LEVITICO 22

1Re' i QaJaaw Dios je' wili xuq'or reh i Moisés: 2Chaq'or reh i Aarón, keh i rak'uun chi kiyeew ruloq'il i santo laj mayiij inkik'am cho chi nuwach i aj Israel reh chi ma' nee ta nkich'uwa'reej wach i nub'ihnaal. Re' wili re' hin i Dios kinq'orik. 3Chaq'or keh chi yu'naak johtoq chi qawach, xa awach pa' jino'q i rak'uun, oon riih rumaam neenokik chi k'amal kib'eeh aj tiij chi ch'uwa' wach noq neenokik chuq'ahteesjiik i santo laj mayiij neenkik'am cho chi nuwach. Re' neemb'anik reh i re' naa rehtesjiik reje chi nuwach i hin, hin Dios. 4Ma' jino'q i k'amal kib'eeh aj tiij wilik ruyab'ilaal re' ruuk' i rax q'aah imb'anik reh, oon k'ahchi' reliik i ruha'iil i ruk'achab' neeruk'ux reh i santo laj mayiij chi komajaa' rusaqb'isaj riib'. Eh awach i nee rutz'a'j jino'q i ruti'jolal i kamnaq, je' wo' hoq awach i nee nelik ruha'iil i ruk'achab'. 5Eh ma' nee ta ruk'ux reh awach i nee ruch'uwa'reej riib' ruuk' rutz'a'jiik taqe i chikop kijukem kiib' noq kib'ehik. Je' wo' hoq awach i ch'uwa' wach, eh ruch'uwa'risaj riib' ruuk' i kitz'a'jik i ch'uwa' wach. 6Eh awach neen tz'a'inik reh i kiristianu' re' re' naa rukahniik chi ch'uwa' wach korehtaal chik inokik i q'iij. Eh noq komajaa' i rub'an i ritiin, ma' ruk'ul taj chi nee ruk'ux reh i santo laj mayiij. 7Eh noq naa rokiik i q'iij naa rukahniik chi saq chik wach koraj neerub'an re' chi nee ruk'ux reh i santo laj mayiij ruum ruuk' wo' re' naa ruk'uxlaam riib'. 8Eh ma' ruk'ul ta chi neeruk'ux i chikop re' ruuk' i xankimik, oon re' ruuk' i xan xerarik i kiti'jolal ruum i josq'laj chikop, reh chi ma' nee ta ruch'uwa'risaj riib' ruuk' taqe re'. Re' wili re' hin i Dios kinq'orik reh. 9Eh chi kunchelaal i k'amal kib'eeh aj tiij naa kik'amam naah taqe i ruq'or i nuk'uhb'aal, reh chi ma' xta mahk neenkik'am cho chikinaah, ruum re' hin i Dios kinye'wik kisantohiil. 10Re' wilik rusantohiil xa re' wo' hoq i k'amal kib'eeh aj tiij, naakik'uxwiik reh. Eh re' i kulaa', re' taqe i kiloq'om chi kimoso re' taqe i kimoso inaasjik pankipaat ma' naa ta kik'uxum keh. 11Eh wila' re' i k'amal kib'eeh aj tiij ruuk' rutumiin ruloq'om i rumoso, re' moso re' re' neerub'an chi nee ruk'ux reh i wilik rusantohiil, je' wo' hoq i rumoso aasjinaq parupaat nee wo' rub'an chi neeruk'ux reh i wilik rusantohiil. 12Eh wila' re' i rixq'uun jino'q i k'amal kib'eeh aj tiij xub'an kaxáro ruuk' jino'q i ma' re' ta k'amal kib'eeh aj tiij. Re' ixoq re' re' ma' nee ta ruk'ux reh i wilik rusantohiil. 13Eh wila' re' rixq'uun i k'amal kib'eeh aj tiij kamnaq i rub'ahiil, oon kanamaj ruum i rub'ahiil xsutinik wo' chik cho parupaat i rajaaw, wila' ma' chih ruha'lak'uun xkahnik wo' chik chi je' rukab' i pampeet. Re' ixq'un re' re' neerub'an chi neeruk'ux reh i mayiij wilik rusantohiil. Xa re' la' ma' jino'q i tokoom tinamit naa ruk'uxwiik reh. 14Eh wila' wilik jino'q i xa chi ma' reht'al xuk'ux i mayiij wilik rusantohiil. Re' naa ruk'uxum naa ruye'em jilow nik' k'ihaal, eh ko k'isiin chik i naah naa ruye'em. 15Xa re' la' re' taqe i k'amal kib'eeh aj tiij ma' naa ta kiye'em q'ab' keh i aj Israel chi naa kich'uwa'risam wach i wilik rusantohiil inq'ahteesjik chi mayiij chi nuwach i hin, hin Dios. 16Eh ma' ruk'ul taj chi neenkahnik chikinaah