PROVERBIOS 9

1Re' holohik runa'ojb'al xuyejaa' i rupaat, eh xuxoyej ruuk' wuquub' chi ruch'itil. 2Eh xukansaj taqe i ruchikoop reh i ninq'ijinik, xusik' wach i riis uuva xuyeew wach rumexa. 3Eh xutaq'aaj taqe reje i raj pooh ixoq chinaah i ye'aab' najt naah wilik pan tinamit. Ar xkik'er reje kichii'. 4Je' wili i xkiq'or: Kim taq k'ijolaq, i komajaa' taq inareq chi riij i na a'n, je' wo' taq i hat i ma' xta taq ana'ojb'al. 5K'oloq taq ak'ux aweh i nukaxlanwi'k k'oloq taq awuk'ej aweh i sik'oj wach riis uuva xnuyejaa'. 6Chareq taq ana'ojb'al, reh chi neenareq taq i suq laj k'acharik. Eh reh chi nee taq inareq chi riij i holohik chi naab'jik. 7Wila' xaq'il taqe i ma' holohik ta kib'anik, wila' xaq'il taqe i yiib' wach kina'ojb'al, xa re' ab'ajariik neenkian, xaruti'kiil ak'ux ineenkiyeew. 8Maaq'il i ma' holohik tamb'anik, reh chi ma' nee ta rixowaaj awach. Re' la' holohik runa'ojb'al chaq'il, re' reh neetiruk'ax. 9Chaq'il i holohik runa'ojb'al reh chi neerureq ruman i runa'ojb'al. Chatijej i korik wach ruk'ux reh chi neerureq ruman i rukorkiil wach ruk'ux. 10Re' raa' ri'sil i holohik laj na'ojb'al re' i ruyohljiik i QaJaaw Dios. Eh re' i holohik chi naab'jik inkan xa ruum i runaab'jiik wach i Dios wilik ruSantohiil. 11Eh xa ruum i holohik laj na'ojb'al najt naa ak'achariik, naa rutiqariik naah jarub'-oq haab' aak'achariik. 12Wila' holohik ana'ojb'al, re' wo' hat naa ab'aniik rusuqkiil. Eh wila' yiib' wach ana'ojb'al, re' wo' hat naa atojwiik wach. 13Re' ixoq ma' nimanik taj, xa re' i tukinik wachiis i rub'an ma' xta runa'ojb'al. 14Eh i rutzunaa' riib' paruxiila chi chii' taqe i ru puertahiil i rupaat, wilik chupaam i ye'aab' najt naah, wilik chupaam i tinamit. 15Ar i ruyuq'eej taqe reje i ki-ik'ik pamb'eeh, re' taqe i chupaam wo' naq i holohik b'eeh ojik inki a'n 16Je' wili i ruq'or reje keh: Kim taq i hat i komajaa' taq inareq chi riij i na a'n. Je' wo' taq i hat i ma' xta taq ana'ojb'al. 17Qelq'aaj qiib', ruum re' ha' xa elq'amaj, q'e' suq chi uuk'jik. Eh re' kaxlanwi'k ink'uxarik chi q'eeqmaal q'e' suq chi k'uxarik, inki. 18Xanaah re', re' taqe re' ma' nkikoj ta rehtaal chi re' i kiyuq'ub'jiik imb'aan ti' k'axik i ruk'am choo keh. Eh pankimik kik'amariik ruum.

will be added

X\