SALMOS 114

1Eh noq xi elik chaloq i aj Israel re' taqe rak'uun rixq'uun i Jacob ar Egipto, re' tokoom tinamit naq wilkeeb' cho wii'. 2Re' i QaJaaw Dios xwihik rajaawriik chikinaah i aj Israel. Eh pan tinamit Judá xkiyejaa' i rupaat. 3Eh noq xi ponik i aj Israel chi chii' i palaw xchiqik. Noq xi ponik chi chii' i nim ha' Jordán xpa'lojik i rooq. 4Re' taqe yuuq' k'ixkaab' xa je' chik kipisk'anik imas tentzun, je' kipisk'anik kok' tentzun. 5Raaj i hat palaw ¿Chib'ih reet noq xatchiqik noq xi-ik'ik i aj Israel? Raaj i hat nim ha' Jordán ¿Chib'ih reet noq xatpah-ik? 6Eh raaj taq i hat yuuq k'ixkaab', ¿Chib'ih reet noq xa je' taq chik tipisk'anik imas tentzun, eh je' taq tipisk'anik kok' tentzun? 7Re' QaJaaw, i ruDios i Jacob xiik' naah nimaal rajaawriik, ruum aj re' ink'uyu'jik paruye'aab' chu'nchel i wach ak'al chuwach. 8Re' i QaJaaw Dios xusutej chi raasb'al ha' i chiq yuuq'. Eh xutz'uhkrisaj chaloq i nim ha' chupaam i saq rehp ab'aj.

will be added

X\