i kimahk ruum i ruk'uxariik i mayiij wilik rusantohiil. Ruum re' hin i Dios kinye'wik rusantohiil, inki. 17Re' i QaJaaw Dios je' wili i xuq'or reh i Moisés: 18Re' hat cha q'oreej i Aarón, taqe i rak'uun, je' wo' chu'nchel i aj Israel, je' wili i cha q'or keh: Wila' awach i aj Israel, oon jino'q i tokoom tinamit wilik chi kixilak xraaj ruq'asam i k'atoj chikop chi rumayiij chuwach i Dios, re' nee ruyeew chi rumayiij re' ruq'orom chi naa ruye'em, oon xa paruk'ux neenchalik noq nee ruyeew. 19Re' chikop naa ruq'asam re' re' koruman chi imas, eh manlik wach ruti'jolal reh chi nee ruk'ul i QaJaaw Dios. Eh neerub'an chi imas wakax, imas tentzun, oon imas kaprax. 20Ma' nee ta rub'an chi nee ruyeew i chikop ma' manlik ta wach ruti'jolal ruum re' i QaJaaw Dios ma' nee ta ruk'ul. 21Eh wila' awach i xuyeew i chikop chi rumayiij k'amal riib' panotob'il ruuk' i Dios re' ruq'orom chi naa ruye'em, oon xa paruk'ux naa ruchaliik koruman chi imas wakax, chi tentzun i nee ruyeew manlik wach kiti'jolal, reh chi neenk'ularik ruum i QaJaaw Dios. 22Ma' nee ta rub'an chi nee taq i nayeew chi amayiij i chikop mutz'wach, oon ruq'ojom riib', oon toqeel i rooq, oon pixp i riij, oon sal i riij, oon sipjinaq i riij. Re' taqe i chikop je' rukab' i re' ma' ruk'ul ta chi nee taq inaq'asaj chi k'atoj mayiij chinaah i ru artaal i QaJaaw Dios. 23Re' imas wakax, i imas tentzun ma' q'e' ta manlik wach neerub'an chi nee taq inaq'asaj chi amayiij wila' xa panak'ux taq xchalik. Xa re' la' wixaq'asaj taq chi amayiij i chikop je' rukab' taqe re'. Re' i mayiij aq'orom taq chi naa aye'em ma' naa ta ruk'ulum i QaJaaw Dios. 24Eh ma' ruk'ul taj chi nee taq inaq'asaj chi mayiij chuwach i QaJaaw Dios jino'q i chikop hopeel, oon q'ojeel ch'uquuj, oon esamaj i rumiloj. Re' taqe re' ma' ruk'ul ta chi nee taq i nayeew chupaam i ye'aab'. 25Eh wila' xak'ul taq i chikop je' rukab' i re' kuuk' i tokoom tinamit ma' ruk'ul ta chi nee taq inaq'asaj chi amayiij re' ruuk' ink'uxarik. Ruum re' taqe i chikop re' re' wilik kiyab'ilaal ma' naa ta nuk'ulum, inki i Dios. 26Eh re' QaJaaw Dios je' wili i xuq'or reh i Moisés: 27Noq naa raasjiik jino'q i imas wakax, oon jino'q imas tentzun, oon jino'q imas kaprax, konaa rukahniik ruuk' i rutuut chuwach i wuquub' q'iij. Eh paruwahxaaq q'iij neerub'an chi neenq'ahteesjik chi mayiij, eh naa ruk'ulum i QaJaaw Dios. 28Eh chupaam i jinaj chi q'iij ma' naa ta taq akansam ixoq wakax chi junkanteesjik ruuk' i rak'uun, eh ni xata naa taq akansam ixoq tentzun chi junkanteesjiik ruuk' i rak'uun. 29Eh noq naa taq aq'asam i mayiij reh t'iosinik chuwach i QaJaaw Dios cha a'n taq je' rukab' i ruq'or i k'uhb'aal reh chi nee ruk'ul i QaJaaw Dios. 30Eh xa chuwach q'iij taq naa ak'uxum, ma' ruk'ul taj chi nee taq i naa kanaa' chi kochi junwaar taq neenak'ux. Re' wili re' hin i Dios kinq'orik. 31Je' re' noq cha a'n taq i ruq'or i nuk'uhb'aal, eh cha nimaj taq, ruum xa re' wo' hin, hin Dios. 32Eh maa ch'uwa'reej taq wach i nuSantolaj b'ihnaal chi je' re' neen kiyeew nuSantohiil taqe i aj Israel. Eh re' wo' hin i Dios xin ye'wik asantohiil taq i hat. 33Eh re' wo' hin xineesanik taq cha weh pan tinamit Egipto reh chi xin kahnik taq chi hin aaWaJaaw aaDios, inki.

will be added

X\