SALMOS 148

1Chaloq'ej taq i QaJaaw Dios i hat i wilkaat taq pantaxaj. Chayeew taq ruloq'il pan taxaaj. 2Chaloq'ej taq i QaJaaw Dios i hat, i hat ruánjel. Je' wo' taq i hat ruk'ihaal taq chaawiib' ruchopom taq anaah ar pan taxaaj. 3Chaloq'ej i QaJaaw Dios i hat q'iij, je' wo' hat poh. Chaloq'ej wo' taq i QaJaaw Dios hat ch'umiil i tisihq'inik taq. 4Chaloq'ej QaJaaw Dios i hat taxaaj, najt wilkaat chaloq, je' wo' hat ha' wilkaat pan taxaaj. 5Chaloq'ej taq i rub'ihnaal i QaJaaw Dios, ruum noq xuq'or i reh chi naa kikorjiik xi korjik wo' chu'nchel. 6Eh chu'nchel xuyeew taqe paruye'aab' reh juneliik. Eh aha' wilik i xuq'or keh ma' awach ta naa ruq'atwiik wach. 7Chaloq'ej taq i QaJaaw Dios i hat wach ak'al. Je' wo' taq i hat nimaq josq'laj chikop wilkaat taq pam palaw, eh i wilkaat taq pantaq jul. 8Eh chuloq'ej QaJaaw Dios i ruch'aab' i kahoq, i saq b'och, i mus jab', i raab' suutz'. Je' wo' hoq i kowlaj teew jab' i rub'an i q'orooj reh ruum i reh. 9Eh kiloq'ej i QaJaaw Dios taqe inajt naah yuuq', taqe i rub'ohl yuuq'. Je' wo' i chee' chakaltee', taqe i chee' kiwachinik, 10taqe i chikop xa ruuk' paat kiwihik, taqe i josq'laj chikop. Je' wo' taqe i chikop kirupinik, taqe i kijukem kiib' noq kib'ehik. 11Je' wo' taqe i reey wilkeeb' i wach ak'al, taqe chu'nchel i tinamit. Je' wo' taqe k'amal b'eeh, taqe i wilkeeb' chi ajaab'esil wach ak'al. 12Eh kiloq'ej i QaJaaw Dios taqe i tinamit chi winaq chi ixoq, chi nimaq, chi kok' taq. 13Chaloq'ej taq i rub'ihnaal i QaJaaw Dios, ruum xa re' wo' reh xiik' nah nimaal wach. Eh xiik' naah nimaal wach chinaah i wach ak'al, je' wo' pan taxaaj. 14Re' i QaJaaw Dios xye'wik ruloq'il i rutinamiit Israel. Xuyeew runimaal kiwach chu'nchel i santo laj raj nimaneel. Loq'imaj ta naq i QaJaaw Dios.

will be added

X\