PROVERBIOS 16

1Re' winaq wilik taqe i ruyejaa' cho wach rub'aan paránima. Xa re' la', re' QaJaaw Dios q'oreel chinaah mi neenooj eloq wach oon ma' nee taj. 2Re' winaq xa chu'nchel ma' xta reet i rub'an noq i rukapaaj, xa re' la' re' QaJaaw ineht'alinik reh chib'ih i rukapaaj cho paránima. 3Cha woqxa'neej pan q'ab' i QaJaaw Dios chu'nchel i naa a'nam. Chi je' re', neenooj eloq wach taqe inayejaa' wach. 4Re' QaJaaw Dios wilik iraaj chi riij noq xuyejaa' chu'nchel i xa chib'ih jariik. Eh re' yiib' wach runa'ojb'al, rumolom naa re' wo' reh i ruq'ijil i ti' k'axik. 5Re' QaJaaw Dios ma' imponik ta chuwach taqe i nimaq kiwach inki a'n kiib'. Xa nik' ma' ruyeew taqe panti' k'axik. 6Xa ruuk' i ketelinik wachiis, xa ruum i korik naa rukuyariik i mahk. Eh xa ruum i ruyohljiik i Dios i resaj riib' i ju'jun chuwach i yiib' wach na'ojb'al. 7Noq holohik i kina'ojb'al i winaq, imponik chuwach i QaJaaw Dios. Eh ruum i re' i ruk'am taqe ruuk' panotob'il i nixowanik wach i reh. 8Ma' xta reet chi xa k'isiin i chib'ih aweh, xa re' la' wi parub'ehel xareq. Xa ma' xta neerutiq chi k'ih i chib'ih aweh, wila' ma' parub'ehel xareq. 9Re' winaq i ruyejaa' wach chib'ih taqe naa rub'anam, xa re' la', koruman chi re' Dios naa ruk'amwiik rub'eeh. 10Re' reey parub'ihnaal Dios inq'orik, ruum i re' ma' awach taj i nee ruyeew chutojariik i ru mahk wila' ma' chih wo' ru mahk. 11Re' i pajooj manlik imb'aan ruuk' taqe i tokoom chik pajb'al imponik chuwach i Dios, ruum re' wo' reh xkananik taqe pajb'al. 12Re' taqe reey ma' nkaaj taj chi neenb'aan i yiib' wach na'ojb'al, ruum noq wilkeeb' pan kiye'aab' ma' ye'ooj ta q'ab' keh chi naa rub'aan i yiib' wach na'ojb'al. 13Re' taqe reey inkik'ax, eh suq rilariik inki a'n awach i korik kiq'orik, eh rub'ehel inkiq'or. 14Re' rujosq'iil i reey kimik i ruk'am chaloq. Eh re' wilik runa'ojb'al i rujoot'isaj wach i rujosq'iil i reey. 15Noq suq ruk'ux i reey k'acharik i ruk'am chaloq. Eh re' i holohik i rub'an, je' naa rukab' i suutz' ink'amwik cho reh i jab'. 16Q'e' chihooj chi neen wihik runa'ojb'al jino'q, ma' xata je' k'ihaal tz'aaq i manlik oro. Eh re' i holohik chi naab'jik ma' xata je' k'ihaal tz'aaq i plata. 17Re' taqe i korik wach kik'ux inkikanaa' rub'aan i yiib' wach na'ojb'al. Eh wila' inkik'raaj kiib' ruuk' i kina'ojb'al, k'ahchi' kicha'jeem kiib'. 18Awach i q'e' i runimb'isaj riib' ma' jaruuj naa reliik korik ruuk' i rub'an, ruum chi xa re' i kaqwachiil wilik paránima naa ruq'eb'em riib'. 19Re' q'e' chihooj chi nee ruk'isiimb'isaj riib' jino'q kuuk' taqe i neb'aa', chuwach chi neen b'ehomrik chi kixilak i nimaq kiwach. 20Awach i runimaj i ruq'oral i QaJaaw Dios holohik naa rojiik wii'. Atoob' reh awach i ruyeew ruk'ux ruuk' i QaJaaw. 21Awach i rukapaaj riij i rub'an, wilik runa'ojb'al inq'orarik reh. Eh re' taqe chaq'laam laj q'orik, inkojwik na'ojb'al. 22Re' holohik laj na'ojb'al, holohik laj k'acharik ruk'am chaloq. Re' i kitijiik i ma' kinimanik taj, xama' xta ruk'am chaloq. 23Awach i wilik runa'ojb'al chukapeb'jiik chib'ih i rub'an, re' re' inchol q'orik. Eh re' taqe i ruq'oral inkojwik na'ojb'al. 24Awach i xasuq inq'orik, re' i ruq'oral xa je' chik ki'iil riis kaab', eh i rujoot'isaj wach i ánima, i ruyeew ruman rukowiil i k'uxliis. 25Wilik i b'eeh xa pan holohik chik ink'amwik noq ink'utinik, xanaah re', noq inooj kuxoq pankimik ink'amwik. 26Re' kamanoom, re' i runuhmiik iminwik reh pankamanik, eh ruum i re' inkamanik. 27Re' i yiib' wach runa'ojb'al xa re' i yiib' wach i ruyejaa' wach rub'anariik. Eh re' i ruq'oral i nelik reje panchii', xa je' chik rukab' i xaq q'aaq'. 28Re' i yiib' wach runa'ojb'al xa re' i tikij peleto iraaj. Re' i tz'aqal wach k'utaaj i rukoj pank'aah taqe i kamigo naq kiib'. 29Re' i yiib' wach runa'ojb'al xa rujot' taqe i ramigo, eh i ruk'am taqe chupaam i ma' holohik ta laj b'eeh. 30Eh xa rumutz'muteej chik inaq'wach chukapeb'jiik riij i yiib' wach na'ojb'al. Eh xa rutiiw chik i xaq chii' noq rub'anam chik i yiib' wach re' re'. 31Noq insaaqb'ik i rismaal naah jino'q, je' naa jinaj corona q'e' looq' chi reh. Eh re' i re' ink'uhtanik reh chi holohik i runa'ojb'al. 32Q'e' chihooj chi wilik q'unil ruuk' jino'q, chuwach chi xakow neerub'an riib'. Eh xiik' naah chihojal chi nee ruloch' riib' jino'q chuwach chi nee rutoq'aa' q'uchuuj tinamit. 33Re' winaq i rusik' chi riij nik' wach noq naa rureqem rutumiin, xa re' la', re' i QaJaaw Dios q'oreel chinaah.

will be added

X\