NUMEROS 8

1Re' i QaJaaw Dios je' wili xuq'or reh i Moisés: 2Re' hat cha q'or reh i Aarón kajaaw i k'amal kib'eeh aj tiij noq naa rutusum wach wuquub' chi saqumb'al ar naakisihq'iniik reje chuwach i ye'aab' kantela wuquub' i naah, inki. 3Eh re' i Aarón xub'an wo' hoq i xuq'or QaJaaw Dios reh i Moisés xutus wo' kiwach i saqumb'al reh chi ar sihqinik reje chuwach i ye'aab' kantela. 4Re' i ye'aab' kantela re' re', oro korjinaq wii' ch'eyooj wach chi korik ruuk' tuhyb'al kalawux xelik johtoq ko chi raa' xponik ko chi ju' tz'apaab' wach ruhtz'ub'aal, xuye'jaa' wo' chi korik je' rukab' i xq'orarik reh i Moisés ruum i QaJaaw Dios. 5Re' i QaJaaw Dios je' wili xuq'or reh Moisés: 6Re' hat cha sik' kiwach i aj Levíta chi kixilak i aj Israel nee nasaqb'isaj kiwach. 7Je' wili i naa a'nam chi saqb'eesb'al kiwach naa achihkaam wach kinaah i ha' inkamanik chi saqb'eesb'al wachiis. Eh naa aq'orom keh chi naa kijoyom chu'nchel i kismaal jun pa'lik. Naa wo' kitz'ajam i kiso' reh chi nee kikahnik chi saq kiwach. 8Eh chi riij i re' naa kiq'asam chi kimayiij jinaj i k'isa imas wakax. Eh k'isiin i holohik laj arina xilakimaj ruuk' aseite, eh jinaj wo' chik i k'ijol wakax naakiq'aasam chi mayiij pahqb'al kuyb'al mahk. 9Eh re' naa aq'orom keh i aj Levíta chi naakijilim i koq kiib' chi chii' i santo laj itz'ihy naah paat molb'al iib'. Eh nee wo' namol kiwach i chu'nchel i aj Israel. 10Eh noq kimolom chik kiib' chi nuwach i aj Levíta chu'nchel i aj Israel naakiye'em i kiq'ab' chikinaah i aj Levíta. 11Eh re' i Aarón naa ruq'asam, chi nuwach i hin, hin ki Dios taqe i aj Levíta chi jilow kimayiij taqe i aj Israel reh chi naa kianam i nukamaj. 12Re' taqe i aj Levíta naakiye'em i kiq'ab' wach kinaah taqe i kiib' chi k'ijol wakax, jinaj i naa kiq'asam chi mayiij chi nuwach reh pahqb'al kuyb'al mahk. Eh jinaj i naa kiq'asam chi k'atoj mayiij chi riij i kimahk i aj Levíta. 13Eh naa aq'asam taqe i aj Levíta chuwach i Aarón, eh chikiwach i rak'uun. Eh noq wilkeeb' chik ar naa kiq'asam chi mayiij chi nuwach i hin, hin Dios. 14Chi je' re' naa taqe awesam chi kixilak i aj Israel taqe aj Levíta reh chi nee kikahnik chi weh taqe. 15Eh chi riij i re', re' taqe i aj Levíta naa rojiik kianam i kikamaj chupaam i santo laj itz'ihy naah paat molb'al iib'. Re' hat inchol asaqb'isam kiwach, eh naa taqe aq'asam chi nuwach chi jinaj nim wach mayiij. 16Re' taqe i aj Levíta xnusik' cho kiwach chi kixilak i aj Israel reh chi naa kianam i nukamaj. Re' hin xnuk'ul chi jilow taqe i peet kak'uun, chu'nchel i aj Israel. 17Ruum chu'nchel i peet kak'uun i aj Israel, je' wo' i peet kak'uun i kichikoop, xa re' wo' noq xi kahnik chi weh noq xnukansaj taqe chaloq chu'nchel i peet kak'uun i aj Egipto, i peet rak'uun i kichikoop. Ar xnuko'leej kiij chi weh taqe chu'nchel i peet kak'uun i aj Israel. 18Je' re' noq yu'naak xnusik' kiwach i aj Levíta chi weh taqe chi kijilow i peet kak'uun i aj Israel. 19Re' hin xnusik' kiwach i aj Levíta chi kixilak i aj Israel xnukoj taqe chi to'ool reh i Aarón, chi to'ool keh i rak'uun reh chi naa kianam i nukamaj chupaam i santo laj itz'ihy naah paat molb'al iib'. Re' chi neenkireq kuyb'al kimahk wuuk' chu'nchel i aj Israel. Reh chi ma' xtaj i ti' k'axik neen kik'ul, neenkijil i koq kiib' ruuk' i santo laj itz'ihy naah paat inki i Dios. 20Eh re' i Moisés, re' i Aarón, eh chu'nchel i aj Israel, xkian wo' kuuk' i aj Levíta i xuq'or i QaJaaw Dios reh i Moisés. 21Eh re' taqe i aj Levíta xkisaqb'isaj wo' kiib' xkitz'aj wo' hoq i kiso'. Eh re' i Aarón xq'asanik keh chi nimaq wach mayiij chuwach i QaJaaw Dios. Eh xuq'asaj wo' hoq i mayiij chikiij saqb'eesb'al kiwach. 22Eh chi riij taqe re' i aj Levíta xooj wo' kian i rukamaj i Dios chupaam i santo laj itz'ihy naah paat molb'al iib', eh re' i Aarón xk'amwik kib'eeh ruch'ihil taqe i rak'uun. Eh nik' wach i xuq'or Dios reh i Moisés chikiij i aj Levíta je' wo' re' i xb'aan kuuk'. 23Re' i QaJaaw Dios je' wili xuq'or reh i Moisés: 24Re' taqe i aj Levíta noq naakitik'aam i nukamaj chupaam i santo laj itz'ihy naah paat molb'al iib' wilik keh i hoob' ru ka'winaq haab'. 25Eh noq naakiponiik lajeeb' roxk'ahl haab' naa wo' chik kikanaam rub'aan i nukamaj ma' jaruuj chik naa kianam chi jumpech. 26Eh nee wo' rub'an chi neenkitow i kuch aj Levíta ruuk' i xa chib'ih i kamanik imb'aan chupaam i santo laj itz'ihy naah paat molb'al iib'. Xa re' la' ma' naa ta chik kianam i kamanik je' rukab' inki a'n cho pampeet. Re' hat je' re' ruyejeb'jiik i kikamaj i aj Levíta naa a'nam, inki weh i Dios.

will be added

X\