JUECES 2

1Re' ruánjel i QaJaaw Dios xelik reje i Gilgal, xooj ar Boquim, je' wili i xuq'or: Re' Dios je' wili i xuq'or: Re' hin xineesanik taq cha weh ar Egipto xat nuk'am taq cho chupaam i ye'aab' wili re' nuq'orom cho rib'iral keh aamaam awati't. Re' noq xnuq'or keh chi ma' jaruuj naa nuyojom wach i nuyejaam cho wach kuuk'. 2Re' naq inwaaj i hin chi ma' xta naq i xayejaa' taq wach kuuk' i wilkeeb' chupaam i ye'aab' re' re', re' naq xwaaj i hin chi xa yojib'eej taqe i kiartaal, xa re' la' re' taq i hat xama' xinanimaj ta wo' taq, xinaq'etwachej la' taq. 3Ruum aj re', yu'naak re' hin i nuq'or taq aweh chi ma' naa ta chik wesam taqe reje chawach i ki-ixowanik taq awach wilkeeb' ar. Eh ruum taqe i tiyoox inkinimaj i keh naa taq aq'ehb'iik pamahk i hat, inki Dios, inki. 4Eh noq xukohlaaj q'orik i ángel chu'nchel i tinamit Israel xkik'er kichii' chi oq'ik. 5Ruum aj re', re' ye'aab' re' re' Boquim i rub'ihnaal xkikoj. Eh ar xkiyeew i kimayiij taqe i aj Israel chuwach i QaJaaw Dios. 6Noq re' Josué xuch'aq taqe reje i aj Israel. Re' keh xiooj pan kiye'aab' chi kiju'junaal re' i kiye'aab' xkehchaaj. 7Re' taqe i aj Israel xkian rulooq'jiik i QaJaaw Dios noq kok'ahchlik i Josué, je' wo' hoq noq kok'achalkeeb' taqe i mama' winaq xi k'amwik cho b'eeh i xi ilwik cho reh i nimaq wach ma' ilooj taj xub'an QaJaaw Dios ko'lb'al keh i aj Israel. 8Eh re' rak'uun i Nun Josué rub'ihnaal i raj kamanoom i QaJaaw Dios jinaj siento ruuk' lajeeb' haab' i wilik reh noq xkikimik. 9Eh ar xkimuq'aa' chupaam i ruye'aab' Timnat-sera, re' wilik reje pantz'eet reh i rookb'aal q'iij reh i yuuq' Gaas, wilik chupaam i kiye'aab' taqe i riih rumaam Efraín. 10Eh xikimik wo' reje i chu'nchel i aj Israel wilkeeb' noq kok'achlik i Josué. Eh re' taqe i kak'uun kixq'uun xi aasjik koq'uun ma' xkinimaj ta chik i QaJaaw Dios, eh ma' keht'al ta naq chik i ma' ilooj taj xub'an i Dios ko'lemb'al keh i aj Israel. 11Re' taqe i aj Israel xkitoq'aa' rub'aan taqe i ma' imponik ta chuwach i QaJaaw Dios. Eh tohq'ik kiloq'em taqe i tiyoox Baal. 12Eh xkiq'eb' i QaJaaw Dios, re' i xkinimaj chee kimaam kati't, re' i x-esanik cho keh ar Egipto. Eh re' chik taqe i tiyoox xkiloq'ej, re' taqe inkinimaj i tinamit wilik chi kijunsuut. Ruuk' i xkian re' re' xkijosaj cho wach i rujosq'iil i QaJaaw Dios. 13Eh xkiq'eb' i QaJaaw Dios ruum re' chik taqe i Baal taqe i Astarot, xkiloq'ej. 14Ruum taqe i xkian re' re' i aj Israel xjohtik wach i rujosq'iil i QaJaaw Dios. Eh xuyeew q'ab' i QaJaaw Dios chi xi okik i aj i leq' chi relq'jiik chu'nchel i chib'ih keh i aj Israel. Eh chi re' taqe i nixowanik kiwach wilik chi kijunsuut xi chalik chi q'aq'inik kuuk', eh ma' xkikuy ta ruk'ulb'eejiik. 15Eh noq re' taqe i aj Israel kiooj chi q'aq'inik, ma' xitoob'jik ta ruum i QaJaaw Dios, eh ma' kielik ta korik, je' rukab' i ruq'orom chaloq. Atoob' ta re' Dios xub'an cho ti' k'axik keh i aj Israel. 16Re' reh xupab'aa' taqe i q'atal q'orik reh chi naa kiko'ljiik pan kiq'ab' i nelq'anik chib'ih keh. 17Xa re' la' re' taqe i aj Israel xama' xinimanik ta wo' chikiwach i q'atal q'orik xkikanaa' i rub'eeh i Dios, eh re' chik i taqe i tiyoox xkiloq'ej. Eh xkiq'eb' i QaJaaw Dios i xkinimaj chee kimaam kati't, eh xkinimaj chu'nchel i ruq'or i ruk'uhb'aal, eh re' keh ma' je' ta chik re' i xkian. 18Eh noq i rupab'aa' i q'atal q'orik i rutoob'eej nik' najtiil ink'acharik, re' QaJaaw Dios i ruko'leej i aj Israel, pan kiq'ab' i nixowanik kiwach. Re' q'oreel nik' najtiil i naa ruwihiik chi q'ataj q'orik i winaq re' re'. Ruum re' i QaJaaw Dios xketelinik cho kiwach, ruum chi k'ahchi' naq kik'ik chi ti' k'axik, eh intib'ik kik'ux. 19Xa re' la' noq inkimik reje i q'atal q'orik kiokik wo' chik chub'anariik i yiib' wach na'ojb'al i aj Israel, ma' xata chik je' rukab' xkian i kimaam kati't. Re' chik taqe i tiyoox i xkinimaj, eh inkixuk'aa' kiib' chu looq'jiik. Eh ni xata naq inkikanaa' rub'aan i yiib' wach, xiik' naah kowiil i kinaah. 20Ruum i re' xjohtik wach i rujosq'iil i QaJaaw Dios chikinaah i aj Israel, eh je' wili i xuq'or: Re' taqe tinamit wili ma' xkian taj i nuyejaam wach kuuk' i kimaam kati't, ma' xkinimaj taj i nuq'oral, 21je' wo' re' i hin ma' nee ta wo' wesam reje i tinamit pan kiye'aab', re' wo' hoq i ma' xresaj ta taqe reje i Josué noq kok'achlik, inki. 22Re' QaJaaw Dios je' re' xub'an kuuk' i aj Israel i lb'al keh mi ma' xkikanaa' runimjiik i reh je' rukab' i runimjiik xkian chaloq i kimaam kati't, oon ma' naa ta chik kaajwaam nimanik. 23Ruum aj re', re' i QaJaaw Dios ma' xresaj ta taqe reje i tinamit i komajaa' i ruq'asaj pan q'ab' i Josué noq xkimik reje.

will be added

X\