PROVERBIOS 5

1Hat wak'uun noq wilkaat chak'am naah i nu holohik laj na'ojb'al i hin. Eh chayeew axikin chi rib'iirjiik taqe i nuna'ojb'al, 2reh chi neenareq chi riij chib'ih i neena a'n. Eh neenakapaaj riij chib'ih i neenaq'or. 3Re' k'oyoom laj ixoq xasuq chik inq'orik, xa je' chik ki'iil riis kaab', re' ruq'oral xa ch'ub'ik chik xa je' chik ch'ub' kiil aseite. 4Eh noq inooj kuxoq, xa je' chik rukab' i riis ch'ahn xiik' naah k'ahiil. Je' ti'kiil i ruyok' i ch'ihch' k'ul q'as i rub'an. 5Re' rutahqaljiik i k'oyoom laj ixoq pankimik ink'amwik, eh re' re' ink'amwik reje nah kamnaq noq inooj kuxoq. 6Re' reh ma' xta raaj reh i rub'eeh i holohik laj k'acharik. Eh ma' rukoj ta rehtaal chi ma' holohik taj i k'ahchi' rojiik wii'. 7Hat wak'uun noq wilkaat, xti chab'iraj i nuq'or aweh, maaq'eb' chi riij ak'ux aatijiik i nub'an. 8Maayeew q'ab' chi nee tirujot' i k'oyoom laj ixoq, ni xata naq neenakapaaj ojik chi riij parupaat, 9reh chi ma' nee ta nayeew aaloq'il reh tokoom, eh ma' nee ta nayeew awansil, keh i ma' keht'al ta rukorkiil, 10reh chi ma' tokoom ta neemb'anik rusuqkiil inareq ruuk' awansil, inareq ruuk' aakamaj. 11Eh wila' ma' xatnimanik naa awoq'iim, noq naa awik'raam chi q'uun q'uun naa rojiik rujot'om riib' aati'jolal. 12Kore' naq chik naa aq'orom chi je' wili: Chib'ih inche reet noq ma' xnunimaj i nutiijiik xb'aan. Chib'ih inche reet noq ma' xponik ta panaq' nuwach taqe i nuq'ilariik xb'aan. 13Ma' xwaaj ta' nche b'iram i xkiq'or taqe i xitijinik weh. Eh ma' xwaaj ta' nche nuk'amam naah i xinkitijej wii'. 14Eh ma' k'isiin ta ti'kiil wilkiin chi kixilak chu'nchel i tinamit, tiko'q naq chik. 15Chach'ikaa' ak'ux ruuk' awehk'een wilik panapaat. Re' reh je' rukab' i ahaa' inik'sanik chiq chi'iil. 16Xa ruuk' wo' reh naa ruwihiik aha' lak'uun. Re' hat ma' xata aha' naa aq'eb'em aha' lak'uun je' rukab' noq inchihkik i ha' pantaq b'eeh. 17Re' aha'lak'uun aweh taqe chi manlik, ma' ruyeew ta riib' chi nee nayeew taqe chi re' chi ma' re' ruuk' jino'q i tokoom. 18Re' taqe aha'lak'uun ruuk' awehk'een xa a'n wii' kaxáro pan awak'uniil q'e' taqe looq'. Ruum aj re' cha a'n rusuqkiil i k'acharik ruuk'. 19Looq'-oq aweh awehk'een, ruum q'e' holohik, cha k'ax, ruum xa eliik i ruyeew rusuqkiil ak'ux. Eh xa eliik ti ruk'ax chi manlik. 20Hat wak'uun noq wilkaat: ¿Chib'ih reet noq inayoj aak'achariik xa ruum i k'oyoom laj ixoq? ¿Chih kamaj aweh chi neenaq'ahcheej i tokoom ixoq? 21Re' QaJaaw Dios reht'al nik' wach i runa'ojb'al i winaq. Eh k'ahchi' rilom chib'ih taqe jariik i rub'an, i ruq'or. 22Re' yiib' wach runa'ojb'al re' taqe i ma' holohik taj i rub'an, inye'wik reh pan k'axik. Re' taqe ru mahk intukinik wach reh i ruk'achariik, 23ruum chi ma' xunimaj taj i rutijiik, naa ruk'amam riib' pankimik. Eh ruum chi xub'an iraaj i reh, xuq'eb' riib'.

will be added

X\