LEVITICO 17

1Re' i QaJaaw Dios je' wili i xuq'or reh i Moisés: 2Chaq'or reh i aawas Aarón, keh taqe i rak'uun, je' wo' keh chu'nchel i aj Israel noq re' hin naa nuye'em keh i k'uhb'aal wili: 3Xa awach pa' jino'q i aj Israel nee rukansaj jino'q imas wakax oon jino'q imas tentzun, oon jino'q ixoq kaprax chupaam i itz'ihy naah paat, oon chi riij reje. 4Eh wila' ma' xk'ulik rukansaj panookb'al reh i santo laj itz'ihy naah paat molb'al iib', xuq'asaj-oq chi mayiij chuwach i QaJaaw. Re' reh neenkahnik chi wilik ru mahk ruum i re' naa rehtesjiik reje chi xilak i rutinamiit. 5Re' i k'uhb'aal wili i nuq'or keh i aj Israel reh chi ma' naa ta kiq'asam chi kimayiij i chikop xa aha' pantaq ab'iix. Koruman la' chi naakik'amaam reje panookb'al reh i santo laj itz'ihy naah paat molb'al iib', naa kiq'asam reh i k'amal kib'eeh aj tiij reh chi naa ruq'asam chi mayiij chuwach i QaJaaw Dios k'amb'al keh panotob'il i aj Israel ruuk' i Dios. 6Re' i k'amal kib'eeh aj tiij naa rukihraam i rukik'eel i chikop chinaah i ru artaal i QaJaaw, re' wilik ma' najta ruuk' i santo laj itz'ihy naah paat molb'al iib'. Eh naa wo' ruk'atam i ruxeb'ohiil i chikop chi nk'ohnik laj mayiij chuwach i Dios. 7Ma' naa ta chik taq aq'asam i chikop chi kimayiij chikiwach taqe i ma' tob'laj uxlab'al wilkeeb' xa aha' re' inaloq'ej taq chaloq najtir ruum i re' xaq'eb' taq awiib'. Re' i k'uhb'aal wili naa taq nuye'em cha naah reh juneliik naa wo' kik'amam naah taq awiih aamaam. 8Eh cha q'or wo' keh wila' re' jino'q i kuch aj Israel, oon jino'q i tokoom tinamit wilik chi kixilak naa ruye'em i ruk'atoj mayiij, oon tokoom chik i mayiij koruman chi naa ruk'amam reje panookb'al reh i itz'ihy naah paat inkimol wii' kiib'. 9Eh wila' ma' xuk'am reje panookb'al reh i santo laj itz'ihy naah paat molb'al iib', reh chi naa ruq'asam chi rumayiij chuwach i QaJaaw Dios. Re' winaq re' re' naa rehtesjiik chi xilak i rutinamiit. 10Eh xa awach pa' jino'q i aj Israel, oon jino'q i tokoom tinamit wilik chi kixilak neenk'uxwik reh i kik' xanik' pa' wach ruk'uxariik neerub'an. Re' hin naa nuye'em i nujosq'iil chinaah, eh naa wesam chi xilak i nutinamiit. 11Ruum chu'nchel i k'achaach re' i kikik'eel inye'wik kik'achariik. Re' hin i nuq'or taq aweh chi naa taq aye'em chi amayiij chinaah i artaal reh chi naa taq areqem ko'lemb'al reh taq awánima ruum re' kik' inye'arik chi tojb'al riij i mahk. 12Je' re' noq re' hin i nuq'or keh i aj Israel chi ma' jino'q kekeh, eh ma' jino'q i tokoom tinamit wilik chi kixilak naa ruk'uxwiik reh i kik'. 13Eh awach pa' jino'q i aj Israel, oon jino'q i tokoom tinamit wilik chi kixilak nenooj rukansaj jino'q i chikop re' ruuk' i ruk'ul chi neenk'uxarik inchol ruyitz'im i rukik'eel, eh neerutz'ap naah chi ak'al. 14Ruum re' i kik' inye'wik kik'achariik chu'nchel i k'achaach. Je' re' noq re' hin i nuq'or keh i aj Israel chi ma' naa ta kik'uxum i kik' ruum re' re' inye'wik kik'achariik chu'nchel i k'achaach. Eh awach neenk'uxwik reh naakeliik chi kixilak i aj Israel. 15Eh xa awach pa' jino'q i aj Israel, oon jino'q i tokoom tinamit neenk'uxwik reh i jino'q i chikop xa kansamaj, oon xereb'ik i ruti'jolal ruum josq'laj chikop koruman chi naa rutz'ajam i ruso', eh chi naa rub'anam ritiin. Eh naa rukahniik chi ch'uwa' wach korehtaal inokik i q'iij, chi riij i re' naa wo' rukahniik chi saq wach. 16Eh wila' ma' xutz'aj i ruso', wila' ma' xub'an ritiin xa nee wo' rukahniik chi rihqaam i ru mahk, inki i Dios.

will be added

X\