PROVERBIOS 25

1Re' taqe wili re' wo' ruuk' i ruq'orom i reey Salomón. Re' i xkitz'ihb'aaj taqe i xi kamanik ruuk' i Ezequías, xwihik chi reyil Judá. 2Noq wilik i molarik pan ánima ye'b'al ruloq'il i QaJaaw Dios. Eh ye'b'al kiloq'il i reey wila' xelik wach. 3Nik' najtiil wilik i taxaaj, eh nik' chamiil paam i wach ak'al je' wo' re' chamiil paam kina'ojb'al taqe i reey, ma' awach ta neenq'atwik wach. 4Wila' xawesaj i ch'uwa' chuwach i plata, wilik neen kamanik wii' reh i aj ch'eyool, neeruyejaa' jino'q i holohik kulk chi reh. 5Wila' xawesaj i yiib' wach runa'ojb'al parukamaj i reey, re' i reey re' chik i rub'ehel neerub'an. 6Maniimb'isaj i koq awiib' chuwach i reey. Eh maamin awiib' pan kiye'aab' taqe i nimaq kiwach, 7ruum ma' xta reet chi konee tikiq'o'reej chaloq noq nee tiooj, chuwach chi neenak'uhtaaj ak'ixb'ilaal chikiwach taqe i k'amal b'eeh. 8Wila' chib'ih imb'aan aweh, manooj lom ajal pan q'atb'al q'orik, ruum mo'-oq chik neenareq chi riij chib'ih i neena a'n noq ruk'uhtaam chik ak'ixb'ilaal aawas achaaq'. 9Ma' xta reet chi neenako'leej awiib' chupaam amahk neenkikoj, xa re' la' maaq'or i koq i rub'an chi q'eeqmaal i tokoom, 10ruum awach-oq ib'irinik aweh, neeruk'uhtaaj ak'ixb'ilaal. Eh re' yiib' wach nee ruq'or chawiij, ma' xata chik riq'omal i nee raaj. 11Re' k'uhb'aal imb'aan paruorahiil, je' rukab' jino'q i mansano oro, eh plata korjinaq wii' i ye'aab' reh. 12Awach i runimaj i holohik laj k'uhb'aal imb'aan reh, je' jino'q lopq'aaq', je' jino'q koyaar chi reh re' ruuk' manlik oro. 13Re' taqareel korik wach ruk'ux, chi reh intaaq'anik reje reh, je' rukab' noq i rujoot'isaj cho wach i tz'a'laj q'iij i mus jab'. Eh i ruyeew rukowiil ruk'ux i rupatroon. 14Awach i ruq'or chi wilik i naa ruye'em, eh xama' ruyeew ta wo' hoq, xa je' rukab' i suutz', i teew ma' xta jab' i ruk'am chaloq. 15Re' q'unil i rujoot'isaj wach i k'aah, eh re' taqe i atoob' laj q'orik i rujoot'isaj wach i choqik. 16Wila' xawaaj ayob'eem aweh i riis kaab', maawik'saj naah ruk'uxariik, ruum nee-oq wo' chik inaxab'ej cho ruka'peech. 17Eh wila' ti ponik chi rula'jiik awamigo mat'ooj ruuk' chi xa kok' xilak, ruum nee-oq inq'uhtik aweh. Eh nee-oq intohq'ik rixowaam awach. 18Awach i rutz'aq wach i q'orik chi riij i ras ruchaaq', je' rukab' i tuhyb'al kalawux, je' rukab' i ch'ihch', je' rukab' i flecha k'ul i q'as ju'. 19Awach i panti' wilik, eh i ruch'ikaa' ruk'ux chinaah i yiib' wach na'ojb'al. Re' re' je' naa toqeel jino'q i rooq, eh je' naa rub'an ruwa' chinaah i reeh hopeel. 20Awach i rub'an rutz'uuy ruuk' i ti' ruk'ux, i rub'an je' rukab' noq inkojarik i minagre chuwach i q'aah, eh je' rukab' i rub'an i rut'usaa' riib' noq k'ahchi' i k'uxik. 21Wila' i nixowanik awach inuhmik chayeew ruwa'. Eh wila' chiqiij chii' chayeew ruhaa'. 22Wila' je' re' i xa a'n reh, ma' k'isiin ta neenchalik rukaaqb'iik i wach ruum i ruk'ixiik, eh re' i QaJaaw Dios neen ye'wik jilow aweh i hat. 23Re' i teew inchalik pantz'eet ree q'iij i ruk'am chaloq i jab'. Eh ruum i yiib' wach q'orik inchalik ruyojiik i wachiis ruum i k'aah. 24Ma' xta reet chi xa pan lahtz' paam paat neenpatinik i winaq, chuwach chi pan nimlaj paat neenpatinik ruuk' jino'q ixoq xiik' naah josq'iil. 25Re' taqe i holohaq q'orik kichalik chi najt yuuq' je' rukab' i ha' injoot'isanik wach i chiq chi'iil. 26Re' i ma' xta ru mahk inyo'jik chuwach i yiib' wach runa'ojb'al, je' rukab' i kowlaj rooq ha', xa ch'uwa' chik wach. 27Maawik'saj naah ruyoob'jiik i riis kaab'. Eh maasik' runimaal awach cha wib'il awiib'. 28Re' i winaq xa teheeh wach ruuk' i rub'an, ma' xta ko'len reh, xa je' rukab' jino'q i tinamit q'ehb'inaq i tz'aq kotimaj wii' riij.

will be added

X\