NEHEMIAS 6

1Noq xkib'iraj i Sanbalat, i Tobías, i Gesem, aj árabe, re' taqe i kikomoon i ki-ixowanik, qawach, chi re' hin xnuyejaa' wo' chik i koraal tz'aq chi riij i tinamit chi ma' xta chik k'isinoq tehlik xnukanaa' atoob' ta komajaa' wo' naq i nukoj taqe i ru puertahiil. 2Re' Sanbalat, ruch'ihil i Gesem reh xkitaq'aaj cho nuk'amariik, je' wili xkiq'or weh, kim quuk' ayu' reh chi neenqamol qiib' chupaam jino'q keh i ye'aab' wilkeeb' wii' patineel Ono, inki taqe. Re' naq inkaaj chi naa kianam weh. 3Eh re' hin wilik taqe i aj taqareel xnutaaq'aaj reje, je' wili xnuq'or keh: Re' hin ma' nee ta ruyeew riib' chi nee taq kinooj awuuk' ruum jinaj i kamanik k'ahchi' kiin q'e' nim wach. Eh wixnukanaa' junk'aam-oq, neenchahmik, kinki reje keh. 4Eh re' keh kajpech xkitaq'aaj cho nuyuq'ub'jiik, eliik wach i xkiq'or chaloq. Re' hin kajpech xnuchaq'weej taqe, elik wach i xnuq'or reje keh. 5Eh paroo' pech re' Sanbalat xutaq'aaj cho wuuk' jinaj i rumoso xuk'am chaloq jinaj i huuj tehlik naah, 6je' wili i ruq'or chupaam i huuj: Xelik rib'iral, eh xuq'or chi korik i Gesem chi re' hat awuch'ihil taqe aatinamitaal inawaaj b'ila' taq awesam awiib' chi ri'sil i rajaawriik i reey, ruum b'ila' re' k'ahchi' taq ayejaam i koraal tz'aq. Eh re' b'ila' hat inawaaj okik chi reyil. 7Eh xapab'aa' b'ila' chik taqe i jalal ruq'oral i Dios, reh chi nee ti kipab'aa' chi reyil ar Jerusaleem, reh chi naa kiq'orom chi wilik chik reey ar Judá. Re' re' yohb'aal neemponik rib'iral ruuk' i reey Artajerjes, ruum aj re' ti chaloq wuuk' reh chi neeqohq'orik chi riij, inki cho weh. 8Re' hin je' wili i xnutaq'aaj ruq'orariik reh: Chu'nchel inaq'or re' re' ma' korik taj xa hat ti kapeb'inik reh, kinki reje. 9Chu'nchel i xkian qeh re' re' xayohb'esb'al qeh, xa re' naq inkaaj chi ma' xqakohlaajta ruyejeb'jiik i koraal tz'aq. Eh re' hin xnub'an nutiij, je' wili xnuq'or: QaJaaw Dios chayeew tii rukowiil qak'ux reh chi neenqakohlaaj aakamaj, kinki. 10Chi riij i re' xinooj parupaat i Semaías rak'uun i Delaía, riih i Mehetabel. Re' Semaías rutz'apam riib' parupaat, je' wili xuq'or weh: Chupaam aq'ab' yu'naak naa kichaliik chakantesjiik, taq qamol qiib' ko chupaam i rupaat i Dios neenqatz'ap taqe ru puertahiil neenqakeb'aa' qiib' ko chupaam, inki. 11Eh re' hin je' wili i xnuq'or reh: Jino'q winaq je' rukab' i hin, ¿Mi ruk'ul re' chi neenyo'jik? ¿Mi ruk'ul re' chi nenooj nukeb'aa' wiib' chupaam i rupaat i Dios chi ko'lb'al riij i nuk'achariik? Re' hin ma' nee ta nooj nukeb'aa' wiib' ar, kinki reh. 12Eh re' hin xnukoj rehtaal chi ma' re' tee Dios xq'orik reh i xuq'or weh. Re' reh xuq'or weh chi je' re' ruum xtojarik ruum i Sanbalat, ruum i Tobías. 13Re' keh xkitoj xa reh naq chi naa nuyo'jiik, reh naq chi naa numahkuniik. Reh naq chi xelik rib'iral chi ma' holohik taj i k'ahchi' kiin, reh naq chi na nuk'uhtaam nuk'ixb'ilaal. 14Eh re' hin je' wili xnuq'or: QaJaaw Dios chakoj rehtaal i k'ahchi' keeb' weh i Sanbalat, i Tobías. Ma' nsahchik wo' panak'ux i ma' holohik taj xub'an i Noadías ixoq jalal naq aq'oral, je' wo' xkian i junch'uq chijalal naq aq'oral i k'ahchi' kiin kiyohb'isam, kinki. 15Re' koraal tz'aq xkuxik ruyejeb'jiik chupaam i ho'oob' ru ka'winaq rub'eeh i poh Elul. Eh kab'laj roxk'ahl q'iij xkikohlaaj wii' ruye'jeb'jiik. 16Eh re' taqe i ki-ixowanik qawach ruch'ihil taqe i tinamit wilkeeb' chi qajunsuut xkib'iraj rib'iral chi xkuxik ruyejeb'jiik i koraal tz'aq yohb'aal wach noq xchalik kiyo'jiik xchalik kik'ixiik ruum xkikoj rehtaal chi re' i QaJaaw Dios xtoob'inik qeh chi rutinamiit. 17Chupaam taqe q'iij re' re' wilik taqe i k'amal kib'eeh i aj Judá xkitz'ihb'aj reje ruhuuj i Tobías, eh i rutaq'aaj wo' chik cho jilow. 18Ruum ma' k'isiin taqe i aj Judá wilkeeb' chi riij i Tobías ruum re' reh rujii' i Secanías, rak'uun i Ara. Eh ruum wo' hoq chi re' Johanán, xuk'am chi rehk'een i rixq'uun i Mesulam, i rak'uun i Berequías. 19Eh inkik'utjaaj wo' chi nuwach i holohik laj na'ojb'al xub'an i Tobías, inkiq'or wo' reh chib'ih taqe nuq'or i hin. Re' Tobías wilik taqe i huuj i rutaq'aaj cho chi yohb'esb'al weh.

will be added

X\