NUMEROS 9

1Chupaam i peet poh reh i rukab' haab' keliik chaloq i aj Israel pan tinamit Egipto, re' i QaJaaw Dios je' wili xuq'or reh i Moisés chupaam i ye'aab' chiq yuuq' Sinaí: 2Re' taqe i aj Israel koruman chi naa kik'sam i ninq'iij ruum keliik chaloq Egipto chupaam i q'iij nuq'orom chaloq. 3Iraaj ruq'orom chi naakik'sam chupaam i ruxq'eqiil i kajlaj rub'eeh i poh wili. Eh naa kianam chu'nchel nik' wach i rub'aan i nuq'orom keh, eh je' wo' rukab' i tz'ihb'amaj rehtaliil chupaam i nuk'uhb'aal, inki. 4Je' re' noq re' i Moisés xuq'or keh i aj Israel chi naa kininq'ijeem i keliik chaloq Egipto. 5Eh re' taqe i aj Israel xkininq'ijeej wo' hoq i keliik chaloq Egipto paruxq'eqiil reh i kajlaj rub'eeh i poh re' re' chupaam i ye'aab' chiq yuuq' Sinaí. Xkian wo' chu'nchel i xuq'or QaJaaw Dios reh i Moisés. 6Eh chupaam i q'iij re' re' kiib' ixib' taqe i winaq ma' xkian taj i ninq'iij re' re' ruum ch'uwa' kiwach ruum i rutz'a'jiik i kamnaq. Eh ruum chi ma' xkian tee ninq'iij re' re' xa chupaam wo' q'iij re' re' xiooj ruuk' i Moisés, eh ruuk' i Aarón. 7Je' wili xkiq'or: Re' hoj korik chi ch'uwa' qawach, ruum i rutz'a'jiik i kamnaq. Eh ¿Chib'ih reet noq xa ruum i re' ma' xye'arik ta q'ab' qeh chi xqaq'asaj i qamayiij chi kixilak i aj Israel chupaam i ninq'iij ruum i keliik cho Egipto? inki taqe. 8Eh re' i Moisés je' wili i xuq'or keh: Kinawuy-eej pee taq, amb'iraj peet reh i QaJaaw Dios chib'ih pa' nee ruq'or weh taq chawiij, inki. 9Eh re' i QaJaaw Dios je' wili i xuq'or reh i Moisés: Re' hat cha q'or keh i aj Israel, 10chi chu'nchel i kak'uun, kiih kimaam i aj Israel ma' xkian taj i ninq'iij xb'aan ruum i keliik cho Egipto ruum i ruch'uwa'iil kiwach ruum i rutz'a'jiik i kamnaq, oon chi wilkeeb' poo panb'iyajo chi najt yuuq koruman chi naa kianam. 11Xa re' la' ko paruxq'eqiil reh i kajlaj rub'eeh i rukab' poh reh i rukab' haab' naakininq'ijeem. Eh chi naakik'uxum k'ahlaj rax i chaaj, ruuk' i kaxlanwi'k ma' kojooj ta ch'amb'eesb'al reh. 12Eh ma' xtaj i rutib'kaal i mayijimaj chikop naakikanaam chi kochi junwaar ta neenkik'ux, eh ma' naa ta wo' kitoqom jino'q i rub'aqil i chikop re' re'. Eh naa wo' kianam i ninq'iij ruum ikeliik cho Egipto je' rukab' rub'aan i nuq'orom keh. 13Eh awach i xaraaj chi ma' xub'an taj i ninq'iij re' re', eh ma' xta wo' naq ruch'uwa'iil wach, eh ma' xta wo' ponoq panb'iyajo. Re' re' i ruk'ul chi naa rehtesjiik reje chi kixilak i ruch aj Israel, eh naa rutojom i ru mahk. Ruum chi ma' xuq'asaj taj i rumayiij paruq'ijil chi nuwach i hin, hin Dios. 14Eh re' taqe i tokoom tinamit wilkeeb' taq chaxilak nee wo' rub'an chi neenkininqijeej ikeliik cho Egipto i aj Israel ye'b'al nuloq'il i hin. Xa re' la' koruman chi naa rub'anam nik' wach i rub'aan i ninq'iij nuq'orom. Eh naa rub'aan chu'nchel, je' chi keh i tokoom tinamit, je' wo' taq cha weh i hat i aj Israel, inki. 15Chupaam i q'iij noq xkorjik i santo laj itz'ihy naah paat re' i moloj wii' i k'uhb'aal, pan q'iij suutz' i ruyeew cho riib' chinaah korehtaal inokik i q'iij. Eh chaq'ab' q'aaq' i ruyeew cho riib' chinaah i paat re' re' korehtaal insaq'ik. 16Eh rajlaal i q'iij i ruyeew cho riib' i suutz' chinaah i santo laj itz'ihy naah paat. Eh chaq'ab' q'aaq' i ruyeew cho riib' chinaah. 17Eh noq re' suutz' i nelik cho chinaah i santo laj itz'ihy naah paat re' taqe i aj Israel inkuksaj chaloq, eh inkuksaj cho chu'nchel i kiye'aab', eh inkichop wo' chik cho kib'eeh. Eh aha' imponik pahoq i suutz' ar inkiyejaa' ki-itz'ihy naah paat i aj i Israel. 18Eh noq inq'orarik keh ruum i QaJaaw Dios i aj Israel chi naa kichopom cho kib'eeh kichalik wo' hoq, eh noq i nq'orarik keh chi naa kikahnik ar, kikahnik wo' ar nik' najtiil i rub'an i suutz' chinaah i santo laj itz'ihy naah paat. 19Eh noq re' i suutz' najt i rub'an chinaah i santo laj itz'ihy naah paat. Re' taqe i aj Israel ma' kielik ta wo' cho ar, xkian wo' hoq je' rukab' i xuq'or i Dios. 20Eh noq re' suutz' xama' k'ih ta laj q'iij i rub'an chinaah i santo laj itz'ihy naah paat. Noq inq'orarik keh ruum i QaJaaw Dios chi naa kichopom chee kib'eeh kichalik wo' hoq, eh noq i nq'orarik keh chi konaakikahniik ar, kikahnik wo' hoq. 21Wilik pech noq xa jinaj aq'ab' i rub'an i suutz' chinaah i santo laj itz'ihy naah paat, eh parusaq'iik i nelik wo' chik. Eh re' taqe i aj Israel inkichop wo' chik cho kib'eeh. Nik' wach inki a'n pan q'iij je' wo' re' inki a'n chaq'ab' noq i nelik chee suutz' inkichop cho kib'eeh. 22Eh wilik pech noq re' suutz' inwihik kiib'-oq q'iij, jino'q poh, oon jino'q haab' chinaah i santo laj itz'ihy naah paat, xama' i kichop ta wo' chaloq i kib'eeh. Eh noq i nelik i suutz' jumehq'iil inkichop chee kib'eeh. 23Eh noq i ruq'or i QaJaaw Dios keh i aj Israel chi konaa kikahniik ko kikahnik wo' hoq. Eh noq inq'orarik keh chi naa kichopom chee kib'eeh kielik wo' chaloq. Eh xkian wo' hoq nik' wach i xuq'or QaJaaw Dios reh i Moisés.

will be added

X\