LEVITICO 12

1Re' i QaJaaw Dios je' wili i xuq'or reh i Moisés: 2Re' hat je' wili i naa aq'orom keh i aj Israel: Re' ixoq noq naa raasjiik ruha'lak'uun i wuq'uub' q'iij naa rukahniik chi ch'uwa' wach, je' rukab' i ruk'ul noq i rub'an i rutz'ajooj chi poh. 3Eh re' i k'isa rak'uun waxihib' q'iij i wilik reh noq naa rupoch'ariik i rutz'uhmal naah i k'isa ruk'achab' 4Eh re' ixoq oxlaj ru ka'winaq q'iij naa ruy-eem korehtaal intz'irlojik i rukik'eel, eh ma' naa ta rutz'a'am jino'q i wilik rusantohiil, ni xata naa rokiik chupaam i itz'ihy naah paat wilik rusantohiil, korehtaal i rureq i q'iij chi naa rukahniik chi saq wach. 5Eh wila' k'isaxq'un ix-aasjik kiib' xamano naa rukahniik chi ch'uwa' wach, je' rukab' i ruk'ul noq i rub'an i rutz'ajooj chi poh. Eh waqiib' rukajwinaq q'iij naa ruy-eem korehtaal i rumay elik i rukik'eel, eh naa rukahniik chi saq wach. 6Eh noq ik'inaq chik i q'iij naa rusaqb'isam wii' riib' reh i raasjiik i rak'uun, oon rixq'uun koruman chi naa ruq'asam chi rumayiij jino'q i k'isa imas tentzun jinaj haab' wilik reh. Eh naa wo' ruq'asam reh i k'amal b'eeh aj tiij jino'q i k'isa paloma oon jino'q i k'isa mukur panookb'al reh i santo laj itz'ihy naah paat molb'al iib'. 7Eh re' chik i k'amal kib'eeh aj tiij naa ruq'asaniik chi mayiij chuwach i QaJaaw pahqb'al kuyb'al ru mahk ixoq. Ruuk' i re' naa ruk'utiniik chi rumayam chik elik i rukik'eel xkahnik chik chi saq wach. Re' i wili i k'uhb'aal chi riij ixoq naa rasjiik jino'q rak'uun, oon jino'q rixq'uun. 8Wila' re' i tuutb'ees ma' xmanlojik i rutz'aaq loq'b'al reh i k'isa imas tentzun, nee ruk'am reje kib'-oq i k'ok' mukur, oon kib'-oq i k'ok' paloma. Re' i k'amal kib'eeh aj tiij naa ruq'asaniik keh chi mayiij ruuk' i re' naa rukahniik chi saq wach ixoq.

will be added

X\