SALMOS 17

1WaJaaw nuDios, chab'iraj tii weh i naa nupahqaam aweh ruuk' rub'ehel. Xti kinab'iraj tii weh i panutiij, ruum re' hin ma' awach tee nujot' ruuk' nuchii'. 2Kinako'leej chikiwach i tinamit, ruum re' hat aweht'al chi korik wach nuk'ux. 3Re' hat aweht'al chik paam i wánima, kink'ulik aawula'eej chaq'ab'. Eh xinanik'eej ruuk' i nunimaniik, ma' xtaj i yiib' wach xareq pan wánima. Eh ma' jino'q i yiib' wach q'orik i nelik panuchii'. 4Ruum chi k'ahchi' nunimam aak'uhb'aal, ma' nuk'am ta naah i yiib' wach na'ojb'al inki a'n i kib'anik i ti' k'axik. 5Re' hin k'ahchi' nuk'amam naah aab'eeh. Eh ma' naa ta chik nukanaam chi jumpech. 6WaJaaw nuDios, re' hat k'ahchi' kaat nuq'o'reem panutiij, ruum weht'al chi nee kinachaq'weej. Je' re' noq, chab'iraj tii i nuq'oral. 7Chaketelaaj tii nuwach ruuk' i runimaal aak'axb'al, ruum re' hat inako'leej taqe i awuuk' i hat inkisik' ko'lemb'al kiib', inako'leej taqe chikiwach i aj ixowan keh. 8QaJaaw Dios, kinako'leej tii, je'-oq kinko'ljik rutiyoxil i naq'awach cha a'n weh. Eh je'-oq ruuk' aaxiik' kinamoh-eej, 9Re' taqe i yiib' wach kina'ojb'al k'ahchi' kiin kik'sam chi ti' k'axik. Re' taqe i ki-ixowanik nuwach xa nkaaj chik kinkikansam. 10Re' taqe re' ma' xta ketelinik wachiis kuuk'. Xa nimaq chik kiwach inki a'n kiib' ruuk' i kiq'oral. 11Xak'ul chik kiooj chi nusik'ariik, xa kok' taq chik ma' kinkichop. Eh k'ahchi' kisik'im chi riij nik' wach noq naa kianam weh. 12Xa je' chik kikab' i kaq b'ahlam noq kinkaaj kiinkichopom, eh je' rukab' inki a'n i kok' rak'uun kaq b'ahlam noq inkuy-eej i kitiib' pan kijuul. 13WaJaaw nuDios, kinab'iraj tii, cha a'n keh yiib' wach kina'ojb'al, chawesaj i kajaawriik. Kinako'leej pan kiq'ab' ruuk' awajaawriik. 14WaJaaw nuDios, ruuk' awajaawriik kinako'leej chikiwach taqe i xa reh ayu' wach ak'al inki a'n Eh inkaaj chi nee kib'ehomrik korehtaal inkinujisaj kiib', je' chi kak'uun chi kixq'uun, chi kiih chi kimaam. 15Raaj i hin, ruum chi korik wach nuk'ux, naawilom awach ruuk' naq'nuwach. Eh ma' k'isiin ta naa rusuuqb'iik nuk'ux noq naawilom chi awuuk' chik wilkiin ar pan taxaaj.

will be added

X\