NEHEMIAS 2

1Noq juninaq chik haab' rokiik chi reyil i Artajerjes chupaam i poh Nisán re' hin k'ahchi' nuye'em ruhaa' i reey, re' reh xukoj rehtaal chi q'e' intz'irik nuwach. 2Xupahqaaj weh chi je' wili: ¿Chib'ih inak'ul je' nchi q'e' ti' ak'ux, je' nchi hat yowaab', je' nchi wilik ak'axkiil? noq inwil inki. Noq xuq'or weh chi je' re' i reey yohb'aal wach noq xchalik nuyo'jiik. 3Eh re' hin je' wili ruchaq'weesjiik xnub'an: Qajaaw reey nee ta naq inwihik aak'achariik chi juneliik. Re' hin q'e' ti' nuk'ux ruum re' i tinamit muqulkeeb' wii' i numaam wati't xkiyojib'eej, eh xkik'at taqe i ru puertahiil, ruum taqe re' q'e' ti' nuk'ux, kinki. 4Re' reey je' wili i xuq'or weh: ¿Chib'ih inawaaj chi nee tinutob'eej wii'? inki. Eh re' hin xnub'an nutiij chuwach i Dios wilik pan taxaaj. 5Je' wili ruchaq'weesjiik i reey xnub'an: Qajaaw reey wila' ch'iklik ak'ux wuuk' i hin, hin awaj kamanoom chayeew q'ab' weh chi nee kinooj pan tinamit Judá, re' muhqinaq wii' taqe i numaam wati't reh chi neenooj nuyejaa'. 6Re' reey tz'unlik chucheel i rehk'een noq xupahqaaj weh chi je' wili: ¿Nik' najtiil inooj a'an jaruuj ti sutinik chaloq? inki. Re' hin xnuq'or reh i q'iij jaruuj kinsutinik reje, re' reey xuk'ul ruk'ux, xirutaq'aaj wo' cho Judá. 7Eh je' wo' chik wili i xnuq'or reh i reey: Wila' nee ruyeew riib' chawach cha tz'ihb'aaj jino'q nuhuuj pankib'ihnaal iwilkeeb' chi taaq'anik chi juntar i nim ha' Éufrates, reh chi neen kiyeew q'ab' weh chi nee kinokik ar, korehtaal neekimponik Judá. 8Eh xnupahqaaj reh chi naa rutz'ihb'aam jino'q i huuj parub'ihnaal i Asaf, incha'jinik reh i ye'aab' i resaj wii' ruchee' i reey, reh chi neenwesaj i chee' ar, yejeemb'al reh taqe i ru puertahiil i tinamit. Eh reh wo' chi naa nuyejaam i paat naa nuwihiik wii' i hin, je' wo' hoq i tz'aq kotimaj wii' riij i tinamit, eh re' reey xuyeew wo' weh i xnupahqaaj reh, ruum xirutoob'eej i Dios. 9Re' hin jumehq'iil xin chalik kuuk' i wilkeeb' chi taaq'anik chi juntar i nim ha' Éufrates, eh xnuq'asaj keh i huuj xutaq'aaj cho weh i reey. Eh re' reh xutaq'aaj cho chi wiij i kajaaw i soldado, je' wo' taqe i soldado rij kawáyu kib'ehik. 10Eh re' Sanbalat, aj pan tinamit Horón, ruch'ihil i Tobías, re' wilik chi taaq'anik ar Amón ma' k'isiin ta xchalik kik'aah noq xkib'iraj chi wilik i xooj k'oloq chi kitoob'jiik taqe i aj Israel. 11Noq ixib' chik q'iij nuk'uliik Jerusaleem, 12xin wuktik chaq'ab' kiib' ixib' taqe i winaq wuch'ihil. Xa re' la' komajaa' naq awach eh i nuq'or i xuq'or weh i Dios, chi naa nub'anam chi toob'al reh i tinamit Jerusaleem. Eh ma' awach ta chik i xchalik rij kawáyu, xa re' wo' chik i hin xin chalik rij kawáyu. 13Eh chupaam aq'ab' re' re', xoj elik chupaam i puerta wilik reje chi korkiil i k'achlik ha' wilik chuwach i k'ixkaab' Dragón rub'ihnaal, eh xoj ponik chi chii' i puerta i nelik wii' sohk' xwilow chi yojinaq i tz'aq wilik chi junsuut i Jerusaleem. Eh k'atoj taqe i ru puertahiil. 14Chi riij i re' xoj ooj k'oloq i wilik wii' i puerta, wilik wii' i k'achlik ha', xoj ooj k'oloq ruuk' i tz'aq i rumol wii' ruhaa' i reey, xa re' la' ar ma' xub'an ta chik reje ik'ik i nukawayu wilkiin chi riij. 15Noq komajaa' insaq'ik xoj ooj chi chii' i rooq ha' xnukoj rehtaal chi yojinaq i koraal tz'aq, eh xoj sutinik wo' chik chaloq xoj k'ulik wo' chik iloq i wilik wii' i puerta inilwik reje wach k'ixkaab'. 16Re' taqe i aj taaq'oom ma' keht'al ta naq aha' kinooj, eh chib'ih i k'ahchi' nub'anam. Eh xakomajaa' ta wo' naq i nuq'or keh i aj Judío, keh i k'amal kib'eeh aj tiij, je' wo' keh i nimaq kiwach, eh ni xata re' taqe i kamanoom kieht'alinik reh chib'ih i k'ahchi' kiin. 17Re' hin je' wili i xnuq'or keh: Re' taq i hat aweht'al taq chib'ih i ti' k'axik k'ahchi' qik'iik wii'. Re' i Jerusaleem xkiyojib'eej, eh xkik'atib'eej taqe i ru puertahiil. Re' hin inwaaj chi nee wo' chik inqayejaa' taq awuuk' i tz'aq sutimaj wii' riij i Jerusaleem, reh chi ma' nee ta qoh kahnik pan k'ixb'ilaal, kinki keh. 18Eh re' hin xnuk'utjaaj keh nik' wach noq xirutoob'eej i nuDios, xnuk'utjaaj wo' keh chib'ih i xuq'or weh i reey. Re' keh je' wili i xkiq'or: Neerub'an chi nee qoh okik chi kamanik reh chi nee wo' chik inqayejaa' i qatinamiit, inki taqe. K'ul xkiyeew rukowiil kik'ux chikiwach noq xi okik chi kamanik. 19Xa re' la' noq xrib'iraj i Sanbalat aj pan tinamit Horón chi je' re' ruch'ihil i Tobías, wilik chi taaq'anik ar Amón, ruch'ihil i Gesem aj árabe xoj kikaqse'laaj, je' wili xkiq'or qeh: ¿Chib'ih taq aweht'al i hat mi nee taq i naq'at wach re' i ruk'uhb'aal i reey panak'ux? inki taqe. 20Eh re' hin je' wili i xnuq'or keh: Re' Dios wilik pan taxaaj naakooj resam korik. Re' hoj, i hoj raj kamanoom naa wo' chik qayejaam i Jerusaleem. Ma' nee ta i rub'an chi nee taq i namin awiib' quuk' ruum ma' hat ta taq aj ayu' Jerusaleem, ma' re' ta taq i hat q'oreel aweh, kinki keh, inki.

will be added

X\