SALMOS 107

1Chaloq'ej taq i QaJaaw Dios ruum re' reh xiik' naah i rotob'il. Eh q'e' aj keteloom wachiis chi juneliik. 2Eh nee ta naq inlooq'jik i QaJaaw kuum i xuko'leej taqe. Re' taqe i xuko'leej pan kiq'ab' inixowanik kiwach. 3Re' taqe i xumol cho kiwach chinaah i wach ak'al. Chi je' parelb'aal q'iij, chi je' parookb'aal q'iij, chi je' pantz'eet ree rookb'aal q'iij chi je' pansak'aaj ree rookb'aal i q'iij xi chalik. 4Eh xisahchik cho panchiq yuuq', ma' nkireq ta naq chik i kib'eeh. Eh ni xata naq inkireq jino'q i tinamit naakipatiniik. 5Xkikuy cho kiwa' kihaa'. Xa kimik naq chik keh. 6Eh noq ti' kik'ux xkipahqaaj i rotob'il i QaJaaw Dios xa re' chik i reh x-eesanik keh chupaam ti' k'axik. 7Eh re' xub'esaj taqe chaloq chupaam i korik laj b'eeh, reh chi xi chalik chupaam jinaj i tinamit xi patinik wii'. 8Chaloq'ej taq i QaJaaw Dios, ruum re' reh q'e' aj keteloom wachiis, eh i rub'an otob'il keh i tinamit. 9Ruum re' reh i ruket taqe i kimik keh ruum kiwa'. Eh irik'saj i kichiqchi'iil taqe i chiqiij kichii'. 10Re' keh panq'equm naq wilkeeb' xakimik naq chik keh ruum i ti' k'axik. Je' naq b'ak'alkeeb' chi karena, je' naq pantz'ilom wilkeeb'. 11Je' re' xkik'ul ruum xkiq'etwachej i QaJaaw Dios. Eh ma' xponik ta chikiwach i kik'uhb'aljiik xb'aan ruum i QaJaaw Dios wilik cho pan taxaaj. 12Re' i QaJaaw Dios, xuyeew taqe chutojariik i kimahk pankowlaj kamanik. Eh noq kiq'ehb'ik wach ak'al ma' awach ta chik imb'anik otob'il keh. 13Eh noq ti' i kik'ux xkipahqaaj i rotob'il i QaJaaw Dios, xa re' chik i reh x-eesanik keh chupaam. 14Xresaj taqe chaloq chupaam i q'equm aha' xakimik naq chik keh, eh xuchej kiwach. 15Chaloq'ej taq i QaJaaw Dios ruum re' reh q'e' aj keteloom wachiis. Eh i rub'an otob'il keh i tinamit. 16Xuxereb'eej i puerta re' ruuk' i q'an ch'ihch'. Xutoqib'eej i b'olob'aq ch'ihch' noq xuko'leej taqe i rutinamiit. 17Re' keh xa yowaab' naq chik taqe, xa ntz'irik naq chik kiwach ruum i kiyiib' wach na'ojb'al, ruum i kimahk. 18Eh xama' ruq'or ta naq chik kik'ux i wi'k. Ruum i re' xi ponik nah kimik. 19Eh noq ti' kik'ux xkipahqaaj i rotob'il i QaJaaw Dios, xa re' chik i reh x-eesanik keh chupaam ti' k'axik. 20Xa ruuk' i ruq'oral xuk'achrisaj taqe. Eh xuko'leej taqe chuwach i kimik. 21Je' re' noq chaloq'ej taq i QaJaaw Dios, ruum re' reh aj keteloom wachiis, eh i rub'an otob'il keh i tinamit. 22Chayeew taq amayiij chuwach i QaJaaw Dios, t'iosb'al reh i rotob'il. Eh ruuk' suq kiil k'uxliis cha q'or taq rib'iral taqe i rub'anam chaloq re' re'. 