NUMEROS 23

1Eh re' i Balaam je' wili i xuq'or reh i Balac: Re' hat ayu' naa ayejaam weh i wuquub' chi artaal, eh nee nak'am cho weh i wuquub' chi imas wakax, eh wuquub' chi imas tentzun, inki. 2Eh re' Balac xub'an wo' hoq i xq'orarik reh ruum i Balaam. Eh pankib'al xkik'at i ju'jun chi imas wakax i ju'jun chi imas tentzun chinaah i ju'jun chi artaal. 3Eh re' i Balaam je' wili i xuq'or reh i reey Balac: Re' hat tikaan pee kahnoq ruuk' i mayiij, re' hin naa wojiik chi rilariik, xk'ulik-oq chi wula'jiik i QaJaaw Dios. Eh xa chib'ih pa' jariik i nee ruyeew weh chi naab'jik neenuq'or aweh, inki. Eh xooj chinaah jinaj i yuuq' ma' xta ch'ahn chuwach. 4Eh re' i QaJaaw Dios ar xk'ulik rula'eej i Balaam, re' i Balaam je' wili xuq'or: Re' hin wuquub' i artaal xnuyeew chi korb'eesjik. Eh chikinaah i ju'jun i artaal ju'jun imas wakax, eh ju'jun imas tentzun xnuk'at chi mayiij, inki. 5Re' i QaJaaw Dios xuq'or reh i Balaam i naa ruq'orom, je' wili xuq'or: Hiy wo' chik aha' wilik chaloq i Balac eh cha q'or reh i xnuq'or aweh, inki. 6Eh re' Balaam sutinik wo' reje eh xponik rureq i reey Balac chi pa'lik i koq ruuk' i mayiij k'ahchi' ruk'ahtiik ruch'ihil taqe ar i k'amal kib'eeh i aj Moab. 7Re' Balaam je' wili i xuq'or parutz'uuy. Re' i Balac kireey i aj Moab ko ar Aram xutaq'aaj nuk'amariik xinik'ik cho chinaah taqe i yuuq' wilkeeb' chi korkiil reje i reelb'aal q'iij, je' wili i xuq'or: Kim k'oloq apahqaaj i ma' holohik taj chikinaah i aj Israel, re' taqe i riih rumaam i Jacob, inki weh. 8Eh ¿Nik' wach nupahqaam i hin i ma' holohik taj chikinaah taqe i rukuxisam i Dios? ¿Nik' wach nuq'eb'em i hin i ma' xiq'eb'arik ta ruum i Dios? 9Ruum re' hin kochinaah i yuuq' wilik wii' taqe nimaq ab'aj inwilow reje. Eh kochinaah taqe inajt kinaah yuuq' wili inwilow reje i tinamit Israel chi sik'ooj kiwach, ma' je' ta kikab' i tokoom i tinamit. 10Re' taqe i riih rumaam i Jacob ma' awach ta neenkuywik kajaljiik, je' kik'ihaal saniib'. Re' hin q'e' naq inwaaj chi nee kinkimik chi je' rukab' noq kikimik taqe i korik wach kik'ux, inki Balaam. 11Eh re' i reey Balac, je' wili i xuq'or reh i Balaam: ¿Chib'ih jariik i k'ahchi' kaat? Re' hin xat nuk'am chaa yu' reh chi naa apahqaam i ma' holohik taj chikinaah i aj Israel, ki-ixowanik nuwach. Eh re' hat holohik chik inchel i k'ahchi' apahqaam chikinaah, inki. 12Re' i Balaam je' wili ruchaq'weesjiik xub'an: Re' hin xnuq'or aweh chi xa re' wo' naa nuq'orom aweh i naa ruq'orom weh i QaJaaw Dios, inki. 13Eh re' reey Balac je' wo' chik wili i xuq'or reh i Balaam: Re' hat taq chi wiij pan jino'q chik tokoom ye'aab' aha' xa re' i chi junsuut i ki-itz'ihy naah paat i aj Israel ink'utinik. Ma' nee ta nawil kiwach chi korik, ar neenapahqaaj i ma' holohik taj chikinaah, inki. 14Eh re' i Balac xuk'am wo' reje i Balaam chupaam i ye'aab' Zofim wilik chinaah i yuuq' Pisga, eh ar xuyejaa' i wuquub' chi artaal, chinaah i ju'jun chi artaal re' re' xuk'at i ju'jun chi kok' imas wakax, eh ju'jun imas tentzun. 