LEVITICO 14

1Re' i QaJaaw Dios, je' wili i xuq'or reh i Moisés: 2Re' i wili i k'uhb'aal chi riij i tolin rax q'aah i riij, reh chi naa rukahniik chi saq wach. Re' reh koruman chi naa ruk'amariik cho chuwach i k'amal kib'eeh aj tiij. 3Re' i k'amal kib'eeh aj tiij naa reliik reje chi riij i itz'ihy naah paat ko ar naa rojiik rupech'em i rax q'aah imb'anik reh, eh wila' xrilow chi xk'achjik chik i ru rax q'aah. 4Re' i k'amal kib'eeh aj tiij naa rutaq'aam ruk'amariik kiib' chi kok' tz'ikin k'achaach ma' xta ruch'uwa'iil kiwach reh chi naa rusaqb'eesjiik wach i rax q'aah i riij, naa ruk'amariik chaloq juntoq-oq i chee' chakaltee' jino'q i kaq itz'ihy, jino'q i q'ab' chee' hisopo. 5Eh re' i k'amal kib'eeh aj tiij naa rutaq'aam ruyok'ariik ralaq jinaj keh i k'isa tz'ikin chinaah i ak'al xun wilik k'achlik ha' chupaam. 6Eh nee ruchop chaloq i k'isa tz'ikin k'achlik, i juntoq chi chee' chakaltee', i kaq itz'ihy, i q'ab' i hisopo naa taqe rumuhaam chupaam i rukik'eel i k'isa tz'ikin naa rukanteesjiik chinaah i k'achlik ha'. 7Re' i k'amal kib'eeh aj tiij wuquub' pech naa rukihraam i kik' chinaah i tolin rax q'aah i riij saqb'eesb'al wach, eh naa ruq'orom chi saq chik wach. Eh re' i k'isa tz'ikin k'achlik naa roq'taam reje. 8Re' i naa rusaqb'isam riib' naa rutz'ajam i ruso', eh chi naa rub'anam ritiin. Eh naa rujoyom chu'nchel i rismaal, reh chi naa rukahniik chi saq wach. Chi riij i re' neerub'an chi neenokik i koq ruuk' i itz'ihy naah paat, xa re' la' kowuquub' q'iij naa rukahniik chi riij i paat re' re'. 9Eh paruwuuq q'iij koruman chi naa rujoyariik i rismaal i naah i rusinchii', i rismaal i rumeetz', eh chu'nchel i rismaal. Eh naa rutz'ajam i ruso' naa rub'anam ritiin chi je' re' naa rukahniik chi saq wach. 10Eh paruwahxaaq q'iij naa ruq'asam chi rumayiij i kiib' chi rak'uun tentzun manlik wach i kiti'jolal, eh jinaj i k'isa ixoq tentzun jinaj haab' wilik reh, manlik wach ruti'jolal. Eh jinaj k'isa chakach i xti holohik arina, xilakkimaj ruuk' aseite, eh juntoq lemeta i aseite, 11Eh re' i k'amal kib'eeh aj tiij naa ruye'em i koq chuwach i QaJaaw panookb'al reh i santo laj itz'ihynaah paat molb'al iib', awach i naa rusaqb'eesjiik wach ruch'ihil taqe i rumayiij naa ruq'asam. 12Eh re' i k'amal kib'eeh aj tiij naa ruchopom chaloq jinaj keh i rak'uun tentzun ruch'ihil i juntoq lemeta chi aseite naa ruq'asam chi mayiij chi riij i mahk chuwach i QaJaaw Dios je' rukab' i ruq'or i k'uhb'aal. 13Re' i k'amal kib'eeh aj tiij naa rukaansam i rak'uun tentzun chupaam i ye'aab' wilik rusantohiil re' ink'atarik wii' chi mayiij k'amb'al iib' panotob'il ruuk' i Dios. Eh je' wo' hoq i chikop inye'arik chi mayiij noq inq'ehtjik i ruk'uhb'aal i Dios, je' wo' hoq i chikop inye'arik chi mayiij chi riij i mahk naa rukahniik chi reh i k'amal kib'eeh aj tiij ruum wilik rusantohiil. 