NUMEROS 18

1Re' i QaJaaw Dios, je' wili i xuq'or reh i Aarón: Wila' awach ch'uwarisanik paam i nuSanto laj itz'ihy naah paat, wach anaah i hat, wach kinaah awak'uun, wach kinaah i riih rumaam i Leví naa rukahniik i mahk. Eh wila' xa a'n taq i mahk ruuk' taq akamaj hat taq k'amal kib'eeh aj tiij wach anaah taq i hat, eh wach kinaah taq awak'uun naa rukahniik. 2Eh neerub'an chi neenaq'or keh taqe i re' ruuk' i junch'uq chi riih rumaam i Leví re' ruuk' awach keh chi nee tikitow i hat, ruch'ihil taqe i awak'uun noq nee taq i na a'n i kamanik chuwach i santo laj itz'ihy naah paat i molarik wii' i k'uhb'aal. 3Re' taqe re' neerub'an chi nee tikitow, chub'anariik i kamanik chupaam i itz'ihy naah paat. Xa re' la' ma' naa ta kijilim i koq kiib' kuuk' chu'nchel i wilik kisantohiil kikamanik ar, je' wo' ruuk' i artaal. Ruum wixkijil i koq kiib' nee kikimiik i keh, je' wo' taq i hat. 4Re' keh neerub'an chi nee tikitow chi rub'anariik i kamanik chupaam i santo laj itz'ihy naah paat molb'al iib', xa re' la' ma' jino'q chik i tokoom nerujil i koq riib' taq awuuk'. 5Eh xa re' wo' hat Aarón, re' taqe i awak'uun naa kib'aniik i kamanik chupaam i nuSanto laj itz'ihy naah paat, je' wo' wach artaal. Chi je' re' ma' nee ta chik inchalik nujosq'iil chikinaah chu'nchel i aj Israel. 6Re' hin xnusik' kiwach taqe, re' taqe i ma' tokoom ta taq awuuk' i riih rumaam i Leví reh chi nuyeew taq aweh i hat reh chi nee taq tikitob'eej chub'anariik i nukamaj chupaam i nuSanto laj itz'ihy naah paat molb'al iib'. 7Xa re' wo' hat, re' taqe i awak'uun naa taq akamaniik chi hat taq k'amal kib'eeh aj tiij chuwach i artaal, je' wo' hoq i nukamaj imb'aan i koq kochi juntar i itz'ihy tasb'al, xa re' wo' taq i hat naa ab'aniik reh. Re' hin nuye'em taq q'ab' aweh chi naa taq akamaniik chi hat taq k'amal kib'eeh aj tiij. Eh wila' awach i tokoom xumin i koq riib' chub'aan taqe i kamanik re' re' i ruk'ul chi naa rukanteesjiik, inki. 8Re' i QaJaaw Dios, je' wili i xuq'or reh i Aarón, re' hin naa nuye'em panaq'ab' rilariik chu'nchel i mayiij. Eh chu'nchel i mayiij q'e' looq' naakiqasam weh i aj Israel, re' hin naa nuye'em aweh i hat, je' wo' keh awak'uun. Re' wili naa nukanaam chi jinaj k'uhb'aal reh juneliik. 9Re' taqe i mayiij naa ruk'ahtiik wilik rusantohiil naa nuye'em aweh, je' wo' hoq i peet wach i tik, je' wo' hoq i mayiij tojb'al riij mahk, je' wo' hoq i mayiij pahqb'al kuyb'al mahk noq neenq'ehtjik jino'q i k'uhb'aal, je' re' noq chu'nchel i re' naa rukahniik aweh, eh keh awak'uun. 10Eh re' taq i hat k'amal b'eeh aj tiij re' taqe i mayiij re' re' naa ak'uxlaam taq wii' awiib'. Xa re' la' chupaam jino'q i ye'aab' santo taq naa ak'uxum ruum wilik kisantohiil. 11Eh naa wo' nuye'em aweh chu'nchel i mayiij naa kiq'asam i aj Israel, naa rukahniik cha weh i hat, eh chi keh taqe awak'uun awixq'uun neerub'an chi neenkik'ux keh chu'nchel i wilkeeb' pana paat xa re' la' mi ma' xta ruch'uwa'iil kiwach. Re' wili naa rukahniik chi jinaj k'uhb'aal reh juneliik. 12Eh naa wo' nuye'em aweh chu'nchel i peet wach i kitik naa kiq'asam chi kimayiij i aj Israel, je' wo' taqe i riis ki uuva, taqe i holohik aseite, taqe i peet wach i ki trigo naa kik'amam chaloq. 13Chu'nchel i peet wach i kitik naakiq'aasam weh chi kimayiij naa wo' nuye'em aweh. Eh nee wo' rub'an chi neenkik'ux keh chu'nchel i wilkeeb' panapaat, xa re' la' mi ma' chih ruch'uwa'iil kiwach. 14Je' re' noq naa nuye'em aweh chu'nchel i mayiij naa kiq'asam weh i aj Israel. 