SALMOS 103

1Re' hin naa nuloq'em i QaJaaw Dios chu'nchel i wánima. Eh naa nuye'em ruloq'il i santo laj rub'ihnaal. 2Naa nuye'em ruloq'il i QaJaaw Dios chu'nchel i wánima ruum ma' jaruuj naa rusahchiik panuk'ux i rotob'il. 3Re' reh inkuywik chu'nchel i numahk, re' reh ink'aachrisanik weh ruuk' chu'nchel i nuti'kiil. 4Re' reh inko'linik weh chuwach i kimik, eh i ruyeew weh i rotob'il chi manlik, i ruketelaaj nuwach. 5Re' reh inye'wik weh i suq atoob', reh chi kinkahnik chi je' jino'q ak'un reh chi kinkahnik chi je' jino'q xihk ma' ahl ta ruti'jolal. 6Re' QaJaaw Dios parub'ehel i ruq'at i q'orik chikinaah i k'ahchi' rub'aan ti' k'axik keh. 7Eh xuk'uhtaaj wo' reh i Moisés chib'ih jariik taqe xub'an, xuk'uhtaaj i runimaal i rajaawriik keh i aj Israel. 8Re' QaJaaw Dios xa atoob' wach ruk'ux, eh q'e' aj keteloom wachiis. Re' reh ma' jumehq'iil ta nchalik rujosq'iil, ruum xiik' naah i ketelinik wachiis ruuk'. 9Ma' chu'nchel ta q'iij k'ahchi'kooj runaqam, eh ma' ruyeew ta paruk'ux i rujosq'iil. 10Ma' qohruyeew ta panti' k'axik je' naq rukab' i ruk'ul chi qeh, ruum q'e' hoj aj mahk. Eh xiik' naah yib'kiil wach i qana'ojb'al. 11Re' QaJaaw Dios xiik' naah i ruketeljiik kiwach i rub'an i kiyohlinik reh. Ma' xata je' najtiil ruuk' i wach ak'al i taxaaj i ruketeljiik kiwach i rub'an. 12Ruum re' qamahk xresaj reje chi qawach, nik' najtiil wilik ruuk' ireelb'aalq'iij i rookb'aal q'iij je' re' najtiil xukanaa' reje quuk' i qamahk. 13Re' QaJaaw Dios ma' k'isiin ta ruketelaaj kiwach i kiyohlinik reh, je' rukab' noq i ruketelaaj wach i rak'uun rixq'uun jino'q i aajaab'ees. 14Ruum re' reh reht'al noq xa hoj wo' tii tiwik, eh reht'al wo' hoq chi xa pooq i qayej-aal. 15Re' ruk'achariik i winaq xa reh junk'aam, xa je' rukab' i ch'ahn, xa je' rukab' i uhtz'ub' ink'er cho pantaq ab'iix. 16Eh inchalik i kowlaj teew chinaah, eh insahchik wach, ma' awach ta chik i naab'inik reh chib'ih inooj kuxoq wii'. 17Raaj i ketelinik wachiis i rub'an i QaJaaw Dios reh, wilik chi juneliik chi keh taqe i kiyohlinik reh, eh naa wo' rub'anam korik kuuk' i kiih kimaam. 18Je' wo' re' i naa rub'anam kuuk' taqe i kib'anik reh taqe i ruq'orom chaloq chi naa rub'aan. Je' wo' kuuk' taqe i kinimanik reh taqe i ruq'or i ruk'uhb'aal. 19Re' QaJaaw Dios ar wilik chi taaq'anik pan taxaaj. Eh re' reh wilik rajaawriik chikinaah chu'nchel i xa chib'ih jariik. 20Chayeew taq ruloq'il i QaJaaw Dios i hat ánjel wilik taq akowiil. Re' taq i hat i na a'n taq aha' wilik i ruq'or, eh i nayeew taq ak'ux chunimjiik. 21Chayeew taq ruloq'il i QaJaaw Dios chawunchelaal taq i hat i ruye'em taq awajaawriik chub'anariik taqe i rukamaj. Re' i tib'anik taq reh iraaj i reh. 22Eh chawunchelaal taq i hat i xatrutz'uhkrisaj taq, i QaJaaw Dios chayeew taq ruloq'il ko aha' pa' imponik i rajaawriik chi taaq'anik. Eh je' wo' hin naa wo' nuye'em ruloq'il i QaJaaw Dios chu'nchel i wánima.

will be added

X\