LEVITICO 15

1Re' i QaJaaw Dios je' wili i xuq'or reh i Moisés, i Aarón: 2Re' taq i hat je' taq wili i cha q'or keh i aj Israel: Xa awach pa' i winaq neenelik ruha'iil i ruk'achab' ruum yab'ilaal, naa rukahniik chi ch'uwa' wach. 3Eh re' reh atoob' ta kok'ahchi' chi elik ruha'iil i ruk'achab' ruum yab'ilaal, atoob' ta ma' k'ahchi' ta chik reliik ruha'iil ruk'achab' ruum yab'ilaal xanaa wo' rukahniik chi ch'uwa' wach. 4Eh xa aha' pa' i yokaab' naa ruwiriik wii' i elik i rub'an i ruha'iil i ruk'achab' naa rukahniik chi ch'uwa' wach. Eh xa aha' pa' i tzunaab' naa rutzuhniik wii' naa wo' rukahniik chi ch'uwa' wach. 5Eh xa awach pa' neentz'a'inik reh i yokaab' inwirik wii' i winaq re' re' koruman chi naa rutz'ajam i ruso', eh chi naa rub'anam ritiin. Eh xa konaa wo' rukahniik chi ch'uwa' wach korehtaal inokik i q'iij. 6Eh xa awach pa' i neentzuhnik chinaah i tzunaab' neentzuhnik wii' i winaq elik i rub'an i ruha'iil i ruk'achab' ruum yab'ilaal, koruman chi naa rutz'ajam i ruso', eh chi naa rub'anam ritiin. Eh xa konaa wo' rukahniik chi ch'uwa' wach korehtaal inokik i q'iij. 7Eh xa awach pa' neentz'a'inik reh i winaq elik i rub'an i ruha'iil i ruk'achab' ruum yab'ilaal, koruman chi naa rub'anam ritiin. Eh xa konaa wo' rukahniik chi ch'uwa' wach korehtaal inokik i q'iij. 8Eh wila' re' i elik i rub'an i ruha'iil i ruk'achab' i wila' xuchuhb'aaj reje wach i ruso' jino'q i ma' xta ruch'uwa'iil wach, koruman chi naa rutz'ajam i ruso', eh chi naa rub'anam ritiin. Eh xa konaa wo' rukahniik chi ch'uwa' wach korehtaal inokik i q'iij. 9Eh wila' re' winaq elik i rub'an i ruha'iil i ruk'achab' ruum yab'ilaal, xjohtik reje rij kawáyu neenkahnik chi ch'uwa' wach i rihqb'aal i kawáyu. 10Eh re' i neerutz'aj i xa neeruyokib'ej i winaq elik i rub'an i ruha'iil i ruk'achab', naa rukahniik chi ch'uwa' wach korehtaal inokik i q'iij. Eh re' neenk'amwik reje reh i neeruyokib'ej, koruman chi naa rutz'ajam i ruso', chi naa rub'anam ritiin. Eh xa konaa wo' rukahniik chi ch'uwa' wach korehtaal inokik i q'iij. 11Eh re' i winaq elik i rub'an i ruha'iil i ruk'achab' ruum yab'ilaal wila' xutz'a'j jino'q i xa awach chi ma' rutz'ajam tee q'ab'. Re' nee rutz'a'j re' re' koruman chi naa rutz'ajam i ruso', eh naa rub'anam ritiin. Eh xanaa wo' rukahniik chi ch'uwa' wach korehtaal inokik i q'iij. 12Eh wila' re' winaq elik i rub'an i ruha'iil i ruk'achab' xutz'a'j jino'q ak'al xaro, koruman chi naa rupaxjiik. Wila' xutz'a'j jino'q i xaro re' ruuk' i chee' koruman chi naa rutz'a'jiik wach. 13Eh noq k'aachjinaq chik i winaq eh rumayam chik elik i ruha'iil i ruk'achab', wuquub' q'iij naa ruy-eem reh chi naa rusaqb'isam riib', koruman chi naa rutz'ajam i ruso', chi naa rub'anam ritiin ruuk' i k'achlik ha'. Ruuk' i re' naa rukahniik chi saq wach. 14Eh paruwahxaaq q'iij i winaq re' re' naa ruk'amam cho chuwach i QaJaaw Dios i kiib' chi kok' tz'ikin mukur, oon kiib'-oq rak'uun paloma naa ruq'asam reh i k'amal kib'eeh aj tiij panookb'al reh i santo laj itz'ihy naah paat molb'al iib'. 15Re' k'amal kib'eeh aj tiij naa ruq'asam chi mayiij i k'isa tz'ikin jinaj chi riij i ru mahk i winaq. Eh re' i k'isa tz'ikin jinaj naa ruq'asam chi k'atoj mayiij, re' wili i naa rub'anam chuwach i QaJaaw Dios reh chi neenkahnik chi saq wach i yowaab'. 