PROVERBIOS 10

1Re' reey Salomón je' wili xuq'or: Re' ak'uunb'ees holohik i runa'ojb'al i ruyeew rusuqkiil ruk'ux i rutuut rajaaw. Eh re' ak'uunb'ees ma' xta runa'ojb'al i ruyeew ruti'kiil kik'ux i rutuut rajaaw. 2Re' b'ehomal inkan ruuk' i leq' xama' nee ta wo' imb'aan rusuqkiil. Eh re' i rukorkiil wach k'uxliis, ineesanik pankimik. 3Re' QaJaaw Dios ma' ruyeew ta chukuyariik ruwa' ruhaa' i korik wach ruk'ux. Eh i ruyeew chukuyariik i ruwa' ruhaa' i yiib' wach runa'ojb'al. 4Awach i ma' ruchop ta ruk'ux chi kamanik, neb'a'il i ruk'am cho chinaah. Awach i ruchop ruk'ux chi kamanik, b'ehomal i ruk'am cho chinaah. 5Awach i rujach i wach i rutik pan siq'jil, wilik runa'ojb'al. Awach inokik chi wirik paruq'ijil jach, i ruk'uhtaaj ruk'ixb'ilaal. 6Re' korik wach ruk'ux intoob'jik chi manlik ruum i Dios. Eh re' yiib' wach runa'ojb'al reh sachooj i rub'an ruuk' chii'. 7Eh re' i korik wach ruk'ux, ma' jaruuj naa rusahchiik pank'uxliis. Eh re' i yiib' wach runa'ojb'al jumehq'iil naa rusahchiik pank'uxliis. 8Re' holohik runa'ojb'al chu'nchel ruk'ux i runimaj taqe k'uhb'aal. Eh re' i ma' nimanik ta reh, ruuk' i chii' naa ruq'eb'em riib'. 9Awach i holohik imb'anik ma' xta neenyo'jik wii'. Awach i ma' holohik ta imb'anik ti' naa rojiik ruk'ulum. 10Awach i ruk'ax wach i ma' holohik taj, ti' k'axik i naa ruchaliik chinaah. Awach i xa reh reh i ruq'or ma' holohik taj i naa ruk'ulum. 11Re' i ruq'oral i korik wach ruk'ux holohik laj k'acharik i ruk'am chaloq. Eh re' yiib' wach runa'ojb'al reh sachooj i rub'an ruuk' i ruq'oral. 12Awach i wilik ixowaal ruuk' xa re' i tikij peleto i rub'an. Awach i wilik k'axooj ruuk' neerukuy i ma' holohik taj neemb'aan reh. 13Re' ruq'oral i wilik runa'ojb'al holohik laj ruk'am chaloq. Eh re' i ma' xta runa'ojb'al koruman chi naa ruye'ariik chi tz'uhuum. 14Re' wilik kina'ojb'al i holohik inkik'am chaloq. Re' taqe i ma' kinimanik taj ti' k'axik inkik'am chaloq. 15Re' inye'wik rukowiil ruk'ux i b'ehoom, re' i rub'ehomal, re' inye'wik ruti'kiil ruk'ux i neb'aa', re' i runeb'a'il. 16Re' rukooch i korik wach ruk'ux re' i k'acharik. Eh re' i rub'an i yiib' wach runa'ojb'al reh, xa re' mahk i ruk'am chaloq. 17Awach i ruk'am naah i ruq'ilariik, chupaam i holohik laj k'acharik ojik i rub'an. Awach i ma' ruk'am ta naah i ruq'ilariik, panti' k'axik ojik i rub'an. 18Awach irixowaaj wach i ras ruchaaq' aj chuk'ul q'orik. Awach i xa nooj chi tz'aqaj wach k'utaaj, kow i naah. 19Awach i xa nwolwotik chi q'orik i ruq'eb' riib' ruuk' i ruq'oral. Awach i xa rupaj i q'orik i rub'an, wilik runa'ojb'al. 20Eh re' i ruq'or i ju' raaq' i korik wach ruk'ux, je' k'ihaal tz'aaq i manlik plata. Eh re' i rukapaaj i yiib' wach runa'ojb'al, ma' xta tz'aaq. 21Re' korik wach ruk'ux ma' k'isiin taqe i rutijej. Eh re' taqe i kow i kinaah inchalik i kimik chikinaah, ruum ma' xta kina'ojb'al. 22Re' rotob'il i QaJaaw Dios jinaj b'ehomal i ruk'am chaloq, ma' xta ti' i ruk'am chaloq. 23Re' i ma' nimanik taj xasuq chik ruk'ux chub'aan i ma' holohik taj. Re' wilik runa'ojb'al, insuuqb'ik ruk'ux ruuk' i holohik laj na'ojb'al. 24Re' yiib' wach runa'ojb'al aha' wilik i q'e' inyo'jik ruum re' re' inchalik chinaah. Eh re' korik wach ruk'ux inye'arik reh aha' wilik iraaj. 25Re' yiib' wach runa'ojb'al xa re' yu' insahchik wach, xa je' nik'ik kowlaj teew. Re' i korik wach ruk'ux reh ma' jaruuj naa rusahchiik wach. 26Re' móso ma' raaj ta kamanik ruti'kiil naah i rupatroon i ruyeew, je' naa ch'amlaj lamúnix i ruyeew panchii', eh je' naa sib' i ruyeew panaq'wach. 27Awach i ruyohleej i QaJaaw Dios intiqarik rooq i ruk'achariik. Eh re' taqe i yiib' wach kina'ojb'al naa rutoqariik rooq i kik'achariik. 28Re' taqe korik wach kik'ux xasuq i kik'achariik naa kojiik wii'. Eh re' taqe i yiib' wach kina'ojb'al naa rojiik sahchoq kiwach. 29Re' QaJaaw Dios i ruko'leej taqe i kib'anik reh i holohik chi b'anarik. Eh i rusach kiwach i kib'anik reh i yiib' wach chi b'anarik. 30Re' korik wach ruk'ux ma' jaruuj naa rojiik chi riij ruuk' i rub'an. Re' i yiib' wach runa'ojb'al, xama' naa ta wo' ruwihiik chupaam i ye'aab'. 31Re' korik wach ruk'ux holohik laj na'ojb'al taqe ruq'or. Eh re' i yiib' wach runa'ojb'al ma' holohik ta nq'orik, naa ruyok'iik i raaq'. 32Eh re' korik wach ruk'ux xa looq' inq'orik. Re' i yiib' wach runa'ojb'al, xama' toob' laj q'orik taqe i nelik cho panchii'.

will be added

X\