SALMOS 102

1QaJaaw Dios chab'iraj tii weh i nutiij. Chayeew tii weh i nupahqaaj aweh. 2Maa kinakanaa' chi wutkeel noq wilkiin panti' k'axik kinab'iraj la'. Eh kinatoob'eej chi jumehq'iil nik' neenupahqaaj aawotob'il. 3Ruum re' nuk'achariik k'ahchi' rusahchiik wach je' rukab' noq sahchik wach i sib'. Eh re' taqe nub'aqil je' cho k'ahchi' ruk'ahtiik pan q'aaq' noq inwik'raaj. 4Re' wánima xa nyot'ik chik xa je' chik rukab' i ch'ahn noq inchiqik. Eh ruum i re' xata chik i ruq'or nuk'ux i wi'k. 5Eh xa nub'aqil chik ruum i ma' k'isa oq'ik i nub'an ruum i ruti'kiil nuk'ux. 6Je' nukab' i ooloch' wilik chupaam i ye'aab' chiq yuuq', eh je' nukab' i tuhkur xa nokik meem. 7Eh xama' jaruuj chik inqajik i nuwiriik, xa je' chik nukab' jino'q i k'isa tz'ikin i ntz'irik wach nah paat. 8Re' taqe ki-ixowanik nuwach ma' jaruuj inkikanaa' nub'ajariik, ma' holohik ta kiq'orik chi wiij. 9Re' hin chaaj chik i nuk'ux chi jilow nuwa'. Eh re' nuhaa' inwuk'ej inq'ehb'ik chaloq i riis naq'nuwach chupaam. 10Ruum re' hat Jaaw xayeew aajosq'iil chi nunaah. Eh pampeet xayeew wajaawriik, eh yu'naak xawesaj i wajaawriik. 11Re' nuk'achariik k'ahchi' rusahchiik wach, je' rukab' noq inik'ik jino'q i muuj, eh je' rukab' noq inchiqik i ch'ahn. 12Eh re' hat QaJaaw Dios xa wilkaat wo' chi juneliik. Eh xanaa wo' ak'uliik pankik'ux jar ch'iht chi k'achareel i naakik'iik. 13QaJaaw Dios, qoh ab'iraj tii, chaketelaaj wach i tinamit Sión ruum xponik chik i ruq'ijil. Eh xponik chik i ru orahiil chi naa akuyum i kimahk. 14Re' taqe awaj kamanoom ma' k'isiin ta inkiketelaaj wach taqe ab'aj korjinaq wii' i kipaat, eh q'e' ti' inkik'raaj noq xiyojib'ik. 15Eh chu'nchel i tinamit naakiyohliniik wach i QaJaaw Dios, eh re' taqe reey wilkeeb' sut i wach ak'al naakiye'em ruloq'il. 16Na' chuyejaa' wo' chik cho ruka'peech i tinamit Sión, re' na' chuk'uhtaaj chee ruloq'il. 17Re' noq naa rib'irjiik i kitiij i ti' kik'ux, eh na' ye'aroq keh aha' wilik inkipahqaaj. 18Re' taqe wili ajwaal wach chi naa rutz'ihb'jiik kahnoq rehtalil. Reh chi neenkiloq'ej i QaJaaw Dios chu'nchel i tinamit naa kiwihiik koq'uun je' wo' hoq i komajaa' ki-aasjik. 19Re' QaJaaw Dios xrilow chaloq ko parusantolaj ye'aab' ar pan taxaaj i tinamit wach ak'al. 20Reh chi xutoob'eej taqe i ye'ooj panti' k'axik. Eh chuko'ljiik taqe i q'atooj chik q'orik chikinaah chi naa kikanteesjiik. 21Reh chi pan tinamit Sión, eh Jerusaleem neen q'orarik rib'iral, eh neenlooq'jik i rub'ihnaal i QaJaaw Dios. 22Re' noq chu'nchel i tinamit naakimolom kiib' chub'anariik aha' wilik iraaj i QaJaaw Dios. 23Eh re' reh xresaj inukowiil noq komajaa' hin rijib' xuqasaj rooq i nuk'achariik. 24Re' hin je' wili i xnuq'or: Jaaw hat nuDios maa kinakansa noq kore' yejaal i nuk'achariik. Ruum re' hat ma' xata ajlamaj haab' aak'achariik kinki reh. 25Re' hat xat ye'wik reh pan kiye'aab' chu'nchel i wach ak'al. Eh re' wo' hat xatyej-anik reh i taxaaj. 26Chu'nchel i re' naa rusahchiik kiwach, eh re' hat naa awihiik chi juneliik. Re' taqe re' naakiq'ahiik je' rukab' noq inq'ahik itz'ihy, xa je' injalarik itz'ihy neena a'n na' chajal kiwach. 27Re' hat xa re' wo' awach chi juneliik, ruum ma' xata ajlamaj haab' aak'achariik. 28Re' taqe i kiih kimaam awaj kamanoom naa atoob'eem taqe chi juneliik. Re' hat na awilwiik keh, re' hat naa awihiik kuuk'.

will be added

X\