SALMOS 20

1Neeta naq irib'iraj aatiij i QaJaaw Dios noq wilkaat chupaam i ti' k'axik. Re' ta wo' naq i ruDios i Jacob, neenko'linik aweh. 2Re' ta naq i Dios wilik parusantolaj Ye'aab' Sión, neentoob'inik aweh, eh neencha'jinik aweh. 3Eh nee ta naq ink'ulik cho paruk'ux i Dios chu'nchel alemóxna aye'em. Eh nee ta naq i ruk'ul aweh aamayiij inak'at wach artaal. 4Neeta naq i ruyeew chaaweh aha' wilik inawaaj. Eh nee ta naq inooj eloq wach chu'nchel ayejaam wach rub'aan. 5Wila' xooj eloq wach, ma' k'isiin ta nee nqaniinq'ijeej aako'ljiik. Neenqajosaj johtoq i rehtalil chuwach i QaJaaw Dios chi xat elik korik. Eh nee ta wo' naq i ruyeew chaaweh i reh i xapahqaaj reh. 6Re' hin xnunab'eej chi re' QaJaaw Dios i ruko'leej i reey rusik'im cho wach. Eh kopan taxaaj naa rib'iram chaloq i Dios i naa rupahqaam i reey. Eh ruuk' i rajaawriik naa ruko'leem chikiwach i aj ixowaal. 7Wilik taqe i re' kikareta inkitz'e' wacheej chi ko'lb'al kiib'. Eh wilik taqe i re' kikawayu inkitz'e'wacheej. Eh re' hoj xa re' wo' QaJaaw Dios inqatz'e'wacheej chi ko'lb'al qiib'. 8Re' taqe re' naa ruyojiik kik'ux, naa rub'aan keh. Eh re' hoj ma' xta naakooj kuchem, ma' jaruuj naa ruyojiik qak'ux. 9WaJaaw nuDios, chako'leej tii chaloq i reey, reh chi nee nelik korik. Eh nik' neetiqaq'oreej pan qatiij, nee ta tii qoh ab'iraj.

will be added

X\