PROVERBIOS 24

1Maawixowaaj kiwach i yiib' wach kina'ojb'al. Eh maamol awiib' chi kixilak, 2ruum re' keh xa re' i yiib' wach inkikapaaj rub'aan. Eh xa chi riij i ma' holohik taj kiq'orik. 3Re' jino'q i paat na'ojb'al iraaj noq inch'ikib'jik i raa', eh na'ojb'al wo' raaj i rujohteesjiik johtoq. 4Eh na'ojb'al raaj noq neenujik kipaam taqe i ru tahsaal paam i paat, reh noq neen wihik i xa holohaq chik chi chib'ih jariik ar. 5Re' winaq wilik runa'ojb'al, k'ih tz'aaq chuwach i kow riib'. Re' i na'ojb'al k'ih tz'aaq chuwach i kowiil. 6Noq imb'aan i q'aq'inik yej-amaj wach chi korik, koruman chi wilik taqe i naakikojwiik na'ojb'al. 7Re' i ma' nimanik taj, ma' rureq ta chik chi riij i ruq'or noq inooj pa'lojoq pan q'atb'al q'orik, ruum xama' xta wo' runa'ojb'al. 8Awach i xa re' i jot'ooj i rukapaaj rub'aan, i nelik rib'iral chi ma' holohik ta imb'anik. 9Re' i ma' nimanik taj, xa re' i rub'aan i mahk wilik paruk'ux. Eh ma' awach taj neenkuywik reh i runa'ojb'al i ma' holohik ta imb'anik. 10Wila' xyoj ak'ux noq neenchalik i ti' k'axik cha naah, ma' kow ta ak'ux. 11Chako'leej taqe i q'atooj chik i q'orik chikinaah chi naa kikanteesjiik. Chako'leej taqe i ojik inki a'n paruyohb'alil kimik, 12atoob' ta neenaq'or i korik chi ma' aweht'al taj i xk'ularik. Eh re' i naab'inik reh aw√°nima reht'al mi korik inaq'or, ruum re' reh nilwik aweh chib'ih i k'ahchi' kaat, eh re' reh naa ruye'wiik jilow reh i ju'jun chib'ih i xub'an i xuq'or. 13Hat wak'uun noq wilkaat, noq inawuk'ej i riis kaab' inawik'raaj ruki'iil. Eh xasuq suq chik noq inik'ik qohoq pan awalaq. 14Je' re' ki'iil noq naa a'nam rusuqkiil i holohik laj na'ojb'al, i holohik laj kapeew. Eh wila' xareq chi riij taqe re' holohik naa awojiik wii'. Eh re' ch'iklik reje wii' ak'ux, ma' jaruuj naa rusahchiik wach. 15Maayejaa' wach i yiib' wach na'ojb'al chi jot'b'al reh i korik wach ruk'ux. Eh maatukej wach i ruk'achariik parupaat. 16Re' korik wach ruk'ux atoob' ta q'ehb'oq wuquub'-oq pech panti' k'axik xa nee wo' rukuy ransil. Eh re' i yiib' wach kina'ojb'al naa kikahniik panti' k'axik chi jumpech. 17Mansuuqb'ik ak'ux noq nee ruk'ul i ti' k'axik, eh noq neeruq'eb' riib' inixowanik awach, 18ruum re' QaJaaw Dios ma' imponik ta chuwach i je' re'. Eh chanaah-oq chik i hat nee ruyeew chee ti' k'axik. 19Maa wuch'ihleej taqe i yiib' wach kina'ojb'al. Eh maawixowaaj kiwach i ma' holohik ta kib'anik, 20ruum re' i yiib' wach runa'ojb'al ma' holohik ta naa rojiik kuxoq wii'. Eh naa rusahchiik wach, je' rukab' noq inooj chuhpoq i saqumb'al. 21Hat wak'uun noq wilkaat, chayohleej i QaJaaw Dios je' wo' hoq i reey. Eh maamol awiib' kuuk' i aj ixowaal, 22ruum re' keh xanik' neensacharik kiwach. Eh ma' awach ta neht'alinik reh nik' wach i ti' k'axik naa ruye'ariik cho chikinaah ruum i Dios, ruum i reey. 23Re' taqe wilik kina'ojb'al je' wili i xkiq'or: Ma' ruyee ta riib' chi awach ineenpahqaljik i ti' k'axik chinaah pan q'atb'al q'orik. 24Eh re' i ruq'or chi ma' xta ru mahk i wilik ru mahk, ma' holohik ta kiq'orik i tinamit chi riij. Eh ma' mponik ta chikiwach i nimaq tinamit. 25Eh re' inye'wik chutojariik i ru mahk i aj mahk, ma' xta reet naa reliik. Eh holohik inaakipahqaam i tinamit chi riij. 26Awach i holohik ruchaq'weesjiik i rub'an inq'orarik reh, je' naa jino'q tz'ub'uuj i ruyeew pan wach. 27Cha a'n pee taqe ayak pantaq b'eeh, cha a'n pee taqe akamaj panab'iix, kora'j neenach'ik'aa' re' aak'achariik panapaat. 28Maakoj ru mahk aawas achaaq' chi ma' xta rub'ehel. Eh maatz'aq wach i q'orik chi riij. 29Maaq'aj wach i ma' holohik taj imb'aan aweh. Maa a'n jilow reh i yiib' wach i rub'an aweh i tokoom. 30Re' hin xinik'ik parab'iix i sikil laj winaq, xinik'ik wo' hoq aha' rutikim wii' ru-uuva i ma' xta runa'ojb'al. 31Re' i xwilow ar, re' chi ma' k'isa k'iix i xpoq' paruye'aab'. Eh re' i koraal ab'aj wilik naq chi riij i ruye'aab', xtub'lujik chik wach ak'al. 32Eh noq xwilow chi je' re' xnumol panukapeb'aal, eh xnutijej i na'ojb'al wili: 33Noq re' hat nee ti okik chi wirik neenatoq'aa' tahka'y, neena q'ahcheej aaq'ab' chi' ak'ux nee ti okik chi' hi'lik. 34Re' neb'a'il yohb'aal wach noq neenchalik cha naah, ma' nee ta chik inakuy, je' rukab' i yiib' wach runa'ojb'al wilik rupuhb' pan q'ab'.

will be added

X\