NUMEROS 28

1Re' QaJaaw Dios je' wili i xuq'or reh i Moisés: 2Re' hat cha q'or keh i aj Israel chi juneliik neen kiyeew paruq'ijil i kik'atoj mayiij, je' wo' hoq chi kimayiij i kaxlanwi'k. Re' taqe ink'ohnik laj mayiij re' re' imponik chi nuwach i hin. 3Eh je' wili i neenaq'or keh: Re' taqe wili i k'atoj mayiij naa aq'asam taq reh i QaJaaw Dios chi juneliik, rajlaal q'iij taq naa aq'asam kiib' chi imas tentzun ju'jun haab' i wilik keh, eh manlik wach i kiti'jolal. 4Jinaj keh imas tentzun naa taq aq'asam wahq'eq, eh jinaj i naa taq aq'asam xq'eq. 5Eh naa taq aq'asam chi mayiij ruch'ihil i tentzun ik'inaq waxiqiib' libra chi holohik laj arina xilakimaj ruuk' i jinaj nimlaj lemeta chi aseite oliva. 6Eh re' wo' hoq i mayiij wili ink'atarik chi juneliik chinaah i yuuq' Sinaí. Re' i q'e' ink'ohnik laj mayiij q'e' imponik chuwach i QaJaaw Dios. 7Eh chi ruk'u'liil i ju'jun chi k'atoj tentzun naa wo' taq aq'asam chi amayiij jinaj nimlaj lemeta chi riis uuva. Re' riis i uuva re' re' naa ruchihkjiik chupaam i santo laj ye'aab' ye'b'al ruloq'il i QaJaaw. 8Eh re' tentzun naa taq aq'asam chi mayiij xq'eq naa taq aq'asam chiruk'uliil i holohik laj arina ruch'ihil i riis uuva je' wo' k'ihaal i naa taq aq'asam chi ruk'u'liil ak'atoj mayiij naa taq aq'asam wahq'eq. Re' taqe i mayiij re' re' q'e' ink'ohnik imponik chuwach i Dios, tiko'q keh inki. 9Eh re' i mayiij taq naa aq'asam chupaam taqe i hi'limb'al q'iij kiib' chi imas tentzun aj ju'jun haab' manlik wach i kiti'jolal. Eh naa taq aq'asam i k'isiin ma' b'elejeeb' libra chi holohik laj arina xilakimaj ruuk' aseite, eh riis uuva. 10Re' taqe i k'atoj mayiij wili naa taq aq'asam chupaam taqe i hi'limb'al q'iij naa wo' aq'asam taq chi ruk'u'liil i holohik arina, eh riis uuva naa taq aq'asam rajlaal i q'iij. 11Eh pank'amb'al rub'eeh i ju'jun chi poh kiib' i kok' imas wakax taq naa aq'asam chi k'atoj mayiij chuwach i QaJaaw Dios. Jinaj imas tentzun, eh wuquub' i tentzun ju'jun haab' i wilik keh, eh manlik wach i kiti'jolal. 12Eh re' ju'jun chi imas wakax naa taq aye'em chi ruk'u'liil i waqiib' libra chi holohik arina xilakimaj ruuk' aseite. Eh re' ju'jun chi imas tentzun, naa taq aq'asam chi ruk'u'liil kijib' libra chi arina, xilakimaj ruuk' aseite. 13Eh re' i ju'jun chi kok' imas tentzun naa taq aq'asam chi ruk'u'liil i ki'ib' libra chi holohik laj arina, xilakimaj ruuk' aseite. Re' taqe i k'atoj mayiij wili q'e' k'ohnik imponik chuwach i QaJaaw Dios ye'b'al ruloq'il. 14Re' i ju'jun chi imas wakax ruk'u'liil ka'kab' nimaq lemeta chi riis uuva. Eh re' ju'jun chi imas tentzun ruk'u'liil i wilik rukab' nimaq lemeta chi riis uuva. Eh re' ju'jun chi tentzun ruk'uliil i jinaj nimlaj lemeta chi riis uuva. Re' taqe i wili i k'atoj mayiij naa taq aq'asam i ju'jun chi poh reh i haab'. 