14Eh re' i k'amal kib'eeh aj tiij naa ruchopom cho k'isinoq i rukik'eel i chikop naa ruye'ariik chi mayiij, chi riij noq inq'ehtjik i ruk'uhb'aal i Dios naa ruch'ulem raa' xikin awach i naa rusaqb'isam riib'. Eh naa wo' ruch'ulem chi riij i ju' rumaam i rusak'aaj q'ab', je' wo' chi riij i ju' rumaam i rusak'aaj rooq. 15Eh naa wo' rut'urem k'isinoq aseite chupaam i rutz'eet q'ab'. 16Eh naa rut'aqsam chee ju' i rusak'aaj q'ab' chupaam i aseite wilik chupaam i rutz'eet q'ab', eh wuquub' pech naa rukihraam i aseite chuwach i QaJaaw. 17Re' i ruqox aseite naa rukahniik pan q'ab' i k'amal kib'eeh aj tiij k'isiin naa ruch'ulem paraa' i rusak'aaj xikin awach i naa rusaqb'isam riib'. Eh k'isiin naa ruch'ulem chi riij i ju' i rumaam i rusak'aaj q'ab', chi ju' i rumaam i rusak'aaj rooq. Eh naa wo' rukihraam k'isinoq chinaah i rukik'eel i chikop inq'ahteesjik chi mayiij chi riij i mahk. 18Eh re' ruqox i aseite naa rukahniik pan q'ab' i k'amal kib'eeh aj tiij, naa ruch'ulem wach naah awach i naa rusaqb'isam riib'. Re' i k'amal kib'eeh aj tiij naa ruq'asaniik reh i rumayiij reh chi naa rukuyariik i ru mahk, ruum i QaJaaw Dios. 19Re' i k'amal kib'eeh aj tiij naa ruq'asam i rumayiij i xk'achjik. Eh chi riij i re' naa rukansam i chikop naa ruk'atam chi mayiij. 20Eh ar naa ruq'asam chi mayiij chinaah i artaal ruch'ihil i mayiij naa ruye'ariik chi naq'wach. Ruuk' i re' naa rukuyariik i ru mahk i kiristianu' re' re', eh naa wo' rukahniik chi saq wach. 21Wila' neb'aa' i kiristianu' xk'achjik ma' nee ta rukuy tz'aaq' chu'nchel, neerub'an chi nee ruk'am reje jino'q i rak'uun tentzun. Eh naa ruq'asam chi mayiij reh chi nee rureq kuyb'al ru mahk, nee wo' ruq'asaj haa' i k'isiin ma' hoob' libra chi re' ruuk' i chihooj laj arina xilakimaj ruuk' aseite ruch'ihil k'isiin ma' juntoq lemeta chi aseite. 22Eh naa wo' ruk'amam reje i kiib'-oq i kok' tz'ikin mukur, oon kiib' chi kok' paloma, jinaj i nee ruyeew chi mayiij chi riij i ru mahk, eh jinaj i naa ruq'aasam chi k'atoj mayiij. 23Re' i xk'achjik paruwahxaaq q'iij naa ruk'amam reje taqe i mayiij re' re' panookb'al reh i rusanto laj itz'ihy naah paat molb'al iib'. Re' i k'amal kib'eeh aj tiij naa ruq'asaniik reh i mayiij chuwach i QaJaaw Dios reh chi naa rukahniik chi saq wach i xk'achjik. 24Eh re' k'amal kib'eeh aj tiij naa ruchopom chaloq imas tentzun ruch'ihil i k'isiin ma' juntoq lemeta chi aseite naa ruq'asam chi nim wach mayiij chuwach i QaJaaw Dios. 25Eh re' k'amal kib'eeh aj tiij noq ruyok'om chik i ralaq imas tentzun naa ruq'asam chi mayiij chi riij i mahk, eh k'isiin i rukik'eel tentzun naa ruch'ulem chi raa' i rusak'aaj xikin awach i naa rusaqb'isam riib'. Eh k'isiin i rukik'eel naa ruch'ulem chi riij i ju' i rumaam i rusak'aaj q'ab', je' wo' chi riij i ju' i rumaam i rusak'aaj i rooq. 26Chi riij i re' naa rut'urem k'isinoq aseite chupaam i rutz'eet q'ab'. 