SALMOS 113

1Loq'imaj ta naq i QaJaaw Dios. Re' taq i hat raj kamanoom, chayeew taq ruloq'il i rub'ihnaal. 2Eh nee ta naq inye'arik ruloq'il i rub'ihnaal i QaJaaw Dios, je' yu'naak, je' chi juneliik. 3Chu'nchel ta naq i tinamit neen ye'wik ruloq'il i QaJaaw, chi je' wilkeeb' parelb'aal q'iij, chi je' wilkeeb' parookb'aal q'iij. 4Re' QaJaaw Dios wilik rajaawriik chinaah chu'nchel i tinamit. Eh xiik' naah i ruloq'il ar pan taxaaj. 5Re' QaJaaw Dios wilik cho chi taaq'anik pan taxaaj, ma' awach ta chik jino'q chi je' rukab' i reh. 6Re' reh i ruloch' riib' chi rilariik i wach ak'al, je' wo' chi rilariik i pan taxaaj. 7Re' QaJaaw Dios i ruyeew runimaal kiwach i neb'aa', eh irutoob'eej taqe i ma' xta wilik keh. 8Reh chi rukoj taqe haa' chi kixilak i wilik kajaawriik, je' wo' chi kixilak i rutinamiit wilik kajaawriik. 9Eh re' ixoq ma' re' ta aj k'isoom i ruyeew rusuqkiil ruk'ux, ruum i ruyeew taqe rak'uun rixq'uun. Loq'imaj ta naq i QaJaaw Dios.

will be added

X\