15Eh chi riij taqe i k'atoj mayiij taq naa aq'asam rajlaal i q'iij ruch'ihil i riis uuva, ko jinaj taq chik imas kaprax naa taq aq'asam chuwach i QaJaaw Dios pahqb'al kuyb'al taq amahk. 16Chupaam i kajlaj rub'eeh i peet poh reh i haab' naa taq aninq'ijeem aweliik chaloq Egipto ye'b'al ruloq'il i QaJaaw Dios. 17Eh chupaam i ho'lajuuj rub'eeh i poh re' re' naa taq a'nam i nim wach ninq'iij. Eh wuquub' q'iij taq naa ak'uxum i kaxlanwi'k ma' kojooj ta ch'amb'esb'al reh. 18Eh chupaam i peet q'iij naa taq a'nam jinaj i santo laj moloj iib'. Eh ma' jino'q taq aweh i naa rukamaniik. 19Eh kiib' i kok' imas wakax jinaj imas tentzun, wuquub' tentzun ju'jun haab' i wilik keh, manlik wach kiti'jolal naa taq aq'asam chi k'atoj mayiij chi nuwach i hin. 20Eh naa wo' taq aq'asam chi amayiij i holohik laj arina xilakimaj ruuk' aseite. Ik'inaq oxlaj libra chi ruk'u'liil i ju'jun chi kok' imas wakax. Eh k'isiin ma' b'elejeeb' libra arina taq i naa aq'asam chi ruk'u'liil imas tentzun. 21Eh re' i ju'jun chi tentzun naa wo' taq aq'asam chi ruk'u'liil ik'inaq kijib' libra chi holohik laj arina xilakimaj ruuk' aseite. 22Eh koruman wo' hoq chi naa taq aq'asam chi amayiij i jinaj i kaprax k'amb'al taq awiib' panotob'il wuuk' i hin. 23Re' taqe i mayiij wili naa taq aq'asam noq aq'asam taq chik i k'atoj mayiij pantaq wahq'eq re' inq'ahtesjik chi juneliik. 24Re' taqe i k'atoj mayiij re' re' wuquub' q'iij taq naa aq'asam noq k'ahchi' i ninq'iij. Re' taqe i k'atoj mayiij wili naa taq aq'asam chi ye'b'al nuloq'il ink'ohnik laj mayiij q'e' imponik chi nuwach i hin. Eh naa wo' taq aq'asam i k'atoj mayiij rajlaal i q'iij, je' wo' hoq i riis uuva. 25Eh paruwuuq q'iij reh i ninq'iij naa wo' taq a'nam i santo laj moloj iib' ye'b'al nuloq'il i hin, eh ma' jino'q taq aweh i naa rukamaniik. 26Eh noq naa taq aninq'ijeem i peet wach taq atik amu'uun, noq naa taq aq'asam chi amayiij chi nuwach i hin, naa taq a'nam i santo laj moloj iib' ye'b'al nuloq'il. Eh chupaam i q'iij re' re' ma' jino'q taq aweh i naa rukamaniik. 27Eh naa taq aq'asam chi nk'ohnik amayiij chi nuwach i hin i kiib' chi kok' imas wakax, eh jinaj imas tentzun, eh wuquub' chi tentzun, ju'jun haab' i wilik keh. 28Eh chi ruk'u'liil i ju'jun chi imas wakax naa taq aq'asam ik'inaq oxlaj libra chi holohik laj arina xilakimaj ruuk' aseite. Eh chi ruk'u'liil imas tentzun naa taq aq'asam i k'isiin ma' b'elejeeb' libra chi arina, xilakimaj ruuk' aseite. 29Eh chi ruk'u'liil i ju'jun chi imas tentzun naa taq aq'asam ik'inaq kijib' libra chi arina xilakimaj ruuk' aseite. 30Eh koruman wo' hoq chi naa taq aq'asam chi ak'atoj mayiij jinaj i kaprax pahqb'al taq kuyb'al amahk. 31Re' k'atoj mayiij wili noq naa taq aq'asam naa wo' taq aq'asam chi ruk'u'liil i arina ruch'ihil i riis uuva. Eh naa wo' taq aq'asam i k'atoj mayiij rajlaal q'iij. Eh re' taqe i chikop naa aq'asam manlik wach i kiti'jolal.

will be added

X\