27Eh naa rut'aqsam chee ju' i rusak'aaj q'ab' chupaam aseite wilik chupaam i rutz'eet q'ab'. Eh wuquub' pech naa rukihraam aseite chuwach i QaJaaw. 28Eh re' i k'amal kib'eeh aj tiij naa ruch'ulem i chi raa' rusak'aaj xikin awach i naa rusaqb'isam riib' k'isiin wo' naa ruch'ulem chi riij i ju' i rumaam i rusak'aaj q'ab', je' wo' chi riij i ju' i rumaam i rusak'aaj rooq. Re' re' wo' hoq i xuch'ulej wii' i rukik'eel imas tentzuun xuyeew chi mayiij chi riij i ru mahk. 29Eh nik' chik k'ihaal aseite naa rukahniik chupaam i q'ab' i k'amal kib'eeh aj tiij naa ruchihkaam wach naah i k'ahchi' rusaqb'isam riib', reh chi neenkuyarik i ru mahk ruum i QaJaaw Dios. 30Eh re' i k'amal kib'eeh aj tiij naa ruchopom chaloq jinaj keh i k'isa tz'ikin mukur, oon i k'isa paloma re' q'oreel i xureq tz'aaq' i naa rusaqb'isam riib'. 31Jinaj keh i tz'ikin re' re' naa ruq'asam chi mayiij reh i pahqb'al kuyb'al ru mahk. Eh re' i tz'ikin jinaj naa ruye'em chi k'atoj mayiij, eh naa wo' ruq'asam chi mayiij i re' ruuk' i xa chi naq'wach. Eh re' i k'amal kib'eeh aj tiij naa ruq'asaniik reh, eh naa rukuyariik i ru mahk ruum i Dios i naa rusaqb'isam riib', inki. 32Re' i wili k'uhb'aal chi riij nik' wach noq naa rusaqb'isam riib' i tolin rax q'aah i riij i ma' nee ta rukuy tz'aaq chi k'ih i nee ruyeew chi mayiij. 33Re' i QaJaaw Dios je' wili i xuq'or reh i Moisés, i Aarón: 34Re' taq i hat naa taq aq'orom keh i aj Israel chi noq patinik chik inki a'n chupaam i ye'aab' Canaán re' i nuye'em keh. Eh wila' re' hin xnuyeew chaloq jino'q i q'uux chupaam jino'q i paat ar, 35re' i ehchan reh i paat re' re' neenooj ruuk' i k'amal kib'eeh aj tiij, je' wili i nee ruq'or reh: Re' hin jinaj i q'uux wilik panupaat, inko'q. 36Eh re' i k'amal kib'eeh aj tiij peet naa rutaq'aam reje rehtesjiik paam i paat re' re', noq komajaa' inokik ar reh chi ma' nee ta runih taqe chib'ih i wilkeeb' chupaam. Chi riij i re' koraj naa rokiik chi rilariik chi korik mi ruq'uxil rax q'aah i wilik chupaam i paat. 37Re' i k'amal kib'eeh aj tiij naa rilom mi wilik chuwach i rutz'aqiil i paat mi rax, eh mi kaq i q'uux re' re', mi jul qohoq paam chuwach i tz'aq. 38Re' i k'amal kib'eeh aj tiij naa reliik cho chupaam i paat re' re', eh naa ruq'orom chi naa rutz'ahpiik chuwach i wuq'uub' q'iij. 39Eh noq ik'inaq chik i wuquub' q'iij naa wo' chik rupech'em i k'amal kib'eeh aj tiij. Eh wila' re' i q'uux xooj chi nimaal wataq rutz'aqiil i paat, 40nee rutaq'aaj rehtesjiik taqe ab'aj wilik wii' i q'uux re' re'. Eh ar narojiik kutaroq chupaam i ch'uwa' paam ye'aab' chi riij reje i tinamit. 41Naa wo' ruq'orom i k'amal kib'eeh aj tiij chi jotzaroq wach chu'nchel i tz'aq, eh chi re' i rupoqil naa rojiik kutaroq chupaam i ch'uwa' paam ye'aab' chi riij reje i tinamit. 