15Eh naa wo' nuye'em aweh i peet kak'uun i aj Israel, ruch'ihil i peet rak'uun i kichikoop naa kiq'asam weh chi kimayiij. Xa re' la' re' peet kak'uun i winaq ch'uwa' kiwach koruman chi naa kitojom riij, je' wo' hoq i peet kak'uun i chikop ma' kik'uxarik taj. 16Eh noq naa kitojom riij jinaj poh raasjiik ho'oob' chi tumiin naa kitojom wii' riij re' i rahlil, je' wo' rukab' pajooj imb'aan chupaam i nuSanto laj itz'ihy naah paat. 17Xa re' la' ma' naa ta ye'em q'ab' chi naa rutojiik riij i peet rak'uun i wakax, i peet rak'uun tentzun, i peet rak'uun i kaprax. Ruum re' taqe i chikop re' re' kanamaj chi weh taqe. Re' hat naa akansam taqe, eh re' kikik'eel naa achihkaam chinaah i artaal. Eh re' i kixeb'ohiil naa ak'atam chi nk'ohnik laj mayiij chi nuwach. 18Eh re' i kitib'kaal i chikop, i rutib'kaal i chi' kik'ux, i rusak'aaj kituuq naa kiq'asam chi nuwach chi mayiij naa nuye'em aweh. 19Eh chu'nchel i mayiij naa kiq'asam weh i aj Israel, naa nuye'em aweh i hat, keh awak'uun awixq'uun, keh awiih aamaam. Re' wili ma' naa ta rujaliik wach naa rukahniik chi k'uhb'aal chi juneliik cha weh i hat, chi keh awiih aamaam naa kiwihiik kahnoq chawiij, inki. 20Re' QaJaaw Dios, je' wili i xuq'or reh i Aarón: Re' hat ma' naa ta ruwihiik awak'aal, oon chib'ih aweh Israel, chi je' rukab' taqe i aj Israel wilik chib'ih keh. Xa re' la' wo' hin naa nuwihiik chi akooch ayu' Israel. 21Eh re' taqe i riih rumaam i Leví naa nuye'em chi kikooch i jinaj naa reliik ruuk' i lajeeb' chib'ih wilik keh i aj Israel chi tojb'al riij i kamanik naa kianam chupaam i santo laj itz'ihy naah paat molb'al iib'. 22Re' taqe i aj Israel ma' naa ta chik kijilim i koq kiib' ruuk' i santo laj itz'ihy naah paat molb'al iib'. Eh wila' xkijil i koq kiib' mahk i neenkian ruum i re' neenchalik i kimik chikinaah. 23Xa re' wo' taqe i aj Levíta naa kib'aniik i kamanik chupaam i santo laj itz'ihy naah paat molb'al iib'. Eh wila' awach i xuch'uwa'reej paam i wach kinaah i aj Levíta naa rukahniik. Re' wili naa rukahniik chi jinaj k'uhb'aal chi keh i tuutb'ees ajaab'ees, chi keh i kiih kimaam. Eh re' taqe i aj Levíta ma' naa ta ruwihiik kak'aal ayu' Israel. 24Re' hin naa nuye'em keh chi kikooch i jinaj naa reliik ruuk' i lajeeb' i wach i kitik naakiq'aasam chi kimayiij i aj Israel chi nuwach. Ruum aj re' xnuq'or chi ma' naa ta ruwihiik kiye'aab' ayu' Israel, inki. 25Re' i QaJaaw Dios je' wili i xuq'or reh i Moisés: 26Re' hat cha q'or keh i aj Levíta chi noq naakik'ulum reh taqe i aj Israel i ju'jun naa reliik chinaah i lajeeb' i wach i kitik. Re' i naakik'ulum re' re' naa wo' chik kesam i keh i lajeeb' chinaah i jinaj siento reh chi naakiq'aasam chi kimayiij chi nuwach i hin, inki 27Eh re' i kimayiij re' re' naa nuk'ulum i hin je' rukab' noq i nuk'ul i kimayiij taqe i aj Israel noq inkiq'asaj i wach i kitik, eh noq inkiq'asaj i riis i ki uuva. 28Eh re' taqe i aj Levíta noq naakik'ulum kuuk' i aj Israel i ju'jun naa reliik ruuk' i lajeeb' naa wo' chik kiq'asam weh hin i keh i lajeeb' naa kesam ruuk' i jinaj siento, eh naakiye'em reh i Aarón k'amal kib'eeh aj tiij. 29Eh aha' wilik i naakik'ulum inchol kikanaam k'isinoq chi weh i q'e' holohik. Re' re' i naa kiq'asam weh i hin. 30Eh nee wo' naq'or keh i aj Levíta noq kiq'asam chik i xti holohik naa nuk'ulum keh i kimayiij je' rukab' noq i nuk'ul i kimayiij i aj Israel re' peet wach i kitik re' i riis i ki uuva, re' i peet wach i ki trigo. 31Eh re' taqe i aj Levíta neerub'an chi xa aha' neenkik'ux i keh kuch'ihil taqe i kak'uun kixq'uun ruum re' re' kitojb'aal chi riij i kamanik naa kianam chupaam i santo laj itz'ihy naah paat molb'al iib'. 32Eh wila' re' taqe aj Levíta xkiq'asaj wee hin i xti holohik ma' xta kimahk, eh ma' nee ta nkich'uwa'reej wach i kisantolaj mayiij i aj Israel. Ruum wixkich'uwa'reej wach naa ruchaliik i kimik chikinaah, tiko'q keh, inki Dios.

will be added

X\