SALMOS 147

1Loq'imaj ta naq i QaJaaw Dios. Xiik' naah holwochiil rutz'uyjiik wach. Ruum xa re' wo' reh i ruk'ul chi naa qaloq'em ruuk' suq kiil k'uxliis. 2Re' QaJaaw Dios naa wo' chik ruyejaam i Jerusaleem, naa wo' chik rumolom kiwach i aj Israel tukimaj kiwach. 3Re' reh i resaj i kiti'kiil taqe inyot'ik i kánima, eh iriq'omaj taqe ruuk' i kiti'kiil. 4Re' reh i rajlaaj taqe chu'nchel i ch'umiil, eh i ruq'or i kib'ihnaal chi ju'junaal. 5Xti xiik' wo' chik naah nimaal wach i QaJaaw Dios. Eh q'e' nim rajaawriik, xiik' naah loq'il taqe i runa'ojb'al. 6Re' QaJaaw Dios i ruyeew runimaal kiwach i xama' nimaq ta kiwach, eh i resaj chi jumpech i runimaal kiwach taqe i yiib' wach kina'ojb'al. 7Chatz'uyej taq wach i QaJaaw Dios, chi t'iosb'al reh i rotob'il. Chatz'uyej taq wach i qaDios ruuk' arpa. 8Ruum re' reh imb'urwik paam i taxaaj ruuk' i suutz'. Re' reh inyej-anik cho wach i jab' i ruyeew cho chinaah i wach ak'al. Re' reh ink'isanik reh i kok' ch'ahn wa taq yuuq'. 9Re' reh inketwik keh chikop, re' reh inketwik keh i kak'uun taqe i nimaq taq tz'ok, noq k'erlik kichii' chupahqaljiik kiwa'. 10Re' QaJaaw Dios ma' nsuuqb'ik ta ruk'ux ruuk' i kaansil i kawáyu, je' wo' ruuk' i kikowiil taqe i xa winaq. 11Insuuqb'ik la' ruk'ux i QaJaaw Dios kuuk' i kik'axwik reh. Eh inkiyeew kik'ux ruuk' chi naa ruketeljiik kiwach. 12Hat taq aj Jerusaleem chaloq'ej taq i QaJaaw Dios, hat taq aj Sión chaloq'ej taq aaDios. 13Re' reh inko'linik reh taq aatinamiit pan kiq'ab' i aj ixowaal. Re' reh intoob'inik taq aweh i wilkaat taq chupaam aatinamiit re' re'. 14Re' i Dios inye'wik i suq laj k'achariik chupaam taq aatinamiit. Eh i ruyeew taq chaaweh i chihooj laj trigo. 15Eh re' reh i rutaq'aaj chaloq i ruq'oral wach ak'al, eh chi jumehq'iil inooj rib'iral xa aha'. 16Eh i ruyeew i ha' chaaj chi xa je' chik saq lana. Eh ruum i reh i rupuhkaaj riib' i ha' chaaj, xa je' chik rukab' noq i rupuhkaaj riib' i pooq. 17Eh i ruyeew chaloq i chaaj chi je' ruwii' saq b'och, eh ruuk' i k'uxik i ruyeew i rujoot'isaj taqe ha' xa jot'ik chik paam. 18Noq i ruq'or chi naa kihab'ik i ha'chaj kitoyom naq kiib' kihab'ik wo' chik. Eh ruuk' i teew i ruyeew chaloq i rutoq'aa' b'ehik i rooq ha'. 19Re' QaJaaw Dios xuyeew chi naab'jik i ruk'uhb'aal reh i Jacob. Je' wo' keh i aj Israel taqe i ruq'or i ruk'uhb'aal. 20Re' QaJaaw Dios ma' je' ta re' i xub'an kuuk' chu'nchel i tinamit ma' xuyeew ta keh chi naab'jik taqe i ruq'or i ruk'uhb'aal. Loq'imaj ta naq i QaJaaw Dios.

will be added

X\