PROVERBIOS 30

1Re' taqe xuq'or i Agur, rak'uun i Jaqué, eh Masa b'ih i rutuut. Re' Agur xuq'oreej i Itiel ruch'ihil i Ucal, je' wili xuq'or keh: 2Re' hin xti korik chi xiik' naah numemil, ni xata naq wilik nuna'ojb'al, je' rukab' i kina'ojb'al i winaq. 3Re' hin ma' nutijem ta nuna'ojb'al, ni xata naq weht'al nik' wach noq wilik, i wilik rusantohiil. 4¿Awach i xponik pan taxaaj xqajik wo' chik chaloq? ¿Awach i neerub'an rupa'ab'jiik i teew xa ruuk' q'ab'? ¿Awach i neerub'an rub'urariik naah i palaw xa ruuk' i rub'urb'aal? ¿Awach xye'wik paruye'aab' i wach ak'al? Wila' aweht'al cha q'or weh chih b'ih, eh chih b'ih i rak'uun. 5Re' QaJaaw Dios i ruko'leej taqe inkiyeew kik'ux ruuk'. Eh chu'nchel ruq'oral saq wach. 6Eh maatiq naah taqe i ruq'oral reh chi ma' nee ta tiruq'il chi kow, eh ma' nee ta ti kahnik chi chukul q'orik chuwach. 7QaJaaw Dios, re' hin xakiib' i nupahqaaj aweh, inwaaj chi nee nayeew weh noq komajaa' kinkimik, re' taqe wili: 8Re' chi chawesaj i chi nuwach ma' korik taj i chukuj q'orik. Eh chi maayeew weh i b'ehomal, ni xata re' neb'a'il, xa re' la', chayeew weh i nuwa' nuhaa' rajlaal i q'iij, 9ruum wi xqohxanik i chib'ih weh, nee-oq i nuq'or chi ma' weht'al ta wach. Eh mi ma' chih wilik weh nee-oq inutoq'aa' i leq', chi je' re' neenuyeew chi b'ajarik i loq'laj ab'ihnaal. 10Maakoj i koq ru mahk chuwach i rupatroon i minooj pankowlaj kamanik, ruum neerupahqaaj i ti' k'axik cha naah, eh nee wo' nak'ul. 11Wilik taqe i ma' holohik ta k'isinoq kiq'orik chi riij i kituut kajaaw. 12Wilik taqe i xasaq chik wach i kánima inki a'n kiib', xanaah re' xakomajaa' ta wo' inkesaj i ruch'uwa'iil wach i kánima. 13Wilik taqe i nimaq kiwach inki a'n kiib'. Eh ma' imponik ta panaq'kiwach i kas kichaaq'. 14Wilik taqe i xa je' chik q'aslaj ch'ihch' i rukaa' keeh, xa je' chik q'as ju' ch'ihch' i wach keeh, ruum inkaaj kisacham wach i chib'ih keh i neb'aa' wilkeeb' panqatinamiit. 15Re' keh je' kikab' i chikop intz'ub'inik kik' ki'ib' i rixq'uun wilik, xa chaloq i xa chib'ih jariik inkiq'or, je' kikab' i kijib' chi xa chib'ih jariik ma' jaruuj kinuujik. 16Re' taqe wili: Re' i kijuleel kamnaq, re' iixoq ma' nwihik ta ruha'lak'uun, re' i chiqiij laj ak'al ma' manlooj ta reh i ha', re' q'aaq' i ma' i manlojik ta reh i ruk'at. 17Awach i ma' suq ta rilariik i rajaaw i rub'an, eh noq rijib' chik i rutuut, ma' imponik ta panaq'wach. Re' re' i ruk'ul naq chi neenehteesjik inaq'wach ruum i nimaq taq tz'ok, oon chi neen k'uxarik ruum i xihk. 18Re' hin kijib' wach i na'ojb'al insahchik nuk'ux inki a'n eh ma' nureq ta chi riij. 19Re' taqe wili: Re' chi nik' wach noq inrupinik i xihk pan taxaaj, re' chi nik' wach noq imb'ehik i aaq' panab'aj, re' chi nik' wach noq imb'ehik i barco chinaah i palaw, re' chi nik' wach noq inokrik i winaq chi riij iixoq. 20Re' k'oyoom laj ixoq noq rub'anam chik i mahk xa ruyejaa' chik riib', eh xti ruq'or i korik chi ma' xtaj i yiib' wach xub'an. 21Kijib' b'uhr wach i tinamit xti ma' nkuyjik taj i kina'ojb'al, inkiyeew panyohb'aal i tinamit. 22Re' taqe wili: Re' noq inkahnik chi reey i xa minooj pankowlaj kamanik, re' noq inqohxanik i ruwa' ruhaa' i xa meem tii wach. 23Re' chi rureq rub'ahiil iixoq ma' ajwaal ta wach, re' chi re' ixoq xa aj poh noq inkahnik chi jilow i rupatroon ixoq. 24Kijib' b'uhr kiwach taqe kok' chikop wilkeeb' wach ak'al q'e' wilik kina'ojb'al chikiwach i tinamit wilik kina'ojb'al. 25Re' taqe wili: Re' taqe i sinik xiik' naah kik'ihaal atoob' ta ma' chih kaansil, inkimol wach i kiwa' pan siq'jil. 26Re' taqe i k'ih laj imul inki a'n ruyejeb'jiik i kisuuq' chupaam taqe i ruhopil ab'aj. 27Re' taqe i nimaq chili'l atoob' ta ma' xta kireey, xa tuslik la' chik kiwach noq kirupinik reje pan taxaaj. 28Re' taqe i tohlook ma' re' ta nkiwii' chi q'e' kok' taq, i rub'an chi nchoparik kipaam, eh kiokik chupaam i kiye'aab' taqe i reey. 29Kijib' taqe i q'e' kow kiib', ti yo'joq kuum noq kib'ehik. 30Re' taqe wili: Re' i kaq b'ahlam xa re' wo' reh yohb'aal wach josq'iil chuwach taqe i chikop, eh ma' rumol ta chi elik. 31Re' imas kixlaan xakow chik i rub'an riib', re' imas kaprax, eh re' i reey inooj chi peet b'eeh chuwach taqe i ru soldado. 32Wila' xa pamemil aye'em runimaal awach, wila' wilik i ma' holohik taj ayejaam wach xti cha kapaaj riij chi korik. 33Eh wila' re' hat xapuq' paam i lecha nee wo' inawesaj i mantekilla. Eh wila' xaq'oj aaju' nee nelik cho rukik'eel. Eh wila' awach i xutik ruk'aah nee namin awiib' pan peleto, ruuk' inki.

will be added

X\