PROVERBIOS 29

1Awach i rukoowb'isaj i naah noq inq'ilarik, jumehq'iil naa rojiik sahchoq wach. Ma' xata chik riq'omal i naa rajwaam. 2Noq wilkeeb' chi taaq'anik i korik wach kik'ux, insuuqb'ik kik'ux i tinamit. Eh noq wilkeeb' chi taaq'anik i yiib' wach kina'ojb'al, intiib'ik kik'ux i tinamit. 3Re' ak'uunb'ees wilik runa'ojb'al, i ruyeew rusuqkiil ruk'ux i rajaaw. Eh re' i xa re' i wihik kuuk'k'oyoom laj ixoq iraaj, naa rusacham wach i chib'ih reh. 4Re' reey re' i rub'ehel i rub'an, i ruyejaa' i rutinamiit. Eh re' i reey xa re' i tooj i rupahqaaj, i ruyeew panti' i rutinamiit. 5Awach q'e' ruyeew runimaal wach i ramigo xti korik noq xa je' naa xirob' i k'ahchi' rukojom parub'eeh. 6Re' xirob' i rukoj parub'eeh i yiib' wach runa'ojb'al re' taqe i ru mahk. Eh re' korik wach ruk'ux naa ruk'achariik pansuqkiil. 7Re' i korik wach ruk'ux i rutoob'eej i neb'aa' ruuk' i ruk'axkiil. Eh re' i yiib' wach runa'ojb'al ma' xta raaj reh i neb'aa'. 8Re' taqe tuken wachiis inkuhtisaj wach i ruk'aah i tinamit. Eh re' taqe i wilik kina'ojb'al kichol rujot'eesjiik wach i k'aah. 9Re' i wilik runa'ojb'al i rutik'aa' peleto ruuk' i ma' nimanik taj, ruk'uhtaaj ruk'ixb'ilaal. 10Re' taqe i kansan kas kichaaq' inkixow wach i holohik kina'ojb'al. Eh re' taqe i korik wach kik'ux inkisik' rusuqkiil kik'ux. 11Re' i ma' nimanik taj, xa re' josq'iil i rub'an. Eh re' i wilik runa'ojb'al reh, i rub'an ruq'ilariik riib'. 12Re' i wilik chi ajaab'ees i runimaj taqe i chukuj q'orik, chu'nchel i kikamanik ruuk' kikahnik chi yiib' wach i kina'ojb'al. 13Re' neb'aa' ruch'ihil imb'anik ti' k'axik reh jinaj kiwach, ruum re' wo' i QaJaaw Dios inye'wik rusaqumaal inaq'kiwach kikab'cheel. 14Re' i reey parub'ehel intaaq'anik chikinaah taqe neb'aa' naa ruwihiik chi taaq'anik chi juneliik. 15Re' ak'uunb'ees ruuk' tz'uhuum naa ruq'ilariik. Eh re' ak'uunb'ees ma' ntiijik taj, i ruk'uhtaaj ruk'ixb'ilaal i rutuut. 16Noq k'ih chik i yiib' wach kina'ojb'al, inuhtik wach i mahk. Eh, re' i korik wach kik'ux naakilom chi ma' naa ta keliik korik taqe re'. 17Chatijej aawak'uun reh chi nee ruyeew rusuqkiil ak'ux, eh neemponik chawach taqe i neerub'an. 18Noq ma' re' tee Dios ink'amwik rub'eeh i tinamit ma' suq taj i ruk'achariik. Eh re' tinamit inimanik reh i ruk'uhb'aal i Dios suq naa ruwihiik. 19Re' i móso minooj pankamanik, ma' xata ruuk' q'orik naa rutijiik, ruum nee wo' naq irib'iraj, xa re' la' ma' nee ta wo' rub'an. 20Saqb'ih i ma' nimanik taj chuwach jino'q i xa teheeh wach chi q'orik. 21Awach i ma' rutijej ta paruk'isinal i rumoso xaruloq'om, ma' naa ta chik rukuyum i naa rub'aan reh na' ohoq kuxoq. 22Awach i ma' k'isiin ta josq'iil, eh xa teheeh wach, xa re' tikij peleto iraaj. Re' re' ma' k'isiin taqe i mahk i ruq'eb' wii' riib'. 23Awach i nim wach i rub'an riib' inehteesjik i runimaal wach. Eh awach i ma' nim ta wach i rub'an riib' inye'arik runimaal wach. 24Awach inokik haa' chi i leq' ruuk' i ajileq', xa re' reh rixowaaj riib', ruum atoob' ta naq kow neenpahqaljik reh xama' ruq'or ta wo' hoq. 25Re' ruyohljiik i xa winaq, xa je' jinaj xirob'. Eh awach i ruyeew ruk'ux ruuk' i QaJaaw Dios, re' wo' reh neenko'linik reh. 26Ma' k'isiin taqe i re' i rotob'il i wilik chi ajaab'ees inkisik', xanaah re', xa re' wo' QaJaaw Dios inq'atwik i q'orik chikinaah i tinamit. 27Re' i korik wach kik'ux ma' imponik ta chikiwach i yiib' wach kina'ojb'al. Eh re' i yiib' wach kina'ojb'al ma' mponik ta chikiwach i korik wach kik'ux.

will be added

X\