NEHEMIAS 4

1Noq xunab'eej i Sanbalat chi k'ahchi' wo' chik qayejaam chi korik i koraal tz'aq yohb'aal wach noq xchalik ruk'aah, xoj rukaqse'laaj i hoj, hoj aj Judío. 2Eh je' wili i xuq'or keh i ruch'ihil, eh keh i ki soldado i aj Samaria: ¿Chib'ih jariik inki a'n i aj Judío ma' xta kikowiil? ¿Mi nkikapaaj re' chi naa wo' chik ruye'ariik q'ab' keh chi naa kiye'em i kimayiij? ¿Mi neenkiyejaa' re' chuwach i jinaj q'iij i koraal tz'aq? ¿Mi nee wo' chik inkesaj cho pan pooq re' taqe ab'aj xik'ahtik? inki. 3Re' Sanbalat ruch'ihil i Tobías, aj Amón je' wili xuq'or: Chawil taq i koraal tz'aq k'ahchi' kiyejaam ruuk' ab'aj xa jinaj chi pahar neenq'eb'wik reh wila' xjohtik chinaah, inki taqe. 4Re' hin xnub'an nutiij je' wili xnuq'or: QaJaaw Dios chab'iraj i qab'ajariik inki a'n, nee ta tii naasutej wach kinaah inki a'n qeh. Eh chayeew q'ab' chi neekik'amarik reje pan tokoom tinamit kuum i aj ixowaal. 5Maa kuy kimahk ruuk' i kiyiib' wach na'ojb'al, eh mansahchik panak'ux i kimahk. Ruum re' keh k'ahchi' kib'ajam taqe i k'ahchi' kiyej-anik reh i koraal tz'aq, kinki. 6Re' hoj xoj ooj chi qawach chi ruyejeb'jiik i koraal tz'aq xponik panyejaal i runajtiil naah ruum re' i tinamit xkiyeew kik'ux chi kamanik. 7Eh re' i Sanbalat, re' Tobías, re' taqe aj árabe, re' taqe aj Amón, re' taqe i aj Asdod ma' k'isiin ta xchalik kik'aah noq xkib'iraj chi k'ahchi' chik ruk'ulum riib' i koraal tz'aq chi riij i Jerusaleem. 8Eh xkian jinaj wach kik'ux chi xchalik chi q'aq'inik kuuk' i aj Jerusaleem, reh chi naa kiye'em panti' k'axik. 9Noq xqib'iraj chi je' re' i hoj xqa'an qatiij chuwach i Dios, eh xqakoj taqe aj cha'jen qeh chi q'iij chi aq'ab' ko'lemb'al qiib' chikiwach. 10Eh re' taqe i aj Judá je' wili xkiq'or: Ma' xta chik kaansil taqe aj ihq ko wilik i tz'aq yojinaq ma' nee ta inkikuy rehtesjiik, ruum aj re', re' hoj naa qakanaam ruyejeb'jiik, inki taqe. 11Eh re' taqe i ki-ixowanik qawach je' wili i xkiq'or: inqaaj chi ma' nee ta inkinab'eej chi ma' nee ta qoh kilow xa kowilkooj chik chikinaah noq neenkik'raaj neenqakansaj taqe, eh neenqapab'aa' i kamanik re' re', inki taqe. 12Xa re' la' re' taqe i aj Judío patim ma' najt ta kuuk' k'ipech xk'ulik kiq'or, qeh chi k'ul naa kokiik cho chi q'aq'inik quuk' taqe i aj ixowaal re' re'. 13Eh re' hin xnukoj taqe i ju'jun chi patineel wilik kiq'aslaj ch'ihch', wilik kiq'as ju' ch'ihch', wilik kiflecha pan kiq'ab' chupaam i ye'aab' komajaa' injohtik wii' i tz'aq, je' wo' hoq aha' i komajaa' i ruk'ul riib'. 14Eh noq xwilow chi xchalik kiyo'jiik xi wuktik johtoq je' wili i xnuq'or keh k'amal b'eeh, i wilkeeb' chi taaq'anik, i ruqox i tinamit: Matyo'jik taq kuum k'oloq taq panak'ux chi re' i QaJaaw Dios, inqayohleej wach xiik' naah nimaal i rajaawriik. Naa rub'aniik i peleto taq chawiij, chikiij taq aatinamiit, taqe awak'uun, awixq'uun, chikiij taqe awehk'een, taqe awach aweh taq panapaat, kinki keh. 15Eh noq re' taqe i ki-ixowanik qawach xkinab'eej chi re' hoj xqanab'eej chib'ih jariik i xkiyejaa' wach chi naa kianam qeh, eh chi xkinab'eej chi re' i Dios xuyoj wach i xkiyejaa' wach, re' hoj chi qunchelaal wo' chik xoj okik chi ruyejeb'jiik i koraal tz'aq. 16Chupaam q'iij re' re' yejaal taqe i waj kamanoom xnukoj chi kamanik, eh yejaal taqe i xnukoj chi cha'jinik, kiyohq'eem kiq'as ju' ch'ihch', kipulato ch'ihch', kiflecha, eh kikojom kich'ihch' so'. Re' taqe i k'amal b'eeh xkiyeew kik'ux chi toob'jiik taqe i aj Judá, 17re' taqe i k'ahchi' keeb' chi ruyejeb'jiik i koraal tz'aq. Eh re' taqe aj ihq xkichop wo' chik kik'ux chi k'amaj ihq, xa re' la' ruuk' i jinaj kiq'ab' kikamanik, eh ruuk' i kiq'ab' jinaj kichopom i kiq'aslaj ch'ihch'. 18Chu'nchel i k'ahchi' keeb' chi ruyejeb'jiik i koraal tz'aq wilik kiq'aslaj ch'ihch' nah kituuq. Eh chi nucheel i hin wilik inxulinik reh i tuun. 19Eh re' hin je' wili i xnuq'or keh i k'amal kib'eeh, keh i aj taaq'oom, keh i tinamit: Re' kamanik wili nim wach, ma' k'isiin taj iraaj b'anarik. Re' hoj noq k'ahchi'kooj chi ruyejeb'jiik i koraal tz'aq najt qaxilak chi qaju'junaal. 20Eh aha' neenab'iraj taq chaloq chi neenxuuljik i tuun jumehq'iil taq neenamol awiib' quuk', ruum re' i QaJaaw Dios naa rub'aniik i peleto taq chawiij, kinki keh. 21Re' hoj xa re' wach insaq'ik qoh okik chi kamanik, eh korehtaal inokik i q'iij, eh yejaal keh i kamanoom wilik i kiq'aslaj ch'ihch' pan kiq'ab'. 22Eh xnuq'or wo' keh i tinamit chi re' keh haa' i kimoso naa kikahniik Jerusaleem chi cha'jinik chaq'ab', eh chi neenkian i yej-anik tz'aq pan q'iij. 23Eh ni xata re' hin, ni xata re' taqe i ma' tokoom ta wuuk', ni xata re' taqe i kitowik weh, ni xata re' taqe i aj cha'joom wilkeeb' wuuk', ni xata re' taqe i k'ijolaq wilkeeb' wuuk' inkesaj i kiso' chikiij, xa re' wo' noq inqa'an qitiin noq inqesaj i qaso' chiqiij.

will be added

X\