SALMOS 10

1WaJaaw nuDios, ¿Chib'ih reet noq najt wilkaat wuuk', eh naakeb'aa' awiib' chi nuwach noq wilkiin panti' k'axik? 2Re' i yiib' wach runa'ojb'al, yohb'aal wach i rujosq'iil noq rujot' i neb'aa'. Xa re' la', xa re' wo' reh naa ruq'ehb'iik chupaam i ruyejaam wach. 3Re' i yiib' wach runa'ojb'al, yohb'aal wach i rub'an riib' ruuk' i ruk'ax wach rub'aan. Eh ruum i ruk'axariik wach i xa chib'ih jariik i rixowaaj wach i QaJaaw Dios. 4Re' yiib' wach runa'ojb'al xa runimb'isaj chik riib'. Ma' rukapaaj ta rusik'ariik i Dios, ma' xta Dios parukapeb'aal. 5Eh xa re' i yiib' wach na'ojb'al i rub'an, ma' runimaj taj chi re' hat tib'anik i q'ataj q'orik. Eh chu'nchel i ma' naajwanik ta wach, i ruq'eb' taqe chi riij ruk'ux. 6Eh i ruq'or paránima chi ma' jaruuj naa ruq'ehb'iik, eh chi ma' jaruuj naa ruwihiik ruk'axkiil. 7Re' reh xa re' i ma' tob'laj q'orik i nelik cho panchii', chukuj q'orik, b'ajooj taqe. Xa re' i ti'laj q'orik i ruq'or, ma' holohik ta k'isinoq inq'orik. 8Xa rusik' chik ruye'aab', xa panke'lik i rukansaj taqe i ma' xta kimahk patim taqe panab'iix. Eh ma' ruketelaaj ta kiwach i ma' kichol ta ruko'ljiik kiib'. 9Re' reh i rub'an je' rukab' i rub'an i kaq b'ahlam, i rukeb'aa' riib' chi ruchopariik awach iraaj ruchopom. Eh noq ki-ik'ik chuwach, i rukut riib' chinaah inkahnik pan q'ab'. 10Re' reh xa rupach'aa' chik riib' noq i rutik'aa' jot'ooj. Eh ma' k'isiin taqe i ma' nkian ta ruko'ljiik kiib' kiq'ehb'ik pan q'ab'. 11Eh i rukapaaj chi re' Dios sahchinaq taqe paruk'ux, eh chi ma' rilom ta taqe ma' inki a'n ta ruko'ljiik kiib'. 12WaJaaw nuDios, chayeew aq'ab' chikinaah i ti' wilkeeb'. Mansahchik taqe panak'ux. 13WaJaaw nuDios, ¿Chib'ih reet noq xa ti rukaqse'laaj i yiib' wach runa'ojb'al? Irukapaaj i reh chi ma' jaruuj q'iij naa apahqaam reh chib'ih i xub'an. 14Re' hat inawilow i rub'an, re' hat nee ti ye'wik jilow reh. Ruum xa re' wo' hat neetiko'linik keh i ma' nkian ta ruko'ljiik kiib', je' wo' taqe i ma' xta kituut kajaaw. 15Chawesaj i rajaawriik imb'anik reh i yiib' wach na'ojb'al. Chayeew chutojariik i ru mahk, korehtaal i rutoj wach chu'nchel i rub'an. 16Re' QaJaaw Dios, Reey chi juneliik, re' i ma' kinimanik ta reh naa resam taqe reje chi kixilak i rutinamiit. 17WaJaaw nuDios, re' hat inab'iraj i kitiij i ma' nimaq ta kiwach, eh i nayeew keh inkipahqaaj aweh. Eh nayeew rukowiil kik'ux. 18Eh chatoob'eej taqe i ma' xta kituut kajaaw, je' wo' taqe i k'ahchi' kik'teesjiik chi ti' k'axik, reh chi re' yiib' wach runa'ojb'al nee rukanaa' i jot'ooj, ruum xa winaq wo' hoq.

will be added

X\