16Eh noq re' jino'q i winaq xelik ruha'iil i ruk'achab' ruum yab'ilaal koruman chi naa rub'anam ritiin jumpa'liik. Eh xa ko naa wo' rukahniik chi ch'uwa' wach korehtaal inokik i q'iij. 17Eh wila' xq'ehb'ik chinaah i ruha'iil i ruk'achab' i winaq jino'q i itz'ihy oon jino'q i tz'uhuum koruman chi naa rutz'ajariik wach. Eh xanaa wo' rukahniik chi ch'uwa' wach korehtaal inokik i q'iij. 18Eh wila' re' winaq re' re' rixoqb'eej jino'q ixoq koruman chi naa kianam kitiin kikab'cheel. Eh xanaa wo' kikahniik chi ch'uwa' kiwach korehtaal inokik i q'iij. 19Eh wila' re' jino'q ixoq elik i rub'an i rukik'eel re' rutz'ajooj i rub'an reh rajlaal poh wuquub' q'iij naa rukahniik chi ch'uwa' wach. Eh awach i neentz'a'inik i koq reh ixoq naa rukahniik chi ch'uwa' wach korehtaal inokik i q'iij. 20Eh xa aha' pa' yokaab' neenwirik wii' ixoq re' re' noq k'ahchi' i rutz'ajooj naa rukahniik chi ch'uwa' wach. Eh xa aha' pa' tzunaab' neentzuhnik wii' naa rukahniik chi ch'uwa' wach. 21Eh xa awach pa' neentz'a'inik i koq reh i yokaab' naa ruwiriik wii' naa rukahniik chi ch'uwa' wach koruman chi naa rutz'ajam i ruso' eh chi naa rub'anam ritiin. Eh xa konaa wo' rukahniik chi ch'uwa' wach korehtaal inokik i q'iij. 22Eh wila' awach tz'a'inik reh i xiila nee rukoj chi rutzunaab' ixoq re' re', koruman chi naa rutz'ajam i ruso', eh chi naa rub'anam ritiin. Eh xa konaa wo' rukahniik chi ch'uwa' wach korehtaal inokik i q'iij. 23Eh awach neentz'a'inik reh i chib'ih jariik wilik chinaah i naa ruyohkiik wii' ixoq, oon nee rutz'a'j i chib'ih jariik wilik chinaah i naa rutzuhniik wii' naa rukahniik chi ch'uwa' wach korehtaal inokik i q'iij. 24Wila' awach i winaq xwirik i koq ruuk' ixoq re' re' noq k'ahchi' i rutz'ajooj i rub'an reh rajlaal i poh, wuquub' q'iij naa rukahniik chi ch'uwa' wach, je' wo' hoq i yokaab' naa ruwiriik wii' naa rukahniik chi ch'uwa' wach. 25Eh wila' re' ixoq ma' rumay ta elik i rukik'eel q'e' chik najt xub'an reh ma' xata je' najtiil i rub'an reh noq i rub'an i rutz'ajooj rajlaal i poh. Eh nik' pa' najtiil neerub'an elik i rukik'eel je' wo' re' najtiil naa rukahniik chi ch'uwa' wach. 26Eh xa aha' pa' yokaab' neenwirik ixoq re' re', eh xa chib'ih pa' jariik i neerutzunib'eej noq kok'ahchi' chi elik i rukik'eel, naa rukahniik chi ch'uwa' wach, je' rukab' noq inkahnik noq i rub'an i rutz'ajooj rajlaal poh. 27Eh xa awach pa' neentz'a'inik i koq reh i ruyokaab' oon i rutzunaab' koruman chi naa rutz'ajam i ruso' eh chi naa rub'anam ritiin. Eh xa ko naa wo' rukahniik chi ch'uwa' wach korehtaal inokik i q'iij. 28Eh wila' xk'achjik ruuk' ruyab'ilaal re' re' kowuquub' chik q'iij naa ruy-eem reh chi neenkahnik chi saq wach. 29Eh paruwaxaaq q'iij naa ruk'amam chaloq i kiib' chi kok' tz'ikin mukur, oon kiib' chi kok' paloma naa ruk'amam reje chuwach i k'amal kib'eeh aj tiij ar pan santo laj itz'ihy naah paat molb'al iib'. 30Re' i k'amal kib'eeh aj tiij jinaj keh i kok' tz'ikin re' re' naa ruq'asam chi mayiij chi riij i ru mahk ixoq re' re'. Eh re' jinaj naa ruq'asam chi k'atoj mayiij ruuk' i naa rub'anam i k'amal kib'eeh aj tiij re' re' naa rukahniik chi saq wach ixoq ruuk' i ruyab'ilaal. 31Re' taq i hat naa taq aq'orom keh i k'uhb'aal wili taqe aj Israel reh chi ma' nee ta nchalik kich'uwa' reej paam i nuSanto laj itz'ihy naah paat eh wila' xkich'uwa'risaj paam naa kikimiik, tiko'q keh, inki Dios. 32Re' i wili i k'uhb'aal chi riij i winaq i nelik i ruha'iil i ruk'achab' ruum yab'ilaal, eh je' wo' chi riij i awach i nareliik i ruha'iil i ruk'achab' ruum i xa chib'ih jariik, naa rukahniik chi ch'uwa' wach ruum i re'. 33Re' i k'uhb'aal wili keh ixoq inki a'n i kitz'ajooj rajlaal i poh, keh wo' hoq i k'ih q'iij inki a'n i kitz'ajooj. Re' k'uhb'aal wilik keh i winaq i nelik i ruha'iil i kik'achab', keh taqe i winaq kiwiriik ruuk' jino'q ixoq noq k'ahchi' i rutz'ajooj.

will be added

X\