LEVITICO 21

1Re' i QaJaaw Dios je' wili i xuq'or reh i Moisés: Chaq'or keh i k'amal kib'eeh aj tiij, re' taqe i rak'uun Aarón chi manki ch'uwa'reej kiib' ruuk' i rutz'a'jiik i kamnaq neenkimik pan kitinamiit. 2Neerub'an chi neenkitz'a'j wila' ma' tokoom ta kuuk' i xkimik wila' re' i kajaaw, oon kituut, oon kas. 3Neerub'an chi neenkitz'a'j wila' re' jino'q i kanaab' ma' xunab'eej ta wach q'orinik winaq i xkimik, oon ma' xwihik ta rub'ahiil. 4Xa re' la' ma' ruk'ul taj chi nee nkich'uwa'risaj kiib' ruuk' i rutz'a'jiik jino'q i xa awach neenkimik pan kitinamiit. 5Eh ma' ruk'ul taj chi neenkiyok' i rismaal i kinaah, je' wo' hoq i kusinchii', eh ni xata nakilochom wach i kiti'jolal ruum ruti'kiil kik'ux. 6Inchol la' kik'achariik pan santohiil, chi nuwach i hin, hin kiDios reh chi ma' nee ta inkik'uhtaaj nuk'ixb'ilaal. Ruum re' keh kiq'asaniik reh i k'atoj mayiij chi nuwach, je' wo' hoq kaxlanwi'k inye'arik chi mayiij, ruum aj re' koruman chi naa kiwihiik pan santohiil. 7Eh ma' ruk'ul taj chi neenkian kaxáro ruuk' i k'oyoom laj ixoq, eh ni xata ruuk' jino'q ixoq kamnaq rub'ahiil, ni xata ruuk' jino'q ixoq ch'aq kaxáro ruum santo chik taqe chi nuwach i hin. 8Re' re' taqe i k'amal kib'eeh aj tiij kiq'asanik i kaxlanwi'k chi mayiij chi nuwach, naa ruwihiik kisantohiil, ruum re' hin i ki Dios kinye'wik kisantohiil, eh hin wo' santo. 9Eh wila' re' i rixq'uun i k'amal kib'eeh aj tiij xuk'uhtaaj ruk'ixb'ilaal i rajaaw xutoq'aa' k'oyomal inchol ruk'atariik wach q'aaq' noq naa rukimiik. 10Eh re' i kajaaw i k'amal kib'eeh aj tiij xuk'ul i rajaawriik noq xukoj i ruso' wilik ruloq'il, noq xt'urjik aseite wach naah. Je' re' noq ma' ruk'ultaj chi nee resaj i b'urb'al wach i naah, eh ma' naa ta ruxihim i ruso' chi riij ruum ruti'kiil ruk'ux. 11Eh ma' ruk'ul taj chi neenokik i koq i wilik wii' jino'q i kamnaq, ni xata ruum i rukimiik i rajaaw, ni xata ruum i rukimiik i rutuut naa ruch'uwa'risam riib'. 12Eh ni xata naa reliik reje chupaam i nuSantolaj ye'aab', ni xata naa ruch'uwa'risam wach i nuSantolaj ye'aab' i hin, ruum noq xkuxeesjik ruuk' i aseite noq xt'urjik wach naah, eh re' wili re' hin, hin ruDios kinq'orik. 13Re' i naa ruk'amam chi rehk'een jino'q ixoq ma' reht'al ta wach q'orinik winaq. 14Ma' ruk'ul taj chi neerub'an kaxáro ruuk' ixoq kamnaq rub'ahiil, ruuk' ixoq ch'aq kaxáro, ruuk' i k'oyoom laj ixoq. Ruuk' la' jino'q ixoq aj Leví ma' reht'al ta wach q'orinik winaq naa rub'anam kaxáro. 15Koruman chi je' re' naa rub'anam reh chi ma' nee ta ruch'uwa'reej wach taqe riih rumaam naa kiwihiik parutinamiit. Re' wili re' hin i Dios xinye'wik rusantohiil, inki Dios. 16Re' i QaJaaw Dios, je' wili i xuq'or reh i Moisés: 17Re' hat cha q'or reh i Aarón chi ma' jino'q i riih rumaam ma' manlik ta wach i ruti'jolal naa ruchaliik chuq'ahteesjiik i kaxlanwi'k inye'arik chi mayiij, chi nuwach i hin, hin ruDios. 18Ruum ma' jino'q i ma' manlik ta wach ruti'jolal naa ruchaliik chuq'ahteesjiik i mayiij, moywach, chelej riib' imb'ehik, ma' manlik ta wach i ju', ma' manlik ta wach i xikin. 19Je' wo' hoq i rutoqom i rooq, rutoqom i q'ab'. 20Je' wo' hoq i loklok i riij, je' wo' hoq i k'isa winaq xama' xk'ihik taj, je' wo' hoq i wilik i je' suutz' panaq'wach, je' wo' hoq i wilik t'ulut'aq chi riij, je' wo' i ruq'ojom riib', je' wo' hoq sipjinaq i rumiloj. 21Ma' jino'q reh i riih rumaam i Aarón i k'amal kib'eeh aj tiij ma' manlik ta wach i ruti'jolal i ruk'ul chi neenchalik chi nuwach chuq'ahteesjiik i holohik laj mayiij, je' wo' hoq kaxlanwi'k inye'arik chi mayiij. 22Eh neerub'an chi neeruk'ux reh i kaxlanwi'k re' re', eh nee wo' ruk'ux reh i santo laj mayiij, je' wo' hoq i xti looq'. 23Xa re' la' ma' nee ta rub'an chi neenokik chi juntar i itz'ihy tasb'al paam itz'ihy naah paat, eh ni xata neerub'an chi nerujil i koq riib' chuwach i artaal, reh chi ma' nee ta ruch'uwa'risaj wach i nuSantolaj ye'aab'. Re' hin i Dios, re' hin xin ye'wik kisantohiil, inki Dios. 24Eh re' i Moisés xuq'or reh i Aarón i xq'orarik reh ruum i Dios, eh xuq'or wo' keh taqe i rak'uun i Aarón, je' wo' keh chu'nchel i aj Israel.

will be added

X\