PROVERBIOS 12

1Awach i ruk'am naah rutijiik imb'aan imponik chuwach i holohik laj na'ojb'al. Awach i rixowaaj i ruq'ilariik imb'aan, ma' xta runa'ojb'al. 2Re' i holohik runa'ojb'al i ruk'ul i rotob'il i QaJaaw Dios. Eh re' ma' holohik ta imb'anik i ruyeew chutojariik i ru mahk. 3Ma' awach taj i nee rureq rukowiil ruk'ux ruuk' i yiib' wach na'ojb'al. Eh re' i korik wach kik'ux ma' xta naa ruyojiik wii' kik'ux. 4Re' i ehk'eenb'ees holohik i runa'ojb'al, jinaj corona chi reh i rub'ahiil. Eh re' i ehk'eenb'ees yiib' wach i runa'ojb'al irik'saj chi ti' i rub'ahiil. 5Re' taqe i korik wach kik'ux xa re' i holohik inkikapaaj. Re' taqe i yiib' wach kina'ojb'al, xa re' i yiib' wach inkikapaaj. 6Re' i kiq'oral i yiib' wach kina'ojb'al kaansanik i ruk'am chaloq. Eh re' kiq'oral i korik wach kik'ux ko'lemb'al iib' i ruk'am chaloq. 7Re' QaJaaw Dios naa rusachwiik kiwach i yiib' wach i kina'ojb'al. Eh re' aawach keh pankipaat, i korik wach kik'ux ma' xta naa rub'aniik keh. 8Re' winaq inye'arik runimaal wach wila' holohik runa'ojb'al. Eh re' taqe i yiib' wach wilik cho parĂ¡nima ma' ajwaal ta wach. 9Ma' xta reet chi xa k'isiin wach jino'q, eh wilik i neen ye'wik ruwa' ruhaa', chuwach chi nee runimb'isaj riib' jino'q, eh ma' awach ta neen ye'wik ruwa' ruhaa'. 10Re' korik wach ruk'ux i ruyeew ruwa' ruhaa' taqe ruchikoop. Eh re' yiib' wach runa'ojb'al xa re' i josq'iil wilik cho parĂ¡nima. 11Awach i rukamaneej wach i ruye'aab' i rub'an ruwa' ruhaa'. Re' i ma' xta runa'ojb'al xa re' i ma' xta ruk'am chaloq i rukapaaj. 12Re' yiib' wach kina'ojb'al re' inkik'ax wach rub'aan ink'amwik keh panti' k'axik. Eh re' korik wach kik'ux inwachinik inki a'n 13Re' i yiib' wach runa'ojb'al xaruyeew riib' pan k'axik ruum i chukuj q'orik i rub'an. Eh re' korik wach ruk'ux i nelik korik ruuk' taqe rub'an. 14Re' ju'jun naa rub'anam rusuqkiil i ruk'am chaloq taqe i ruq'or. Eh naa ruk'ulum i rutojb'aal chi riij taqe i rub'an. 15Re' ma' nimanik taj i rukapaaj chi re' i rub'an ma' xta reet. Eh re' wilik runa'ojb'al i ruk'am naah i ruk'uhb'aljiik imb'aan. 16Re' i ma' nimanik taj ruk'uhtaaj i rujosq'iil. Re' wilik runa'ojb'al, inik'ik paruk'ux i ma' holohik taj imb'aan reh. 17Awach i korik inq'orik re' wo' nee ruq'or i rilow. Eh re' i ma' korik ta nq'orik xa rutz'aq wach i ruq'or. 18Wilik taqe i q'e' ti' kiq'ojwik ruuk' i kiq'oral. Eh re' i wilik kina'ojb'al ruuk' i kiq'oral, inkiq'omaaj i ti' re' re'. 19Awach inq'orik reh i korik, naa ruwihiik ruk'achariik chi juneliik. Eh re' inchukwik q'orik xama' najt ta naa ruk'achariik. 20Re' yiib' wach kina'ojb'al xa re' i jot'ooj inkiyejaa' wach. Eh re' taqe i re' i holohik inkiyejaa' wach rub'aan, suq kiil k'uxliis ruk'am chaloq. 21Re' korik wach ruk'ux ma' xta jino'q i ti' k'axik naa ruk'ulum. Eh re' yiib' wach runa'ojb'al, ma' k'isa ti' k'axik naa ruchaliik chinaah. 22Re' QaJaaw Dios, ma' raaj ta kiwach i chukul q'orik. Eh re' taqe i re' i korik inki a'n ra'j xti q'e' imponik chuwach re'. 23Re' i wilik runa'ojb'al ma' resaj ta ruk'utjiik taqe reht'al. Eh re' taqe i ma' kinimanik taj inkesaj ruk'utjiik i kiyiib' wach na'ojb'al. 24Re' i ruyeew ruk'ux chi kamanik neenkojarik chi ilil kamanik. Eh re' i ma' raaj ta kamanik kow naa rutaq'ab'jiik. 25Re' ti' k'axik inchalik inye'wik ruti'kiil ruk'ux i winaq. Eh re' holohik laj q'orik inye'wik rusuqkiil ruk'ux. 26Re' korik wach ruk'ux, pan holohik b'eeh i ruk'am i ras ruchaaq'. Eh re' i yiib' wach kina'ojb'al, chupaam i ma' holohik ta laj b'eeh inkik'am i kas kichaaq'. 27Re' i puhb'an chikop i ruk'ay xama' xta wo' chikop rujoxej. Eh re' i ma' ruk'ay taj, i rub'an reh i chikop, eh i rub'an rusuqkiil. 28Re' rub'anariik i holohik pan holohik laj k'acharik ink'amwik. Eh re' rub'anariik i yiib' wach pankimik ink'amwik.

will be added

X\