NUMEROS 15

1Re' QaJaaw Dios je' wili i xuq'or reh i Moisés: 2Re' hat cha q'or keh i aj Israel taqe i q'orik wili. Noq naakokiik chupaam i ye'aab' naa nuye'em keh chi naa kik'achariik ar. 3Koruman chi naakiq'aasam chi kik'atoj mayiij jino'q imas wakax, jino'q i tentzuun ye'b'al nuloq'il, reh chi neemponik chi nuwach chi nk'ohnik laj mayiij. Re' i re' naakiq'aasam chi riij chi xooj eloq wach i nuq'orom, oon xa pankik'ux neenchalik, oon neenkiq'asaj chupaam jino'q i nim wach ninq'iij. 4Eh awach i nee ruk'am chee rumayiij chi nuwach koruman chi naa ruqasam haa' chi kimayiij ik'inaq kijib' libra chi holohik arina, xilakimaj ruuk' i jinaj nimlaj lemeta chi aseite. 5Eh re' k'atoj mayiij re' re' naa wo' kiq'asam haa' ju'jun i nimlaj lemeta chi riis uuva chi ruk'uliil i ju'jun chi chikop. 6Eh wila' imas tentzun xkiq'asaj koruman chi naakiq'aasam chiruk'uliil i k'isiin ma' b'elejeeb' libra chi holohik laj arina xilakimaj ruuk' ik'inaq jinaj nimlaj lemeta chi aseite. 7Eh naa wo' kiq'asam chi kimayiij ik'inaq jinaj nimlaj lemeta chi riis uuva reh chi naa ruponiik chi nk'ohnik laj mayiij chi nuwach. 8Eh wila' k'isa imas wakax i naa kik'atam chi kimayiij k'amb'al iib' panotob'il, oon reh k'amb'al kiib' panotob'il wuuk' i hin, hin Dios, oon mayiij chi riij chi xooj eloq wach i q'orooj cho rib'iral. 9Koruman chi naa kiq'asam chiruk'uliil i k'isa imas wakax re' re' ik'inaq oxlaj libra chi holohik laj arina xilakimaj ruuk' i kiib' nimaq lemeta chi aseite. 10Eh koruman wo' hoq chi naa kiq'asam haa' i kiib' nimaq lemeta chi riis uuva reh chi naa ruponiik chi nk'ohnik laj mayiij chi nuwach i hin. 11Eh naa wo' kiq'asam haa' taqe i re' noq naakiq'aasam chi kimayiij jino'q imas wakax, eh jino'q imas tentzun, oon jino'q i k'isa tentzun, oon jino'q i k'isa kaprax. 12Je' taq re' i naa a'nam kuuk' i ju'jun chi chikop naa taq aq'asam chi amayiij kojarub' pa' neemponik taq i naa aq'asam. 13Eh chawunchelaal taq i hat aj Israel koruman chi je' re' taq i naa a'nam xa jarpech pa' naa taq aq'asam i chikop chi k'atoj mayiij, ink'ohnik imponik chi nuwach i hin. 14Eh re' taqe i tokoom tinamit xa ik'ik keh, oon patim taq chaxilak wila' xkaaj kiq'asam i chikop chi k'atoj mayiij ink'ohnik imponik chi nuwach i hin, nik' wach ruq'ahteesjik naa taq a'nam amayiij i hat, je' wo' re' i naa kia'nam i keh. 15Re' i k'uhb'aal chi riij i mayiij wili aweh taq i hat keh wo' taqe i aj tokoom tinamit xa ik'ik keh, oon patim taq chaxilak. Eh keh taqe i tuutb'ees ajaab'ees, keh wo' hoq i kiih kimaam naa kiwihiik koq'uun. 16Re' i k'uhb'aal wili naa animam taq i hat, je' wo' taqe i tokoom tinamit, tiko'q keh, inki Dios. 17Re' i QaJaaw Dios je' wili i xuq'or reh i Moisés: 18Re' hat cha q'or keh i aj Israel taqe i q'orik wili: Noq okinaq chik taqe chupaam i ye'aab' aha' naa nuk'amam taqe reje wii'. 19Noq naa rutohq'iik kianam rusuqkiil i wach i kitik kimu'uun nareliik chupaam i ye'aab' re' re', koruman chi naa kiq'aasam i kimayiij chi nuwach i hin. 20Nik' wach noq inkiq'asaj chi kimayiij i peet wach i kitik, naa wo' kiq'asam chi mayiij chi nuwach i peet kaxlanwi'k inki yejaa' ruuk' peet wach i ki trigo. 21Eh re' kaxlanwi'k juneliik naakiq'aasam chi mayiij i keh, je' wo' taqe i kiih kimaam naa kiwihiik koq'uun. 22Eh wila' re' keh xa chi ma' keht'al xkikanaa' rub'anariik jino'q keh i xnuq'or, re' i k'uhb'aal xnuq'or reh i Moisés chi naa kianam. 