15Eh noq wilkeeb' ar, re' Balaam je' wili i xuq'or reh i reey Balac: Re' hat tikaan pee kahnoq ruuk' i mayiij, eh re' hin naa rojiik nuqoreem i QaJaaw Dios, inki. 16Eh re' i QaJaaw Dios xk'ulik wo' chik chi q'orob'jiik i Balaam xuq'or wo' reh i naa ruq'orom. Eh je' wili i xuq'or reh: Re' hat ti sutinoq wo' chik reje aha' wilik wii' i Balac, re' wo' chik neenaq'or reh i xnuq'or aweh pampeet, inkih. 17Re' Balaam xsutinik wo' reje ruuk' i reey Balac xponik rureq chi pa'lik i koq ruuk' i mayiij k'ahchi' ruk'ahtiik, eh ruch'ihil taqe i k'amal kib'eeh i aj Moab. Eh re' i Balac xupahqaaj reh i Balaam chi je' wili: ¿Chib'ih xuq'or i QaJaaw? inki. 18Eh re' i Balaam je' wo' chik wili i xuq'or parutz'uuy: Re' hat reey Balac rak'uun i Zipor chab'iraj chi korik i naa nuq'orom aweh. 19Re' i QaJaaw Dios ma' re' taj jino'q winaq chi neenchukwik q'orik, eh chi neerujal wach i rukapeb'aal. Aha' wilik i ruq'or inooj eloq wach. Eh noq i ruq'or chi wilik i naa rub'anam i rub'an wo' hoq. 20Re' hin xuq'or weh i Dios chi naa nukuxisam i tinamit Israel. Eh re' hin ma' nee ta rub'an chi nee nujal wach i xuq'or weh. 21Eh ma' xtaj i jot'ooj k'ahchi' keeb' i aj Israel re' taqe i riih rumaam i Jacob. Re' i kaJaaw ki Dios wilik kuuk' chi juneliik, eh inkiloq'ej chi kireey. 22Re' wo' hoq i ki Dios x-esanik cho keh pan tinamit Egipto. Eh xuyeew kikowiil, je' kowiil imas wakax wilik pan raxchee'. 23Eh ma' awach taj i ma' holohik ta nee nq'orik chikiij, ma' jino'q i aj q'iij ma' holohik ta nee nq'orik chikiij i aj Israel. Je' la' wili i ruk'ul chi neen q'orariik chikiij: Chakoj taq rehtaal chi re' Dios ma' k'isiin ta xukuxisaj i tinamit Israel, inko'q taqe. 24Re' taqe i aj Israel yohb'aal wach i kijosq'iil, eh ma' naa ta kihi'lik korehtaal inkisach wach i nixowanik kiwach. Eh je' rukab' i rub'an i kaq b'ahlam noq i ruchop i rutiib' korehtaal i rutz'ap wach, eh i ruk'ej haa' i kik', inki. 25Eh re' i reey Balac je' wili xuq'or reh i Balaam: Ruum chi ma' xuyeew ta riib' chi xapahqaaj i ma' holohik taj chikinaah i aj Israel, maa pahqaaj wo' i holohik chikinaah, inki. 26Re' Balaam je' wili ruchaq'weesjiik xub'an: Re' hin nuq'orom aweh chi xa re' wo' naa nub'anam i naa ruq'orom weh i QaJaaw Dios, inki. 27Eh re' reey Balac je' wili ruchaq'weesjiik xub'an: Re' hin i nuq'or aweh chi nee tiooj chi wiij pan jino'q chik ye'aab', ma' nee ta oon naq inchenyoj ruk'ux i Dios chi ar nee napahqaaj i ma' holohik taj chikinaah i aj Israel, inki. 28Je' re' noq re' i Balac xuk'am reje i Balaam kochinaah i yuuq' Peor, re' ink'utinik cho wii' chu'nchel i chiq yuuq'. 29Eh ar re' i Balaam, je' wili i xuq'or reh i Balac: Yu'naak i hat cha yejaa' weh ayu' wuquub'-oq i artaal, eh nee nak'am chaloq i wuquub' chi kok' imas wakax, eh wuquub' imas tentzun, inki. 30Re' reey Balac xub'an wo' hoq i xq'orarik reh ruum i Balaam. Eh chinaah i ju'jun chi artaal xuk'at chi mayiij i ju'jun imas wakax, eh ju'jun imas tentzun.

will be added

X\