SALMOS 109

1QaJaaw Dios, re' hin i nuyeew aloq'il, chayeew tii weh i nupahqaaj aweh. 2Re' taqe yiib' wach kina'ojb'al ma' k'isiin i chukuj q'orik inki a'n chi wiij. Eh re' inkiq'or chi wiij ma' korik ta wo' hoq. 3Eh xa re' i nu bajariik inki a'n xama' xta rub'ehel noq inki a'n i peleto wuuk'. 4Re' i kik'axariik i nub'an peleto chik inkiq'aj wii' wach weh. Eh re' hin xa tiij i nub'an chikiij. 5Eh re' otob'il i nub'an keh, ti' k'axik chik inki a'n weh chi jilow. Re' i kik'axarik i nub'an wixowjiik chik inki a'n chi riij. 6Eh chinaah i aj ixowaal re' re', nee ta naq inakoj jino'q i yiib' wach i runa'ojb'al chi q'ataj q'orik chinaah. 7Noq nee ruq'at i q'orik chinaah nee ta naq i ruq'or chi wilik ru mahk. Eh nee ta naq inye'arik chutojariik i ru mahk. 8Ma' ta naq najt neenk'acharik, tokoom ta chik neenchopwik naah taqe i chib'ih reh. 9Eh nee ta naq i ruq'eb' kahnoq i rehk'een, je' wo' taqe i rak'uun rixq'uun. 10Neeta naq kiooj i rak'uun rixq'uun chi' taq paat chupahqaljiik chib'ih inkaaj. Eh re' i kipaat nee ta naq inkahnik chi xan tz'irik chik paam. 11Eh re' ta naq taqe i aj kemeel neekik'amwik i chib'ih reh. Eh tokoom ta chik neemb'anik rusuqkiil i rukamaj. 12Ma' ta naq awach chik neen ketelinik wach i reh, je' wo' taqe i rak'uun rixq'uun naa ruq'eb'em kahnoq. 13Neeta naq inkuxik reje kikimiik taqe i rak'uun rixq'uun. Eh nee ta naq insahchik wach i kib'ihnaal chi jumpech. 14Eh eliik ta naq wilik paruk'ux i QaJaaw Dios taqe mahk rub'anam chaloq i kajaaw. Ma' ta neensahchik paruk'ux i QaJaaw i ru mahk kituut. 15Wilik ta naq paruk'ux i QaJaaw Dios i yiib' wach inki a'n Ma' ta naq chik neen q'orarik i kib'ihnaal chinaah i wach ak'al. 16Re' aj ixowaal re' re' ma' nik' ta xuketelaaj cho kiwach i k'axik wilkeeb' ruch'ihil taqe xama' nimaq ta kiwach inki a'n kiib', ruch'ihil taqe i ti' kik'ux. Xub'an la' k'axik keh korehtaal xukansaj taqe. 17Eh ruum chi xub'an i ti' k'axik keh i ras ruch'aaq' i reh, naa wo' rub'aan ti' k'axik ree reh. Eh ruum chi ma' xub'an taj i otob'il i reh, ma' naa ta wo' rub'aan otob'il ree reh. 18Re' ti' k'axik nee ruk'ul, nee ta naq nkahnik chi je' ruso'. Eh nee ta naq inokik chi je' ha' chi je' aseite chupaam i ruti'jolal, i rub'aqil. 19Xa re' ta naq chik i ti' k'axik nee ruk'ul, nee ta naq inkahnik chi je' ruso', eh nee ta naq inkahnik chi je' rusincho. 20QaJaaw Dios je' ta naq re' ruq'ajariik wach neena a'n keh i ki-ixowanik nuwach. Je' wo' taqe i ma' holohik ta kiq'orik chi wiij. 21Raaj i hat QaJaaw Dios, ruum chi q'e' tik'axwik kinatoob'eej tii. Eh kinako'leej panti' k'axik ruum q'e' hat aj keteloom wachiis. 22Ruum re' hin q'e' ti' wilkiin, q'e' ntz'irik nuwach, ma' k'isiin ta nyot'ik i wánima. 23Re' nuk'achariik k'ahchi' rusahchiik wach, xa je' nik'ik q'equm. Eh xa je' rukab' noq kik'amarik reje i chili'l ruum i teew. 24Eh ruum chi ma' nub'an ta chik nuwa' nuhaa', xakib'arb'otik chik i pan waa', eh xab'aaq chik. 25Noq inkilow nuwach i tinamit, hin kib'ajb'al inkik'uyu'saj i kinaah kinki kaq se'laaj chii naa rub'anam i re', inki taqe. 26WaJaaw hat nuDios, kinako'leej tii. Chaketelaaj nuwach. 27Reh chi re' taqe i ki-ixowanik nuwach neenkikoj rehtaal chi ruuk' awajaawriik xa a'n taqe re'. 28Re' hin weht'al chi re' hat naa atoob'iniik weh, re' keh neenchalik kik'ixiik ruuk' inki a'n Eh re' hin amoso neensuuqb'ik nuk'ux. 29Neeta naq insahchik kik'ux i ki-ixowanik nuwach. Eh nee ta naq inkik'uhtaaj kik'ixb'ilaal. Neeta naq inkojarik chi je' kib'urb'aal. 30Re' hin naa nut'iosem ruuk' nuchii' reh i Dios i rotob'il. Eh naa nuloq'em, chi kixilak i ruk'ihaal tinamit. 31Ruum re' reh imb'anik otob'il reh i ti' wilik, eh re' wo' reh inko'linik reh pan kiq'ab' i kikojwik ru mahk.

will be added

X\