ruum ma' awach ta intoob'inik weh ruuk' i ruti'kiil nuk'ux. 17Re' hin xa ruman i ruti'kiil i wánima i k'ahchi' rokiik. Jaaw, kinawesaj tii chupaam i ti' k'axik wilkiin wii'. 18Chawilow i rutz'irkiil nuwach, i ti' k'ahchi' nuk'ulum. Chakuy ta tii chu'nchel i numahk nub'anam. 19Jaaw, kinatoob'eej, ruum yohb'aal wach kik'ihaal taqe i ki-ixowanik nuwach xa kinkaaj chik kinkikansam. 20Chako'leej riij i nuk'achariik. Maayeew q'ab' chi neenkik'uhtaaj nuk'ixb'ilaal, ruum xa re' wo' hat ti ko'linik weh. 21Ruum ta naq i rukorkiil wach nuk'ux, eh chi ma' xta numahk, nee kinako'leej, ruum xa awuuk' wo' hat i nuyeew nuk'ux. 22Hat nuDios, i nupahqaaj otob'il aweh chi chako'leej i tinamit Israel ruuk' i ti' k'axik wilik wii'.

will be added

X\