1 QaJaaw Dios, re' hin nuye'em nuk'ux awuuk', naa nutz'uyem awach. Re' re' i q'e' looq' chi wee hin. 2 Re' hin naawik'raam wiib' noq naa rusaq'iik, naa nutz'uyem awach ruuk' i k'ahaam wach q'ooj, ruuk' i warpa. 3 Eh naa kaat nuloq'em chikiwach i tinamit QaJaaw Dios. Eh naa nuye'em runimaal awach ruuk' i nutz'uuy chikiwach chu'nchel i tinamit. 4 Ruum re' ketelinik wachiis i na a'n, imponik kopan taxaaj. Eh re' rukorkiil wach ak'ux, imponik kopan taxaaj. 5 QaJaaw Dios, nee ta naq nak'uhtaaj i runimaal awajaawriik ar pan taxaaj. Eh nee ta wo' naq inye'arik aloq'il chinaah chu'nchel i wach ak'al. 6 QaJaaw Dios, qoh ab'iraj tii. Eh qoh ako'leej ruuk' awajaawriik, chawisaj taqe cho panti' k'axik taqe i q'e' nak'ax. 7 Re' QaJaaw je' wili i ruq'or parusantolaj ye'aab': Re' hin naa rusuuqb'iik nuk'ux noq naa nuch'aqam i ye'aab' Siquem, noq naa nupajam i wach k'ixkaab' Sucot. 8 Re' ye'aab' Galaad, i Manasés, wehin taqe. Re' ye'aab' Efraín je' naa nupuneet wach i nunaah. Eh re' i ye'aab' Judá je' naa nukarote noq wilik. 9 Eh re' ye'aab' Moab je' jino'q johm ye'aab' tz'ajb'al q'ab'iis chi weh. Re' ye'aab' Edom, naa nuyeq'em pan wooq, naa rusuuqb'iik nuk'ux noq naa nuq'atam kiwach i aj filisteo, inki. 10 QaJaaw Dios ¿awach naa ruk'amwiik reje weh chupaam i tinamit kow riib'? ¿Awach naa ruk'amwiik reje weh ar Edom? 11 QaJaaw Dios ¿Mi xoj aq'eb' chi jumpech re'? ¿Mi ma' nee wo' naq chik i rub'an chi re' hat nee ti k'amwik reje qeh panq'aq'inik re'? 12 Eh qoh ako'leej pan kiq'ab' i ki-ixowanik qawach, ruum re' i ko'linik inki a'n i xa winaq xama' xta nokik wii'. 13 Re' QaJaaw Dios naa rutoob'iniik qeh, reh chi ma' xta nee qoh kuchej i ki-ixowanik qawach.
