PROVERBIOS 17

1Ma' xta q'orik reh atoob' ta xa chiqwi'k i neen k'uxarik, xa re' la', mi suq i k'acharik. Xa ma' xta neerutiq chi nujinaq i suq atoob' pampaat wila' xa re' peleto imb'aan. 2Re' i móso wilik runa'ojb'al, i ruq'at wach i rak'uun i rupatroon. Eh inehtrik i kooch, je' rukab' inye'arik keh ak'uunb'ees kinimanik. 3Re' i oro re' i plata ruuk' q'aaq' inehteesjik i ruch'uwa'iil wach. Eh re' taqe i wilik cho pan ánima, re' i QaJaaw Dios ineesanik i ruch'uwa'iil wach. 4Re' i yiib' wach runa'ojb'al, re' i aj chukul q'orik, q'e' imponik chikiwach taqe i yiib' wach q'orik imb'aan. 5Awach ixkaqse'lanik reh i neb'aa', re' ixtz'uhkrisanik reh i rukaqse'laaj. Eh awach insuuqb'ik ruk'ux chi riij i ti' i ruk'ul i neb'aa', naa ruye'ariik chutojariik i ru mahk. 6Re' taqe i mama' winaq, je' corona chi keh i kiih kimaam. Eh re' inye'wik runimaal kiwach ak'uunb'ees ixq'uunb'ees, re' taqe i kituut kajaaw. 7Wila' ma' suq i rub'an reh i ma' holohik ta laj q'orik, i ma' nimanik taj, ra'j naa chik re' i k'amal b'eeh suq neerub'an reh i chukuj q'orik. 8Awach i ruq'uch i tumiin ruuk' i xa chib'ih jariik i rub'an, i rukapaaj chi nee nelik korik ruuk' taqe i rub'an xa aha' pa' neenooj. 9Awach i rukuy imb'aan reh, pansuqkiil ink'amwik. Eh awach i ma' rukuy taj imb'aan reh, panixowaal ink'amwik. 10Re' wilik runa'ojb'al xajuriim inq'ilarik. Eh re' ma' xta runa'ojb'al ma' nee ta nimanik ruuk' jino'q siento chi tz'uhuum. 11Re' ma' nimanik taj, xa re' i sik'ij peleto iraaj. Xa re' la', jinaj i aj taqareel naa rutaq'ab'jiik cho ruuk' xiik' naah josq'iil. 12Ma' q'e' ta yohb'aal chi neen k'ulariik i ixoq oso kore' xq'ucharik i rak'uun, chuwach chi neenk'ularik i ma' nimanik taj chi k'ahchi' rub'anam i yiib' wach. 13Awach imb'aan otob'il reh, eh ma' holohik ta ruq'aj wii' wach, juneliik naa ruwihiik i ti' k'axik parupaat. 14Noq intohq'ik i peleto xa je' chik rukab' noq inteh cho rooq i nim ha'. Ruum aj re', ma' xta reet chi neenkahnik rub'aan noq komajaa' inuhtik wach. 15Re' ruq'orariik chi ma' xta ru mahk i wilik ru mahk. Eh re' i rukojariik ru mahk i ma' xta ru mahk, re' i kiib' re' re', ma' imponik ta chuwach i QaJaaw Dios. 16Re' ma' nimanik taj, xama' xta neerutiq reh chi nee ruloq' ruuk' tumiin i runa'ojb'al, ruum xama' nee ta wo' rureq chi riij 17Re' jino'q amígo juneliik nee qohrutoob'eej noq ti' qak'ux. Inkamanik qeh chi je' qas, oon qachaaq'. 18Re' ma' xta runa'ojb'al inooj okoq chi riij i ramigo pan q'atb'al q'orik, eh wach naah chik i reh inkahnik i mahk re' re'. 19Awach i yiib' wach runa'ojb'al imponik chuwach i peleto. Eh awach i q'e' runimb'isaj riib' ruuk' i ruq'oral, xa re' reh i rujot'om riib'. 20Awach i re' i yiib' wach i wilik paránima, ma' jaruuj naa rureqem i holohik. Eh awach i re' i ma' toob' laj q'orik i nelik cho ju' raaq' naa rojiik q'ehb'oq panti' k'axik. 21Noq re' ak'uunb'ees ma' nimanik taj, eh noq re' ak'uunb'ees ma' xta runa'ojb'al jinaj ti'kiil k'uxliis chi reh ajaab'ees. 22Noq suq suq i ránima jino'q, je' naa jinaj iq'oom chi reh. Eh noq ti' i ránima jino'q, ruum i re' ink'isiimb'ik ruk'ux. 23Re' q'atal q'orik yiib' wach runa'ojb'al i ruk'ul i tumiin chi qeqmaal ruuk' i ruyejaa' wach. Ruuk' i re', i ruyoj wach i korik. 24Re' ma' xta reet runa'ojb'al, iraaj i reh chi naa rureqem runa'ojb'al. Eh re' ma' nimanik taj, xama' reht'al ta wo' hoq chib'ih naa rojiik kuxoq wii'. 25Re' ak'uunb'ees ma' nimanik taj, xa kik'aah, xaruti'kiil kik'ux i rutuut rajaaw i ruyeew. 26Ma' ruk'ul taj chi neenehteesjik rumulta i ma' xta ru mahk. Eh ni xata ruk'ul chi neenye'arik chi tz'uhuum i holohik runa'ojb'al. 27Awach i ma' xa tanwolwotik chi q'orik wilik runa'ojb'al. Awach ma' teheeh ta wach re' re', wilik runa'ojb'al. 28Re' ma' nimanik taj, noq i rutz'ap i chii', eh ma' nchoqik ta chik, inq'ahxik nare' wo' reh chi wilik runa'ojb'al.

will be added

X\