NUMEROS 25

1Re' taqe i aj Israel noq xi okik chi wihik ar Sitim re' taqe i winaq xkitoq'aa' k'oyomal kuuk' taqe ixoq aj Moab. 2Re' taqe ixoq re' re' inkiyuq'eej taqe aj Israel chuk'uxariik i mayiij inkiyeew chuwach i tiyoox Baal-peor. Eh inkixuk'aa' kiib' chuwach i tiyoox re' re'. 3Je' re' noq xkikanaa' kiib' chi xik'amarik reje chi looq'jiik i tiyoox Baal-peor. Ruum i re', re' QaJaaw ma' k'isiin ta xchalik rujosq'iil chikinaah i aj Israel. 4Eh re' i QaJaaw Dios, je' wili i xuq'or reh i Moisés: Re' hat chamol kiwach chu'nchel i winaq k'amal kib'eeh i aj Israel, neenajihk'aaj chi kalaq parusaqumaal i q'iij chi nuwach reh chi neenik'ik i nujosq'iil chikinaah i aj Israel, inki. 5Re' i Moisés xuq'or wo' keh i q'atal q'orik chikinaah i ju'jun ch'uq chi aj Israel chi naa kikansam taqe awach i xi k'amarik reje chi looq'jiik i tiyoox Baal-peor. 6Eh jinaj i winaq aj Israel xuk'am reje chi riij parupaat jinaj ixoq aj Madián. Chuwach i Moisés, eh chikiwach wo' chu'nchel i aj Israel kimolom kiib' noq oq'ik inki a'n panookb'al reh i santo laj itz'ihy naah paat molb'al iib'. 7Eh re' Finees i rak'uun i Eleazar, eh riih i Aarón kajaaw i aj tiij noq xrilow chib'ih i xub'an i winaq xelik reje chi kixilak i aj Israel kimolom kiib' ar xooj ruchop i ruq'as laj ch'ihch'. 8Eh xutahqeej reje i winaq aj Israel aha' wilik i ru-itz'ihy naah paat. Eh ar xusach wach i winaq xrik'saj i ruq'aslaj ch'ihch' chupaam, eh je' wo' re' i xub'an reh ixoq. Ruuk' i re' xhi'lik wach i kaq yab'ilaal k'achi' rukansanik keh i aj Israel. 9Xa re' la' kamnaq wo' chik taqe i kijib' ru ka'winaq miil chi aj Israel ruum i kaq yab'ilaal. 10Re' i QaJaaw Dios je' wili xuq'or reh: i Moisés 11Ruuk' i xub'an i Finees rak'uun i Eleazar re' i rak'uun i Aarón xujot'isaj wach i nujosq'iil chikinaah i aj Israel, ruum re' reh raaj chi xa re' hin nee kinaloq'ej, je' rukab' i nukapaaj i hin ruum aj re' majaa' i nusach kiwach chu'nchel i aj Israel. 12Je' re' noq cha q'or reh i Finees chi re' hin kinq'orik chi neerub'an chi nee ruk'am riib' panotob'il wuuk'. 13Re' hin naa nuye'em q'ab' reh chi naa rukahniik chi k'amal kib'eeh aj tiij. Eh naa kikahniik chi k'amal kib'eeh aj tiij taqe i riih rumaam, ruum re' reh iraaj chi xa re' hin naa nulooq'jiik. Ruum chi xuyeew i k'atoj mayiij chikiij i aj Israel, inki. 14Eh re' i aj Israel xkanteesjik ruch'ihil ixoq aj Madián, Zimri i rub'ihnaal, rak'uun Salu re' i k'amal kib'eeh taqe i riih rumaam i Simeón. 15Eh re' ixoq aj Madián xkanteesjik Cozbi rub'ihnaal, rixq'uun i Zur k'amal kib'eeh i junch'uq chi aj Madián. 16Re' i QaJaaw Dios je' wili i xuq'or reh Moisés: 17Re' taq i hat aj Israel, hiy taq chi q'aq'inik kuuk' i aj Madián korehtaal taq i na a'n keh. 18Ruum re' keh xkian taq aweh, ruuk' jot'ooj taq xat kimin chi rulooq'jiik i kitiyoox Baal-peor rub'ihnaal. Re' wo' keh kik'amwik b'eeh ruuk' i ma' holohik taj xub'an ixoq Cozbi re' rixq'uun i k'amal kib'eeh i junch'uq chi aj Madián. Re' ixoq xkanteesjik ruuk' q'aslaj ch'ihch', noq xnutaq'aaj chaloq i runimaal yab'ilaal ruum xaloq'ej taq tiyoox re' re', inki.

will be added

X\