23Re' taqe yakool xa k'ahchi' keeb' chi b'ehik pan barco chinaah i palaw, inkikoj rehtaal chi korik nik' wach noq wilkeeb' taqe ha'. 24Eh noq inkilow i runimaal, i ruchamiil i palaw inkikoj rehtaal chi re' i QaJaaw Dios xyej-anik reh ruuk' i runimaal i rajaawriik. 25Ruum xa ruuk' i ruq'oral i QaJaaw Dios xwuktik chaloq i runimaal teew jab'. Eh yohb'aal wach taqe i rub'ohl i palaw i ruksaj. 26Eh re' ki barco xa nkutarik chik taxaaj, wilik pech noq inooj qohoq ri'si haa'. Re' keh xakib'arb'otik chik ruum kiyo'jiik. 27Eh xa kichelchotik chik kiq'ehb'ik xa je' chik taqe xohk'reel. Xa ma' keht'al ta chik inki a'n 28Eh noq ti' kik'ux xkipahqaaj i rotob'il i QaJaaw Dios, xa re' chik i reh x-eesanik keh chupaam ti' k'axik. 29Re' reh xusutej chi xa kok' musjab' i runimaal teew jab', eh xupab'aa' taqe i rub'ohl i palaw. 30Eh noq xkilow chi xipa'lojik taqe i rub'ohl i palaw xsuuqb'ik kik'ux. Xik'amarik reje ruum i Dios ko aha' impa'lojik wii' i barco. 31Chaloq'ej taq i QaJaaw Dios ruum re' reh q'e' aj keteloom wachiis. Eh i rub'an otob'il keh i tinamit. 32Chayeew taq runimaal wach i QaJaaw Dios noq naa taq amolom awiib'. Chaloq'ej taq noq neenkimol kiib' taqe i nimaq wach kikamaj. 33Re' QaJaaw Dios nim rajaawriik, ruum i ruchiqsaj taqe nim ha'. Eh i ruchiqsaj wo' taqe i raasb'al ha'. 34Eh i resaj iransil aak'al reh chi ma' nwachinik ta chik taqe i tik, ruum q'e' yiib' wach i kina'ojb'al i k'achareel wach ak'al. 35Re' QaJaaw Dios i rusutej chi nim ha' i ye'aab' chiq yuuq'. Eh re' i chiqiij pam aak'al i rusutej chi raasb'al ha'. 36Chupaam i ye'aab' re' re', i ruyeew taqe i ma' xta kiwa' kihaa'. Eh ar inkiyejaa' kitinamiit kiwihik wii'. 37Eh chupaam i ye'aab' re' re' inkitik chib'ih keh, inkitik ki uuva, eh ma' k'isiin tanwachinik. 38Kikuxeesjik ruum i QaJaaw Dios, ma' k'isiin ta ink'ihaaxb'ik taqe i kak'uun kixq'uun. Eh ink'ihaaxb'ik taqe i kichikoop. 39Noq imb'aan keh i ma' k'isa ti' k'axik kuum i aj ixowaal insuhb'ik wo' chik rooq i kik'ihaal, ruum wilik i kikimik. 40Eh re' QaJaaw Dios i rub'an ti' k'axik keh ma' raaj ta kiwach inixowanik kiwach i rutinamiit. Eh re' taqe i k'amal kib'eeh xusach kik'ux, xama' nkireq ta chik kib'eeh. 41Re' QaJaaw Dios i ruko'leej taqe i ti' wilkeeb'. Eh i ruk'ihaaxb'isaj i kak'uun kixq'uun. Je' rukab' noq kik'ihaaxb'iik taqe i tentzun. 42Eh noq inkilow chi je' re' taqe i korik wach kik'ux, insuuqb'ik kik'ux. Eh re' taqe yiib' wach kina'ojb'al intz'aplojik i kichii'. 43Awach i wilik runa'ojb'al nee rukoj rehtaal taqe wili. Eh nee rureq chi riij chi re' QaJaaw wilik ketelinik wachiis ruuk'.

will be added

X\