SALMOS 145

1Re' hin naa nuye'em i runimaal awach ruum hat nuDios, hat nuReey. Eh naa nuye'em runimaal wach chi juneliik aab'ihnaal. 2Raaj laal q'iij naa nuye'em runimaal awach, eh naa nuloq'em chi juneliik ab'ihnaal. 3Re' QaJaaw Dios xiik' naah nimaal wach, ruum aj re' ruk'ul chi naa ruye'ariik ruloq'il. Re' i runimaal wach ma' aha' ta chi je'. 4Eh chi tuut, chi ajaaw, chi-iih maam naakiye'wiik ruloq'il taqe akamaj. Eh naa kiq'orom chikiwach chi xiik' naah loq'il i a'nam taqe chaloq. 5Naa wo' ruq'orariik rib'iral i runimaal awach q'e' looq', re' hin naa nuq'orom rib'iral i nimaq kiwach na'ojb'al i na a'n. 6Re' tinamit naa kiq'orom rib'iral i xiik' naah yohb'alil kiwach a'nam chaloq. Eh re' hin naa nuq'orom rib'iral i runimaal awach. 7Naa wo' kiq'orom rib'iral aawotob'il xiik' naah nimaal wach, kow naa kiq'orom rib'iral chi re' hat korik wach ak'ux. 8Re' QaJaaw Dios q'e' atoob', eh aj keteloom wachiis, ma' jumehq'iil ta nchalik rujosq'iil ruum wilik ketelinik wachiis ruuk'. 9Re' QaJaaw Dios q'e' atoob' chu'nchel aj uuk', ruuk' q'unil i rucha'jeej taqe chu'nchel i ruyejaam chaloq. 10Eh nee ta naq tikiloq'ej chu'nchel ayejaam chaloq. Eh nee ta naq inkiyeew runimaal awach asantolaj aj nimaneel. 11Neeta naq inkiq'or rib'iral i runimaal aaloq'il. Eh nee ta naq inkiq'or rib'iral awajaawriik. 12Neeta naq inkiyeew chi naab'jik awajaawriik keh i tinamit. Je' wo' hoq i ruloq'il i runimaal awajaawriik. 13Re' runimaal awajaawriik naa ruwihiik chi juneliik. Eh naa awihiik chi taaq'anik chikinaah, i jar ch'iht chi k'achareel inaakik'iik. 14QaJaaw Dios, re' hat ti ye'wik rukowiil kik'ux taqe i rub'an kiib' kik'ux. Eh re' wo' hat titoob'inik keh i wilkeeb' panti' k'axik. 15Chu'nchel i k'achareel inkuy-eej aawotob'il reh chi nee nayeew i kiwa' kihaa' paruorahiil. 16Jaaw, chayeew tii keh ajwaal wach chi keh. Chayeew aawotob'il chikinaah taqe i k'achareel. 17Re' QaJaaw Dios korik wach ruk'ux ruuk' taqe i rub'an. Eh i ruketelaaj kiwach chu'nchel i ruyejaam chaloq. 18Re' QaJaaw Dios, ma' najt ta wilik kuuk' i kipahqanik reh i rotob'il. Re' taqe i korik wach kik'ux chupahqaljiik i rotob'il. 19Eh i ruyeew i ajwaal wach chi keh i kiyohlinik ree reh. Noq inkipahqaaj reh chi naa kitoob'jiik, ki-ib'irjik, kiko'ljik wo' hoq. 20Re' i QaJaaw Dios i ruko'leej taqe i kik'axwik reh. Eh i rusach kiwach taqe i yiib' wach kina'ojb'al. 21Neeta naq inuloq'ej ruuk' nuchii' i QaJaaw Dios. Chu'nchel ta naq neekiye'wik ruloq'il i rusantolaj b'ihnaal, je' yu'naak, je' chi juneliik.

will be added

X\