LEVITICO 9

1Eh noq waxiq'iib' chik q'iij rupa'ab'jiik chi k'amal kib'eeh aj tiij i Aarón re' i Moisés, xuyuq'eej i Aarón, taqe i rak'uun, je' wo' taqe i k'amal kib'eeh i aj Israel. 2Je' wili i xuq'or reh i Aarón: Chaq'asaj chi amayiij jino'q i k'isa imas wakax pahqb'al kuyb'al taq amahk. Eh nee naq'asaj jino'q i imas tentzun manlik wach kiti'jolal neenak'at chuwach i QaJaaw Dios. 3Eh je' wili i neenaq'or keh i aj Israel: Chaq'asaj taq chi amayiij jino'q imas kaprax pahqb'al kuyb'al taq amahk. Eh nee taq inaq'asaj jino'q i k'isa imas wakax, jino'q imas tentzun ju'jun haab' i wilik keh, manlik wach kiti'jolal nee taq inak'at chi mayiij. 4Eh nee taq inaq'asaj chi amayiij jino'q i b'ooyax, jino'q imas tentzun k'amb'al taq awiib' panotob'il ruuk' i QaJaaw Dios. Eh nee wo' inaq'asaj taq i amayiij re' ruuk' i naxilakeej ruuk' aseite, ruum yu'naak naa taq ruk'uhtaam riib' aweh i QaJaaw Dios, tiko'q keh inki. 5Re' i mayiij xuq'or i Moisés xkik'am wo' chaloq i aj Israel panookb'al reh i santo laj itz'ihy naah paat molb'al iib'. Eh xi chalik chu'nchel i tinamit xkimol i koq kiib' chuwach i QaJaaw Dios. 6Eh je' wili xq'orarik keh ruum i Moisés: Re' wili xuq'or i QaJaaw Dios chi naa taq a'nam, cha a'n taq reh chi nee ruk'uhtaaj taq chawach i ruloq'il i QaJaaw Dios, inki. 7Re' i Moisés je' wili i xuq'or reh i Aarón: Chajil chawiib' wach artaal chaq'asaj amayiij pahqb'al kuyb'al amahk, eh chaq'asaj i k'atoj chikop tojb'al riij amahk, nee wo' naaq'asaj i mayiij pahqb'al kuyb'al kimahk i tinamit, eh nee wo' naaq'asaj i k'atoj chikop tojb'al riij i kimahk, je' rukab' i xuq'or i QaJaaw, inki. 8Re' i Aarón xujil wo' i koq riib' wach artaal xuyok' i ralaq i k'isa imas wakax xuq'asaj chi mayiij chi riij i ru mahk i reh. 9Chi riij i re', re' taqe i rak'uun i Aarón xkijil i koq i rukik'eel i chikop ruuk' i kajaaw, eh re' reh xuch'ulej wataq ruk'aa' i artaal. Eh re' i ruqox i kik' xuchihkaaj i koq waraa' i artaal. 10Xuk'at wo' chinaah i artaal i ruq'ina'iil ruch'ihil i kab'chel i rukinaq'iil paam, je' wo' hoq i ruq'ina'iil i rutamaat i chikop xye'arik chi mayiij chi riij i mahk, je' wo' rukab' i xuq'or i QaJaaw Dios reh i Moisés. 11Eh re' i rutib'kaal i rutz'uhumal i riij xuk'at reje ko chi riij i paat i molarik wii' iib'. 12Eh re' i Aarón xuyok' i ralaq i chikop xkiq'asaj chi k'atoj mayiij. Re' taqe i rak'uun xkijil i koq ruuk' i kajaaw i rukik'eel i chikop, eh re' reh xuchihkaaj chi junsuut, eh chinaah i artaal. 13Eh xkik'am wo' cho reh i Aarón i rutib'kaal i chikop xq'ahteesjik chi k'atoj mayiij. Yok'oj chik chi sahlal xkik'am wo' cho reh i naah. Eh xuk'at chinaah i artaal. 14Re' i Aarón xutz'aj wach i req'saa', ruch'ihil i rutuuq, xuk'at chinaah i artaal chi mayiij je' rukab' i xub'an reh chu'nchel i ruti'jolal i chikop. 15Eh xuchop wo' chaloq imas kaprax xkik'am chee tinamit, xuyok' i ralaq xuq'asaj chi mayiij chuwach i QaJaaw Dios pahqb'al kuyb'al kimahk i tinamit je' rukab' i xub'an pampeet. 16Xuq'asaj wo' hoq i chikop chi k'atoj mayiij, xub'an wo' hoq je' rukab' i ruq'or i k'uhb'aal. 17Eh xuq'asaj wo' hoq i mayiij xa chi naq'wach jumohq' i xuchop chaloq xuk'at chinaah i artaal noq ruk'atam chik i mayiij inye'arik wahq'eq. 18Eh xuyok' i ralaq i b'ooyax, ruch'ihil imas tentzun xuq'asaj chi mayiij k'amb'al kiib' i tinamit panotob'il ruuk' i Dios. Re' taqe i rak'uun xkijil i koq ruuk' i kajaaw i rukik'eel i chikop, eh re' reh xujalk'iij chi junsuut, eh chinaah i artaal. 19Re' i ruq'ina'iil i b'ooyax, i ruq'ina'iil imas tentzun, i rujeeh, i q'ina' wilik chinaah i req'saa' ruch'ihil kab'chel i rukinaq'iil i paam ruch'ihil i ruq'ina'iil i rak'alel paam. 20Eh re' i rutib'kaal i chi' kik'ux i chikop xkiyeew chinaah i ruq'ina'iil. Re' Aarón junk'ahtiik xub'an ruuk' i q'ina' chinaah i artaal. 21Re' taqe i rutib'kaal chi' kik'ux, taqe i rusak'aaj kituuq i chikop xuq'asaj wo' hoq chi mayiij chuwach i QaJaaw je' rukab' i ruq'or i k'uhb'aal, je' rukab' i xq'orarik reh i Moisés ruum i QaJaaw Dios. 22Eh re' i Aarón xuyub' reje i q'ab' chi kuxeesb'al keh i tinamit. Eh noq ruq'asam chik i mayiij chi riij i mahk, noq ruq'asam chik i k'atoj mayiij k'amb'al iib' panotob'il ruuk' i QaJaaw Dios xelik reje wach artaal. 23Re' i Moisés ruch'ihil i Aarón xi okik i koq chupaam i rusanto laj itz'ihy naah paat molb'al iib'. Noq xi elik chaloq xkikuxisaj i tinamit, eh re' i QaJaaw xuk'uhtaaj chaloq i ruloq'il chikiwach i tinamit. 24Eh re' i QaJaaw Dios xutaq'aaj chaloq i q'aaq' xanoq wo' xuk'atib'eej i chikop, i ruq'ina'iil chinaah i artaal. Eh noq xkilow chi je' re' i tinamit xkiloq'ej i QaJaaw Dios xkipach'aa' kiib' korehtaal xkireq wach ak'al ruuk' i yejal kiwach.

will be added

X\