23Eh wila' xa ruchaliik wo' chaloq chi ma' inki a'n ta rub'aan xa re' wo' noq xnuyeew reh i Moisés k'uhb'aal wili, eh xaxikuloq wo' ayu' yu'naak chi ma' inki a'n ta chu'nchel i ruq'or. 24Eh wila' xa chi ma' keht'al xkian i mahk re' i tinamit koruman chi naakiq'aasam jinaj i k'isa imas wakax chi k'atoj mayiij ink'ohnik imponik chi nuwach i hin, naa wo' kiq'aasam chi mayiij i xa chi naq'wach ruch'ihil i riis uuva, je' rukab' i ruq'or i k'uhb'aal. Eh naa wo' kiq'aasam jinaj imas kaprax chi riij i mahk. 25Eh chi riij i re', re' k'amal b'eeh aj tiij naa ruq'aasam i mayiij pahqb'al kuyb'al kimahk chu'nchel i tinamit Israel. Re' hin naa wo' nukuyum kimahk ruum kiq'aasam chik i kimayiij chi riij i mahk, xa chi ma' keht'al xkian. 26Korik noq re' hin naa nukuyum i kimahk chu'nchel i aj Israel, je' wo' taqe i tokoom tinamit patim chi kixilak, ruum xa chi ma' keht'al i xkian i mahk re' re'. 27Eh wila' xa jinaj xb'anik i mahk chi ma' reht'al, ixoq kaprax jinaj haab' i wilik reh naa ruq'aasam chi rumayiij chi riij i ru mahk. 28Re' i k'amal kib'eeh aj tiij naa ruq'aasam i mayijimaj chikop chuwach i QaJaaw Dios chi riij i awach xb'anik reh i mahk chi ma' reht'al. Eh noq ruq'asam chik i chikop chi mayiij naa rukuyariik i ru mahk. 29Re' i mayiij wili koruman chi naa kiye'em i aj Israel, je' wo' i tokoom tinamit patim chi kixilak, wila' xa chi ma' keht'al ma' xkian taj i ruq'or i k'uhb'aal chi riij i ruye'ariik i mayiij. 30Eh wila' re' jino'q i xaraaj chi ma' xub'an taj i ruq'or i k'uhb'aal re' re', eh ma' xponik ta k'isinoq chi nuwach i xub'an. Re' reh naa rehtesjiik chi kixilak i aj Israel, atoob' ta aj Israel, atoob' ta tokoom tinamit. 31Re' reh ruum chi ma' xponik ta k'isinoq panaq'wach i nuq'oral ma' xub'an taj i ruq'or i nuk'uhb'aal ruum i re' naa rehtesjiik reje chi kixilak i tinamit, tiko'q keh, inki Dios. 32Eh noq re' taqe i aj Israel b'ehik inki a'n cho chupaam i ye'aab', jinaj i winaq xkireq chi si'wik i rub'an chupaam i hi'limb'al q'iij. 33Eh re' keh xkik'am reje chuwach i Moisés, chuwach i Aarón, chikiwach i ruk'ihaal tinamit. 34Ar xkiyeew pantz'ilom i winaq, ruum komajaa' ta naq i naab'jik chib'ih i naa rub'aan ruuk'. 35Eh re' i QaJaaw Dios je' wili i xuq'or reh i Moisés, re' winaq re' re' i ruk'ul chi naa rukanteesjiik najt reje ruuk' i itz'ihy naah paat wilkaat taq wii' chu'nchel i tinamit naakik'utwiik reh chi ab'aj, inki. 36Eh xkesaj cho chupaam i ye'aab' wilkeeb' wii' i aj Israel xkikutib'eej chi ab'aj i winaq re' re' korehtaal xkikansaj, je' rukab' i xq'orarik reh i Moisés, ruum i QaJaaw Dios. 37Re' i QaJaaw Dios je' wili i xuq'or reh i Moisés: 38Re' hat cha q'or keh i aj Israel chi re' keh, eh chi re' taqe i kiih kimaam naa kiwihiik na' chub'an koruman chi naa kikojom rusinchii' i rooq i kiso', eh chi xilak i re' naa kikojom i tolotaq rax muq'ik laj nooq'. 39Eh noq naakilom wach i rusinchii' i kiso' naa ruk'uliik cho pankik'ux chu'nchel i nuk'uhb'aal nuq'orom keh, eh naa kianam rub'aan. Eh ma' naa ta chik kianam i kiyiib' wach kapeew i keh, eh inkootwaaj rub'aan, ruum i re' ma' korik ta chik wach kik'ux wuuk'. 40Chi je' re' naa ruk'uliik pankik'ux naa kianam chu'nchel i nuk'uhb'aal nuq'orom keh reh chi naa ruwihiik kisantohiil, eh re' hin naa nukahniik chi ki Dios. 41Re' hin kaJaaw i ki Dios xineesanik cho keh pan tinamit Egipto re' inwaaj i hin chi naa nukahniik chi hin manlik ki Dios, tiko'q keh, inki Dios.

will be added

X\