42Eh tokoom chik taqe ab'aj naa kikojom chi jilow taqe ab'aj naa kesam. Eh tokoom chik i lech'ik laj ak'al naa kikojom chuwach i rutz'aqiil i paat. 43Eh wila' xelik wo' chik chaloq i q'uux chuwach i rutz'aqiil i paat noq elenaq chik taqe ab'aj eh jotzooj chik wach, eh tokoom chik i lech'ik laj ak'al kojooj chuwach. 44Re' i k'amal kib'eeh aj tiij naa wo' chik rojiik rupech'em paam i paat re' re'. Eh wila' xrilow chi xooj wo' chik chi nimaal i q'uux chuwach i rutz'aqiil i paat, eh wila' re' ruuk' i ruq'uxil i yiib' wach rax q'aah re' i k'amal kib'eeh aj tiij naa ruq'orom chi ch'uwa' wach i paat re' re'. 45Eh naa wo' chik ruq'orom chi naa ruch'a'lojiik wach ak'al i paat, eh chu'nchel i korjinaq wii' naa rojiik kutaroq chupaam i ch'uwa' paam ye'aab' chi riij reje i tinamit. 46Wila' awach i xokik chupaam i paat re' re' chuwach i wuquub' q'iij noq naa ruq'orom i k'amal kib'eeh aj tiij naa ruq'orariik chi ch'uwa' wach korehtaal chik inokik i q'iij. 47Eh wila' awach i xwirik chupaam i paat re' re' koruman chi naa rutz'ajam i ruso'. Eh wixub'an ruwa' chupaam koruman chi naa rutz'ajam i ruso' reh chi neenkahnik chi saq wach. 48Eh re' i k'amal kib'eeh aj tiij naa wo' chik rokiik i koq chi rilariik paam i paat re' re' wila' xrilow chi ma' xelik ta chik chaloq i ruq'uxil i rax q'aah chuwach i rutz'aqiil noq jalooj chik wach. Re' k'amal kib'eeh aj tiij naa ruq'orom chi saq chik wach i paat re' re' ruum xsahchik chik wach i q'uux. 49Re' i k'amal kib'eeh aj tiij naa rutaq'aam ruk'amariik i kiib' chi kok' tz'ikin, i jun k'isatooq chi chee' chakaltee', i junsahl chi kaq itz'ihy, i q'ab' chee' hisopo, reh chi naa rukahniik chi saq paam i paat re' re'. 50Eh naa rukansam jinaj keh i kok' tz'ikin chinaah jinaj ak'al xun wilik k'achlik ha' chupaam. 51Eh naa ruchopom chaloq i chakaltee', i kaq itz'ihy, i hisopo, eh re' i k'isa tz'ikin jinaj chi k'achlik wach naa rumuhaam chupaam i rukik'eel i k'isa tz'ikin naa rukahteesjiik. Eh naa ruxilakeem ruuk' ha' i k'ik', ruuk' i re' wuquub' pech naa rukihraam i paat. 52Je' re' noq naa rusaqb'isam wach i paat re' re', ruuk' i rukik'eel i k'isa tz'ikin ruuk' i k'achlik ha'. Eh je' wo' ruuk' i k'isa tz'ikin k'achlik je' wo' i jun toq chi chee' chakalte', ruuk' i jun sahl chi kaq itz'ihy, ruuk' i q'ab' chee' hisopo. 53Chi riij i re', re' i k'amal kib'eeh aj tiij naa roq'taam reje chi riij i tinamit i k'isa tz'ikin chi k'achlik wach. Ruuk' i re' naa rub'anam nik' wach i ruq'or i k'uhb'aal chi naa rusaqb'isam wach i paat re' re'. 54Re' i wili i k'uhb'aal chi riij i ruq'uxil i rax q'aah. 55Je' wo' chi riij i ruq'uxil i rax q'aah i nelik cho wach itz'ihy inkojarik chi'iij, je' wo' hoq i nelik cho chupaam i paat. 56Je' wo' re' i k'uhb'aal chi riij i sipjeel, ruch'ihil i ti' nelik cho ruha'iil, ruch'ihil i saq reeq' i nelik chaloq. 57Re' wili naab'al reh aha' wilik i saq wach, aha' wilik i ch'uwa' wach. Re' wili i k'uhb'aal chi riij i rax q'aah.

will be added

X\