PROVERBIOS 6

1Hat wak'uun noq wilkaat, wila' xooj ayeew aq'oral chi riij jino'q nenooj rub'an ruk'aas, 2ruum chi xponik ayeew aq'oral xa re' hat nenooj asik' ak'axkiil. Eh xa ruum taqe i neenaq'or nee tiooj qehb'oq pantz'ilom. 3Hat wak'uun noq wilkaat, wila' xatq'ehb'ik ruuk' i re'. Hiy cha yejaa' ruuk' awamigo, chaloch' awiib' chuwach, reh chi ma' nee ta tikiyeew chutojariik i k'aas re' re'. 4Chayejaa' chi jumehq'iil, maawuy-eej nik'-oq najtiil, matokik chi wirik. 5Chawesaj awiib' chupaam je' rukab' noq i nelik i keej chuwach inpuhb'anik reh. Je' rukab' noq i nelik i tz'ikin chuwach i xirob'. 6Re' hat, i q'e' hat sikiil chakoj rehtaal i rub'an i sinik, cha tijej aweh i rub'an. 7Re' reh ma' awach ta ntaaq'anik reh ma' awach ta nq'orik reh chib'ih i naa rub'anam. 8Xa paruk'ux la' inchalik chi rumol wach i ruwa' pan siq'jil, re' noq kiwachinik taqe i tik. 9Re' hat i q'e' hat sikiil manlik i wirik xa a'n Chawik'raaj awiib' wukteen 10Wila' re' hat ma' xakanaa' i wirik, wi xat okik chi hi'lik, wi xaq'ahcheej aaq'ab' chi ak'ux, 11ma' k'isa neb'a'il i naa ruchaliik cha naah, ma' naa ta chik akuyum ransil noq naa kaat ruchopom. 12Re' i yiib' wach runa'ojb'al, ma' holohik ta imb'anik, xa re' taqe i chukuj q'orik i rub'an. 13Re' reh xa rumutz'muteej chik inaq'wach, xa rujuk' chik i rooq, i ruk'uhtaaj reje ruuk' i ju' q'ab' i ma' holohik taj. 14Eh ma' holohik taj i wilik paránima, xa re' i yiib' wach i rukapaaj rub'aan, xa re' sik'ij peleto iraaj. 15Ruum i re' chi jumehq'iil naa ruchaliik i ti' k'axik chinaah. Xa re' yu' naa rukahniik chi ma' xta chik kamaj. Eh ma' xata chik riq'omal naa rajwaam. 16Eh waqiib', eh imponik wuquub' taqe yiib' wach na'ojb'al ma' imponik ta chuwach i QaJaaw Dios, re' taqe wili: 17Re' niimb'isanik wachiis, re' taqe chukuj q'orik, re' taqe i kikanteesjik i ma' xta kimahk. 18Re' taqe i ma' holohik taj inkapeb'jik cho rub'aan pan ánima, eh re' ye'ej k'uxliis chub'anariik i yiib' wach na'ojb'al. 19Re' ojik chuq'orariik i ma' korik ta wo' hoq, re' tikij peleto kuuk' taqe hermano. 20Hat wak'uun noq wilkaat chamol taqe panawánima aak'uhb'aaljiik, aatijiik inki a'n atuut aawajaaw. 21Eliik-oq wilik taqe panawánima, eliik-oq taqe ab'ak'am chawalaq. 22Re' taqe re' naa ruk'amwiik ab'eeh, re' taqe re' naa ruko'liniik aweh panawiriik, re' taqe re' naa rukojwiik ana'ojb'al noq ma' wirik ta na a'n. 23Re' taqe k'uhb'aal, re' taqe atijiik imb'aan je' rukab' i saqumb'al insihq'inik. Eh re' taqe aq'ilariik, taqe aak'uhb'aaljiik imb'aan, re' re' ink'amwik aweh chupaam i holohik laj k'acharik. 24Eh naa kaat ruko'leem pan q'ab' k'oyoom laj ixoq, yiib' wach i runa'ojb'al, xa holohik chik inq'orik i rub'an riib'. 25Maruyot' inche ak'ux i ruholwochiil eh maak'ax inche wach, ruum xa holohik chik inilwik 26Re' k'oyoom laj ixoq reh, manlik reh i junriim chi wi'k. Eh re' ixoq inch'aqwik wach kaxáro intohq'ik ruyojom i ruk'achariik i winaq. 27Awach i xujil i koq i q'aaq' chi' ruk'ux nee wo' ink'ahtik i ruso'. 28Awach i xb'ehik chinaah inaq'wach q'aaq' chi ma' xta ruxijab' nee wo' ink'ahtik i rooq. 29Je' wo' re' nee ruk'ul, awach i neeruq'uch i rehk'een i ras ruchaaq', ma' jaruuj neenelik korik. 30Re' ajileq' ma' ajwaal ta wach atoob' ta ruum i runuhmiik xub'an i leq'. 31Eh wila' xkan chi i leq' wuquub' chik chi je' k'ihaal i xrelq'aaj i nee ruyeew chi jilow. Atoob' ta nee ruyeew chi jilow chu'nchel i chib'ih reh. 32Re' i q'uchul rehk'een i ras ruchaaq, ma' xta runa'ojb'al. Awach imb'anik reh i je' re' xa re' reh k'ahchi' ruye'em riib' panti' k'axik. 33Re' reh naa rub'aan ti' k'axik reh, naa ruk'uhtjiik ruk'ixb'ilaal. Eh ma' jaruuj naa rik'iik pank'uxliis i rub'an, 34ruum re' winaq xuq'uch i rehk'een yohb'aal wach i ruk'aah, ma' naa ta rukuyariik ru mahk ruum, korehtaal inq'ajarik wach reh i xub'an. 35Eh nee ta ruq'unej wach i winaq re' re', xama' nee ta wo' chik i ruk'ulaa'. Atoob' ta naq neensijiik ruk'ihaal-oq chib'ih reh.

will be added

X\