1 Hat wak'uun noq wilkaat cha nimaj taqe nuq'oral, eh chamol panawánima taqe i nuk'uhb'aal. 2 Chayeew axikin chi rib'iirjiik i holohik laj na'ojb'al. Eh cha teh awánima, reh chi neen wihik ana'ojb'al. 3 Kow cha pahqaaj ana'ojb'al, je' wo' hoq i holohik chi b'anarik. 4 Eh cha chop ak'ux chusik'ariik, je'-oq insik'arik plata, je'-oq insik'arik i xa chib'ih jariik q'e' k'ih tz'aaq cha a'n. 5 Chi je' re', neenareq chi riij i ruyohljiik i QaJaaw Dios. Eh neenareq chi riij i na'ojb'al iraaj i Dios, 6 ruum xa re' wo' i QaJaaw Dios inye'wik i holohik laj na'ojb'al, je' wo' taqe i holohik laj kapeew, i ruq'or ruuk' chii'. 7 Re' QaJaaw Dios irutoob'eej, i ruko'leej taqe i korik wach i kik'achariik. Eh ma' xta k'isinoq ruch'uwa'iil wach i kánima. 8 Eh i rucha'jeej taqe i korik wach kik'ux pan kik'achariik. Eh i ruko'leej taqe i wilik i kisantohiil. 9 Re' hat naa anab'eem i korik, i rub'ehel. Eh naa achopom ak'ux chub'aan chu'nchel i holohik chi b'anarik. 10 Re' hat naa ruwihiik panawánima i holohik laj na'ojb'al, eh neena a'n rusuqkiil i holohik chi naab'jik. 11 Re' holohik laj k'uhb'aal, eh re' holohik laj na'ojb'al naa ruko'liniik aweh chi eliik. 12 Re' taqe re' naa resaniik aweh chupaam i yiib' wach b'eeh. Eh je' wo' pan kiq'ab' i yiib' wach kiq'orik. 13 Re' taqe re' ineesanik aweh pan kiq'ab' i kiq'eb'wik reh i holohik laj b'eeh. Eh kiooj chupaam i yiib' wach b'eeh. 14 Eh je' wo' pan kiq'ab' i xasuq chik kik'ux chub'aan i jot'ooj, xankich'ikaa' chik kik'ux chub'aan i yiib' wach na'ojb'al. 15 Eh re' ma' holohik ta laj b'eeh xkik'am, eh xkiq'eb' i holohik laj b'eeh. 16 Re' hat re' holohik laj na'ojb'al neenko'linik aweh pan q'ab' k'oyoom laj ixoq, ma' aweht'al ta wach, holohik laj q'orik tiruq'unej wii'. 17 Eh xuq'eb' chaloq i peet rub'ahiil noq koxq'un chaloq, xsahchik paruk'ux taqe ruq'orom cho ree Dios chi naa rub'anam. 18 Eh wila' xak'ulaa' reh ojik k'achareel parupaat, re' i rub'eeh i kimik k'ahchi' ak'amam. 19 Re' taqe i kitahqinik reh ixoq re' re' ma' naa ta chik kikorjik. Eh ma' naa ta chik kireqem i korik laj b'eeh reh i holohik laj k'acharik. 20 Eh re' hat, re' holohik b'eeh chak'am naah. Eh cha tijej aweh i kina'ojb'al taqe i korik wach kik'ux, 21 ruum re' taqe korik wach kik'ux i ma' xta ruch'uwa'iil wach i kánima. Eh naa kik'achariik chi juneliik chupaam i ye'aab'. 22 Eh re' taqe i yiib' wach kina'ojb'al ruch'ihil taqe ma' kinimanik taj ma' naa ta kik'ulariik cho chupaam i ye'aab' re' re'.
