PROVERBIOS 23

1Noq neetiruyuq'eej ruuk' chi wi'k jino'q i nim wach, chakoj rehtaal chi korik awach uuk' wilkaat. 2Atoob' ta yohb'aal wach aanuhmiik matokik lom chi wi'k. 3Maak'ax wach i suq atoob' i ruk'ux, ruum aajot'ariik-oq iraaj ruuk' i nee ruyeew aweh. 4Mo'-oq xa re' inaq'or panak'ux chi naa aab'ehoomriik, cha kanaa' rukapeb'jiik i re'. 5Wila' xakoj rehtaal chi korik, neenanab'eej chi re' i b'ehomal xama' xta nokik wii'. Xa jumehq'iil inik'ik, xa impoq' reje ruxiik', je' rukab' noq inxik'inik reje i xihk. 6Maatzunaa' awiib' chi wi'k nah rumexa i yohb'aal wach pixpiil. Eh maak'ax wach i suq atoob' i ruk'ux, 7ruum re' reh xa neerutiib'isaj ak'ux, neetiruyuq'eej ruuk' chi wi'k, xa re' la', ma' korik ta wo' reh i rub'an, nee wo' chik i rupixuj aweh ruka'peech. 8Eh nee-oq wo' chik inaxab'ej ruka'peech i neenak'ux. Chi je' re' xa nee nayeew chi re' chi ma' re' i holohaq laj q'orik xaq'o'reej wii'. 9Maak'uhb'alej i ma' nimanik taj, ruum xa neeruse'laaj taqe i holohaq laj q'orik neenaq'or reh. 10Maajil i rehtalil i k'ula't kojooj cho najtir q'iij. Eh maaq'uuch wo' hoq i kak'aal taqe i ma' xta kituut kajaaw, 11ruum re' keh wilik jinaj ko'len keh q'e' nim rajaawriik. Eh re' reh naa rub'aniik ti' k'axik aweh chi ko'lb'al keh. 12Chamol panawánima aatijiik imb'aan. Eh chayeew axikin chi rib'iirjiik holohik laj na'ojb'al. 13Maacanaa' rutijiik i k'ijool, atoob' ta nee nayeew jarpech-oq chi tz'uhuum ma' ruum tee re' neenkimik. 14Nee la' nako'leej chuwach i kimik wila' xatijej. 15Hat wak'uun noq wilkaat, wila' xareq ana'ojb'al chi manlik, re' hin ma' k'isiin ta naa rusuuqb'iik nuk'ux. 16Eh ma' k'isiin wo' naa rusuuqb'iik nuk'ux noq naa kaat b'iram chi k'ahchi' aq'oriik nik' wach i ruk'ul chi naa aq'oriik. 17Maawixowaaj kiwach taqe aj mahk, eliik la' chayohleej wach i QaJaaw Dios. 18Wila' je' re' i xa a'n holohik naa awojiik kuxoq wii'. Eh re' i ch'iklik wii' ak'ux, ma' jaruuj naa rusahchiik wach. 19Hat wak'uun noq wilkaat, chab'iraj i nuq'or aweh, eh cha tijej awiib', eh re' i holohik b'eeh chak'am. 20Maamol awiib' kuuk' taqe i kixohk'rik, je' wo' kuuk' taqe i xa kitusik, 21ruum re' taqe i kixohk'rik, taqe i xa kitusik, ma' xta chik i wilik keh noq inooj kuxoq, kineb'aa'rik. Eh ni xata chik inkiloq' kiso' chub'aan. 22Chab'iraj aak'uhb'aaljiik i rub'an aawajaaw i xtz'uhkrisanik chaaweh. Eh maa wixowaaj wach atuut noq neenrijb'ik. 23Chawehchaaj i korik, je' wo' i holohik laj na'ojb'al, je' wo' i tijinik, ruch'ihil i holohik laj kapeew, mankiq'uch chik aweh. 24Re' korik wach ruk'ux, eh wilik runa'ojb'al, rub'ehel chi eliik suq ruk'ux i rajaaw, eh wilik runimaal wach. 25Re' i holohik laj na'ojb'al cha a'n, reh chi neensuuqb'ik kik'ux atuut awajaaw. 26Hat wak'uun noq wilkaat, chayeew weh awánima, eh chak'am naah i nub'an i hin. 27Ruum re' i k'oyoom laj ixoq, eh re' ixoq ma' eht'alimaj ta wach, xa je' rukab' i jul chaam, lahtz' paam. 28Re' ixoq re' re' k'ahchi' chi sachooj, je' rukab' i ajileq', ma' k'isiin taqe i winaq i ruq'eb' pamahk. 29¿Awach i panti' k'axik wilik? ¿Awach i ruk'er chii'? ¿Awach i xa eliik peleto i rub'an, eh xa eliik oq'ik i rub'an? ¿Awach i ti' wilik chi xama' xta rub'ehel? ¿Awach i xa re' i ma' holohik taj i ruk'ul? 30Re' ma' i rukanaa' ta ruuk'jiik i k'ahlaj ha' inxohk'risanik, eh xa reh reh chik wach i k'ahlaj ha' i ruk'ej. 31Maak'ax wach i k'ahlaj ha', noq neenkit'urej pan kulk xa kaq chik wach, xasaqum chik paam, eh xa ch'ub'ik chik noq inooj qohoq. 32Xanaah re', re' ruuk'jiik i re', je' rukab' i rutiiw i aaq' ti' k'axik i ruk'am chaloq noq inooj kuxoq. 33Ruum i re', xa chib'ih jariik ineenawil wach, eh xa chib'ih jariik i ma' holohik taj neenaq'or. 34Eh noq hat xohk'reel, je' naa chinaah jino'q i palaw, oon chi ju' jino'q i qamaan chee' wilkaat noq neenawik'raaj. 35Eh je' wili i neenaq'or: Xinkiq'oj, xinkiyeew chi tz'uhuum, ni xata xwik'raaj noq xkian weh. Noq neen k'ulik nuk'ux nee wo' chik inooj nusik' i nuhaa', tiko'q.

will be added

X\