NUMEROS 36

1Re' Galaad rak'uun i Maquir, re' Maquir i rak'uun i Manasés, re' i Manasés rak'uun José. Re' taqe i k'amal kib'eeh i kiih kimaam taqe re' xiooj chi q'orob'jiik i Moisés ruch'ihil i k'amal kib'eeh i aj Israel, 2je' wili i xkiq'or reh: Re' QaJaaw Dios xuq'or aweh i hat Moisés chi konaa rusik'ariik chi riij noq naa ach'aqam qeh i ye'aab' aha' wilik i naa rukahniik qeh chi qach'uhqaal i hoj aj Israel. Eh xuq'or wo' aweh chi re' ruye'aab' naq Zelofehad i ma' tokoom ta quuk' naa ruye'ariik keh taqe i rixq'uun. 3Xa re' la' chik imb'anik reh wila' xkian kaxáro ruuk' i winaq aj pan tokoom ch'uq chi aj Israel, re' i ye'aab' neenkahnik keh, naa rukahniik chi ma' re' ta chik ruuk' i qa ye'aab' i hoj. Naa la' rukahniik chi re' ruuk' i kiye'aab' aha' nakianam kaxáro. Eh re' i qaye'aab' naaqehchaam i hoj ma' manlik ta chik wach neenkahnik. 4Eh noq naa ruponiik i haab' reh elik panti' k'axik ayu' Israel. Re' i kiye'aab' taqe i rixq'uun i Zelofehad naa rukahniik keh i jun ch'uq aha' i nakianam wii' kaxáro, ma' re' ta chik ruuk' ye'aab' reh i qach'uhqaal i hoj naa rukahniik inki taqe. 5Re' Moisés xuq'or keh i aj Israel chib'ih jariik i xq'orarik reh ruum i QaJaaw Dios, je' wili i xuq'or: Re' taqe i k'amal kib'eeh i ju'jun ch'uq chi riih rumaam i José rub'ehel chi je' re' inkiq'or. 6Re' i QaJaaw Dios xuq'or chi naa ruye'em q'ab' chi xa awach aj uuk' naa kianam kaxáro taqe i rixq'uun i Zelofehad, xa re' la' koruman chi re' wo' ruuk' i kitinamiit re' ruuk' i ruch'uhqaal i kajaaw. 7Eh re' i ye'aab' naakehchaam i ju'jun ch'uq chi aj Israel ma' nee ta rub'an chi neenkahnik keh i tokoom ch'uq. Chu'nchel i aj Israel inchol kik'axam i kiye'aab' chupaam i ruch'uhqaal i kitinamiit. 8Re' jino'q ixoq neerehchaaj i ruye'aab' inchol rub'anam kaxáro ruuk' i winaq, re' wo' ruuk' i ruch'uhqaal rutinamiit i rajaaw. Je' re' noq re' i ju'jun ch'uq chi aj Israel re' wo' chik i keh naa kehchaniik reh i ye'aab' keh chaloq i kimaam kati't. 9Ma' jino'q i kiye'aab' naakehchaam tokoom chik ch'uq naa rehchaniik reh. Re' ju'jun chuq chi aj Israel inchol ruk'axam i ruye'aab' aha' wilik wii' inki. 10Nik' wach i xuq'or i Dios reh i Moisés je' wo' re' i xkian i rixq'uun i Zelofehad. 11Je' re' noq re' Maala, re' i Tirsa, re' Hogla, re' i Milcá re' i Noa, re' taqe i rixq'uun i Zelofehad kuuk' i rak'uun i kikaan xkian kaxáro. 12Xkian wo' kaxáro kuuk' i riih rumaam Manasés, kuuk' riih rumaam i José. Eh re' i kiye'aab' xkehchaaj xkahnik wo' hoq chi reh i ruch'uhqaal i rutinamiit i kajaaw. 13Re' taqe i wili i xuq'or, i k'uhb'aal xukanaa' i QaJaaw Dios reh i Moisés, reh chi xuq'or keh i aj Israel ar wach k'ixkaab' Moab chi chii' i nim ha' Jordán chi k'ulwaach i tinamit Jericó.

will be added

X\