PROVERBIOS 21

1Re' runa'ojb'al i reey, je' rukab' i rooq ha' pan q'ab' i QaJaaw Dios. Re' reh ink'amwik rub'eeh ruuk' chu'nchel i rub'an. 2Re' winaq xa chu'nchel ma' xta reet i rub'an noq i rukapaaj. Xa re' la', re' i QaJaaw Dios ineht'alinik reh chib'ih i wilik cho pan ánima. 3Re' rub'aan i korik, i rub'ehel, imponik chuwach i QaJaaw Dios, ma' je' ta rukab' i xa k'atoj mayiij. 4Re' i niimb'isanik wachiis, i k'ul b'anaj wachiis inki a'n i yiib' wach kina'ojb'al mahk chi b'anarik. 5Re' taqe inkorjik wach chi kapeb'imaj riij chi korik, wilik i ruk'am chaloq. Eh re' taqe i xa pan ajiim b'eeh imb'aan, xa nooj sahchoq wach. 6Re' i b'ehomal i molarik wach ruuk' jot'ooj, xama' xta nokik wii', xa ye'b'al k'isinoq rusuqkiil kik'ux i xa re' i kikimiik inkisik'. 7Re' i yiib' wach kina'ojb'al ruum i ti' k'axik inki a'n reh i tokoom, naa rusahchiik kiwach. Ruum chi ma' xkik'am ta naah i korik. 8Re' i yiib' wach imb'anik, xama' xta kamaj i rub'an, ma' xta ruk'am chaloq. Eh re' taqe i rub'an i korik wach ruk'ux, saq kiwach. 9Ma' xta reet chi xa pan lahtz' paam paat neenpatinik i winaq. Eh xama' xta nkih chi chupaam i nimlaj paat neenpatinik ruuk' jino'q ixoq xiik' naah josq'iil. 10Re' yiib' wach runa'ojb'al xa re' i ma' holohik taj i rukapaaj rub'aan. Ma' ruketelaaj ta kiwach i ras ruchaaq'. 11Noq inye'arik chutojariik i ru mahk i yiib' wach imb'anik, kore' i rureq runa'ojb'al. Eh re' wilik runa'ojb'al reh, xa ruuk' i junriim chi q'ilooj neenimanik. 12Re' i Dios korik wach ruk'ux, i rukanaa' chi ma' xta rak'uun rixq'uun i yiib' wach runa'ojb'al. Eh i rusach kiwach i yiib' wach kib'anik. 13Awach i ma' i rutoob'eej i neb'aa' noq i rupahqaaj rutoob'jiik, ma' naa ta wo' rutoob'jiik i reh noq naa rupahqaam rutoob'jiik. 14Re' jino'q i winaq atoob' ta yohb'aal wach i ruk'aah, eh wila' xsiijik chib'ih reh, ruuk' i re', neenik'ik i ruk'aah. 15Noq imb'aan i rub'ehel insuuqb'ik ruk'ux i korik wach ruk'ux. Eh re' taqe ma' holohik ta kib'anik, naa rusahchiik kiwach. 16Awach i ma' ruk'am ta naah i holohik laj na'ojb'al, pankimik naa rojiik. 17Awach i rukut riib' chi ruuk'jiik i k'ahlaj ha' inxohk'risanik, eh i rukoj taqe ink'ohnik laj iq'oom re' re' naa ruye'em riib' paneb'a'il. 18Re' i ma' korik ta wach ruk'ux, i yiib' wach runa'ojb'al, naa ruwihiik panti' k'axik chi jilow i korik wach ruk'ux. 19Ma' xta reet chi xa pan i chiq yuuq' neenk'acharik i winaq, chuwach chi neenk'acharik ruuk' jino'q ixoq xa re' k'aah i rub'an, xama' holohik ta imb'anik. 20Re' wilik runa'ojb'al, wilik rub'ehomal, wilik ru ink'ohnik laj iq'oom parupaat. Eh re' i ma' nimanik taj, i rusach wach i chib'ih reh. 21Awach i rusik' i korik, eh inketelinik wachiis nee rureq i holohik laj k'acharik, nee wo' inye'arik runimaal wach. 22Re' i wilik runa'ojb'al nee ruchop naah i kitinamiit i kow kiib', neeruq'at wach i kajaawriik inkiko'leej naq wii' kiib'. 23Awach i korukapaaj riij taqe ruq'or, ma' jaruuj nee ruyeew riib' pan k'axik. 24Re' i yiib' wach i runa'ojb'al, xama' holohik ta imb'anik, xa nim wach i rub'an riib'. Eh xa teheeh wach, i rukaqse'laaj taqe i ras ruchaaq'. 25Re' i sikil laj winaq wilik naq i rootwaaj. Xa re' la', xanaa wo' rukimiik reje chi ma' naa ta rureqem, ruum ma' raaj ta kamanik. 26Re' reh xa chu'nchel naq q'iij irootwaaj. Eh re' korik wach ruk'ux, xa wilik wo' chib'ih reh ma' rupixpuuj ta wach q'e' insihinik. 27Re' QaJaaw Dios ma' imponik ta chuwach i kimayiij i yiib' wach kina'ojb'al, ruum i ma' holohik taj inkaaj chi riij. 28Re' i ma' re' taj i korik i ruq'or, naa rusahchiik wach. Eh awach irib'iraj chi korik inq'orarik, re' re' neenchol ruchaq'weesjiik. 29Re' yiib' wach runa'ojb'al xasuq chik wilik i rub'an riib'. Eh re' korik wach ruk'ux, korik reh chi holohik i runa'ojb'al. 30Chuwach i QaJaaw Dios ma' xta jino'q na'ojb'al nim wach, ni xata jino'q holohik laj kapeew. 31Re' winaq i ruyejaa' i rukawayu reh i q'aq'inik, re' QaJaaw Dios i ruyeew i rajaawriik chi nee nelik korik ruuk' i q'aq'inik.

will be added

X\