SALMOS 118

1Chaloq'ej taq i QaJaaw Dios ruum re' reh q'e' atoob'. Eh juneliik i ruketelaaj qawach. 2Eh nee ta naq inkiq'or aj Israel chi re' QaJaaw chi juneliik i ruketelaaj qawach. 3Neeta naq inkiq'or i riih i Aarón chi juneliik i ruketelaaj qawach. 4Nee ta naq inkiq'or i kiyohlinik reh i QaJaaw Dios chi juneliik ruketelaaj qawach. 5Re' hin noq ti' nuk'ux xnupahqaaj i rotob'il QaJaaw Dios. Eh re' reh xirib'iraj, xiresaj chupaam i ruti'kiil nuk'ux. 6Re' hin re' QaJaaw Dios intoob'inik weh, ruum aj re' ma' kinyo'jik ta ruum chib'ih jariik i neerub'an weh i xa winaq. 7Re' QaJaaw Dios wilik wuuk', re' reh naa rutoob'iniik weh. Reh chi naa nub'anam keh i ki-ixowanik nuwach. 8Xiik' naah chihojal chi ruuk' i QaJaaw Dios neenuyeew nuk'ux, chuwach chi ruuk' winaq neenuyeew nuk'ux. 9Xiik' naah chihojal chi ruuk' i QaJaaw Dios neenuyeew nuk'ux chuwach chi neenuyeew nuk'ux ruuk' i winaq nim wach. 10Re' hin chu'nchel naq i tinamit kikotej wiij chi naa kianam weh Eh nusach kiwach ruuk' rajaawriik i QaJaaw Dios. 11Eh k'ul xi okik chaloq reh i rub'anariik weh. Eh re' hin nusach kiwach ruuk' i rajaawriik i QaJaaw Dios. 12Eh xkimol cho kiib' chi nunaah xa kiqop chik ruum kik'aah, je' rukab' noq inkimol cho kiib' i k'ohlox. Eh jumehq'iil xnusach kiwach ruuk' i rajaawriik i QaJaaw Dios, xa je' kik'ahtik sohk'. 13Re' keh xti kow naq xi okik wuuk' re' naq inkaaj chi xkian weh, xa re' la', re' hin re' QaJaaw Dios xtoob'inik weh. 14Re' hin i nutz'uyej wach i QaJaaw Dios, inye'wik rukowiil nuk'ux, re' inko'linik weh. 15Eh pankipaat korik wach kik'ux inkik'er kichii' chi tz'uuy je' wili inkiq'or: Ruum i rajaawriik i QaJaaw Dios xoj elik korik. 16Re' rajaawriik i QaJaaw Dios ma' ha' ta chi je'. Ruum ruuk' i rajaawriik xqaq'at kiwach i ki-ixowanik qawach, inki taqe. 17Re' hin komajaa' ta naa nukimiik, konaa nuk'achariik. Konaa nuq'orom rib'iral i xub'an i QaJaaw Dios. 18Korik noq re' i QaJaaw Dios, xiruyeew panti' k'axik, xa re' la', ma' xinkikansaj taj. 19Chateh taq weh i ru puertahiil i rupaat i QaJaaw Dios, re' hin naawokiik ar chi loq'oonjiik i reh. 20Re' wili i ru puertahiil i rupaat i QaJaaw Dios, eh ar naa kokiik taqe i korik wach kik'ux. 21QaJaaw Dios, re' hin naa kaat nuloq'em ruum xayeew weh i xnupahqaaj aweh, eh xinako'leej. 22Re' ab'aj ma' xponik ta panaq'kiwach i aj yej-an paat, re' re' xkahnik chi rukowiil i rooq i paat. 23Re' wili xub'an QaJaaw Dios, xiik' naah nimaal wach chi qeh i hoj. 24Eh chupaam taqe q'iij wili xub'an i re' i QaJaaw Dios. Ruum aj re' q'e' suq qak'ux ma' ntz'irik ta qawach. 25QaJaaw Dios cha kuy qoh ako'leej tii. Jaaw cha kuy chayeew q'ab' qeh chi nee qoh elik korik. 26Neeta naq inye'arik ruloq'il ik'ulik iloq reh parub'ihnaal i QaJaaw Dios. Re' hoj inqayeew ruloq'il chupaam i rupaat i QaJaaw Dios. 27Re' QaJaaw Dios, xk'uhtanik qeh i saqum. Yu'naak chatik'aa' taq i ninq'iij chak'am taq reje amayiij, hiy taq chayeew pantaq rutz'u'kaal i artaal. 28WaJaaw hat nuDios, re' hin juneliik naa kaat nuloq'em, naa nuye'em runimaal awach. 29Chaloq'ej taq i QaJaaw Dios, ruum re' reh q'e' atoob', eh juneliik wilik ketelinik wachiis ruuk'.

will be added

X\