JUECES 12

1Re' taqe i riih rumaam i Efraín xkimol kiib' xkiq'at reje wach i nim ha' Jordán xiooj chupaam i tinamit Zafá, xiooj k'oloq ruuk' i Jefté je' wili xkiq'or reh: ¿Chib'ih reet noq xat'ooj chi q'aq'inik cha wutkeel kuuk' i aj Amón? eh ma' xaq'or ta qeh, ruum i re' yu'naak naa qak'atam aapaat, hat junk'ahtiik ruuk' naaqanam, inki taqe. 2Eh re' Jefté je' wili kichaq'weesjiik xb'aan: Re' noq xnub'an i kowlaj q'aq'inik wuch'ihil taqe i nutinamiit kuuk' i aj Amón re' hin xnutaq'aaj taq ak'amariik, eh re' taq i hat xama' xat chalik ta wo' taq chi qako'ljiik. 3Eh xwilow i hin chi ma' xat chalik ta taq chi qako'ljiik re' hin xnuyeew wiib' pankimik wuch'ihil taqe i nutinamiit xinooj chi q'aq'inik kuuk' taqe i aj Amón. Eh re' i QaJaaw Dios xtoob'inik qeh chi xqa'an cho keh. ¿Chib'ih chik reet noq ti chalik taq chi q'aq'inik wuuk' i hin yu'naak? 4Eh re' Jefté xumol kiwach chu'nchel i winaq wilkeeb' Galaad, xi okik chi q'aq'inik kuuk' i riih rumaam i Efraín, eh xkian reh. Je' re' i xb'aan keh ruum re' taqe i riih rumaam i Efraín inkiq'or chi re' taqe i aj Galaad wilkeeb' chi kixilak i riih rumaam i Efraín, chi kixilak taqe i riih rumaam i Manasés, chi kixilak i riih rumaam i Efraín elenaq taqe chaloq. 5Re' taqe i aj Galaad inkiq'at i ye'aab' aha' ma' chaam ta wii' i ha' re' imb'aan wii' ik'ik chupaam i nim ha' Jordán. Eh noq imponik ar jino'q i riih rumaam i Efraín elik i rub'an ma' nik' teesjiik ta kuum i aj Galaad, eh inkipahqaaj reh mi re' ruuk' taqe i riih rumaam Efraín. Eh wila' xuq'or chi ma' re' ta ruuk', 6inkipahqaaj reh chi chuq'or i q'orik Shibolet, eh wila' Sibolet i xkiq'or, ar inkireq chi riij i aj Galaad chi re' ruuk' i riih rumaam Efraín ruum re' keh ma' kichol taj i q'orik re' re'. Eh inki chop ar inkikansaj chupaam i ye'aab' imb'aan wii' ik'ik chupaam nim ha' Jordán. Je' re' noq xkikansaj i kiib' roxk'ahl miil chi re' ruuk' i riih rumaam i Efraín. 7Eh re' Jefté waqiib' haab' xwihik chi taaq'anik chikinaah i aj Israel. Chi riij i re' xkimik reje ar xkiwuq'aa' Galaad, re' wo' x-aasjik wii'. 8Chi riij i Jefté re' chik i Ibzán aj Belén xokik chi taaq'anik chikinaah i aj Israel. 9Re' winaq re' re' lajeeb' ru ka'winaq i rak'uun xwihik, eh lajeeb' ru ka'winaq wo' hoq i rixq'uun xwihik. Eh chu'nchel xuyeew taqe pan kaxáro kuuk' i tokoom kitinamitaal. Re' i Ibzán re' re' wuquub' haab' xwihik chi taaq'anik chikinaah i aj Israel, 10eh noq xkimik ar xkimuq'aa' Belén. 11Chi riij i re', re' chik i Elón re' ruuk' taqe i riih rumaam Zabulón, lajeeb' haab' xwihik chi taaq'anik chikinaah. 12Eh noq xkimik reje ar xkimuq'aa' chupaam i tinamit Ajalón wilik chupaam i ruyuq'ul i Zabulón. 13Chi riij i reh re' chik i Abdón rak'uun i Hilel Piratón i b'ih rutinamiit xokik chi taaq'anik chikinaah i aj Israel chuwach i waxiqiib' haab'. 14Eh re' Abdón ka'winaq i rak'uun, lajeeb' ru ka'winaq i riih xwihik. Re' taqe re' chi riij i b'uurux kib'ehik. Eh waxiqiib' haab' xi wihik chi taaq'anik chikinaah i aj Israel. 15Eh noq xkimik reje i Abdón rak'uun i Hilel ar xkimuq'aa' chupaam i tinamit Piratón wilik paruyuq'ul kiye'aab' i riih rumaam i Efraín, chinaah i ruyuq'ul i Amalec.

will be added

X\